ថៅកែហាងចិត្តធម៌ ផ្តល់មី២ម៉ឺនចាន ដល់អ្នកបោសសម្អាតផ្លូវ កំពុងធ្វើឲ្យគេរំជួលចិត្ត

2017-10-21 07:40:57
ចំនួនមតិ 0 | ចំនួនចែករំលែក 0

ចន្លោះមិនឃើញ

ម្ចាស់ហាងមីមួយកន្លែង មានឈ្មោះថា Loving Heart Tofu នៅក្នុងខេត្ត Guizhou ប្រទេសចិន បានធ្វើឲ្យអ្នកនិយមប្រើប្រាស់អ៊ីនធឺណិតនៅចិន រំជួលចិត្តយ៉ាងខ្លាំង បន្ទាប់ពីបានផ្តល់មីដោយឥតគិតថ្លៃ ដល់អ្នកបោសសម្អាតផ្លូវ , សមាជិកយោធា និង មនុស្សចាស់អាយុលើស ៧០ឆ្នាំ។

បើយោងតាមលោក Sun Zhiwen ដែលជាម្ចាស់ហាងខាងលើ បានប្រាប់ឲ្យដឹងថា លោកបានបើកហាងមីនេះ តាំងពីខែតុលា ឆ្នាំ២០១៥ មកម្ល៉េះ ហើយបានផ្តល់មីដោយឥតគិតថ្លៃ ចាប់តាំងពីពេលនោះមក។ ក្នុងរយៈពេលជាង ២ឆ្នាំមកនេះ លោកបានផ្តល់មីដោយឥតគិតថ្លៃ ជាង ២០ ០០០ចានហើយ។

លោក Sun បាននិយាយថា «ការងារបោសសម្អាតតាមដងផ្លូវ គឺជាការងារដ៏លំបាក ជាពិសេសនៅរដូវរងា។ ពួកគេត្រូវក្រោកពីព្រលឹម ហើយធ្វើការដោយគ្មានអាហារពេលព្រឹក ទាល់តែពេលថ្ងៃត្រង់ ទើបទទួលទានអាហារថ្ងៃត្រង់តែម្តង។ ប៉ុន្តែ ខ្ញុំអាចផ្តល់អាហារពេលព្រឹកដ៏ល្អ សម្រាប់ពួកគេក្នុងអំឡុងពេលសម្រាក»។

លោក Sun ដែលធំឡើងនៅក្នុងត្រកូលគ្រួសារក្រីក្រ បានឲ្យដឹងទៀតថា លោកបានទទួលជំនួយយ៉ាងច្រើនពីអ្នកដទៃ ដូច្នេះទើបចង់ផ្តល់ឲ្យសង្គម នូវអ្វីដែលលោកអាចធ្វើបានវិញ។

«ខ្ញុំគ្រាន់តែជាអ្នកជំនួញធម្មតាម្នាក់ប៉ុណ្ណោះ។ វាមិនមានបញ្ហាអ្វីឡើយ ទោះខ្ញុំរកលុយបានប៉ុន្មានក៏ដោយ។ ខ្ញុំគ្រាន់តែចង់ឲ្យពួកគេមានអារម្មណ៍កក់ក្ដៅ និងសប្បុរសដូចដែលខ្ញុំទទួលបាន ពេលដែលខ្ញុំធំឡើង ក្នុងត្រកូលអ្នកក្រីក្រប៉ុណ្ណោះ»។ នេះបើតាមសម្តី លោក Sun។

យ៉ាងណាមិញ ថៅកែហាងចិត្តធម៌រូបនេះ មានគម្រោងនឹងបើកសាខាបន្ថែមទៀតផង៕