Aspect Ratio ធ្លាប់តែឮ អ្នកប្រើស្មាតហ្វូនអាចមិនស្គាល់ជាអ្វី?

2017-10-20 03:06:19
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាក្យ Aspect Ratio សំដៅទៅទំនាក់ទំនងរវាងកម្ពស់និងបណ្ដោយនៃអេក្រង់ទូរសព្ទ។ ទាំងកុំព្យូទ័រយួរដៃ, ថេបប្លែត ក៏ដូចជាស្មាតហ្វូនសុទ្ធសឹងតែមានរង្វាស់កម្ពស់និងបណ្ដោយ បង្កើតបានជា Aspect Ratio ទាំងអស់។

ឧបមាថា ស្មាតហ្វូនខ្លះអេក្រង់ធំ ប៉ុន្តែនៅពេលទស្សនាខ្សែភាពយន្ត ជួនកាលវានៅសល់គែមខ្មៅសងខាង ដែលនេះមកពីទំហំសមាមាត្រតូច។ ម្ល៉ោះហើយទើបការវិវត្តនៃ Aspect Ratio នាពេលបច្ចុប្បន្នធ្វើឲ្យស្មាតហ្វូនស៊េរីទំនើបអាចលេងហ្គេម និងប្រើប្រាស់កម្មវិធី ក៏ដូចជាទស្សនាភាពយន្ត ក្នុងកម្រិតផ្ទៃពេញអេក្រង់ទាំងគែមសងខាងតែម្ដង។

ការគណនាទំហំសមាមាត្រ Aspect Ratio ទៅជាចំនួនគត់ឬទសភាគ ដោយយកចំនួនធំមកចែកចំនួនតូច តួយ៉ាងដូចជា 4:3 នាំឲ្យបាន 1.33 ឬ 16:9 នាំឲ្យបាន 1.78។

បច្ចុប្បន្ន LG និង SAMSUNG កំពុងផ្ដោតសំខាន់ខ្លាំងទៅលើការពង្រឹងទាំងសមត្ថភាពអេក្រង់និងទំហំ Aspect Ratio ដូចជា G6 មាន 18:9 និង Galaxy S8 មាន 18.5:9 ម្ល៉ោះហើយអ្នកបង្កើតប្រព័ន្ធប្រតិបត្តិក៏ដូចជាវិស្វករកម្មវិធី ទាមទារតម្រូវឲ្យកែច្នៃកម្មវិធីសម្របនឹងទំហំអេក្រង់នោះដែរ។

ចំណែកឯ Apple វិញ កាលចេញជំនាន់ iPhone 5 ឆ្នាំ ២០១២ បានវិវត្តទំហំសមាមាត្រអេក្រង់ពី 3:2 ឡើងមកដល់ 16:9 ដែលធ្វើឲ្យផ្ទៃអេក្រង់ខិតក្បែរគែមសងខាងកាន់តែកៀកទៅ លុះម៉ូដែលក្រោយៗទៀតគ្រាន់តែពង្រឹងកម្រិតរូបភាពច្បាស់ជះពីអេក្រង់ប៉ុណ្ណោះ។ ប៉ុន្តែនៅឆ្នាំ ២០១៧ សង្កេតឃើញក្រុមហ៊ុនអាមេរិកខាងលើបានវិវត្តខ្លួនមិនឲ្យចាញ់ក្រុមហ៊ុនប្រទេសកូរ៉េ ដោយម៉ូដែល iPhone X មានទំហំសមាមាត្រអេក្រង់ ឬ Aspect Ratio ដល់ 19.5:9 និងកម្រិតបង្ហាញ 1125x2436 ភីកសែល៕

អានអត្ថបទបន្ទាប់

ប្រភព៖ Gizmodo ប្រែសម្រួល៖ កៅ រក្សា