សិល្បករជំនាញផាត់មុខបែបភ័យរន្ធត់ លាក់ខ្លួនធ្វើការនៅបាត់ដំបង

2017-11-06 03:01:25
ចំនួនមតិ 0 | ចំនួនចែករំលែក 0

ចន្លោះមិនឃើញ

សម្ងំៗមិនសូវចេញឈ្មោះឲ្យគេស្គាល់សោះ អ្នកជំនាញផាត់មុខរបៀបរបួសស្នាម និងបែបរន្ធត់ អ្នកស្រី គឿម កុឡាប ដែលមានស្រុកកំណើតនៅឯខេត្តបាត់ដំបង សប្តាហ៍នេះបានលេងភ្នំពេញចូលរួមក្នុងកម្មវិធីមហោស្រព ក៏បានចូលមកជួបជាមួយក្រុមសារពត៌មាន Sabay ហើយបង្ហាញពីសមត្ថភាពផាត់មុខរបួសឡើងដូចពិតៗ។

អ្នកស្រី គឿម កុឡាប ក៏ជាសិល្បករផ្នែកគំនូរ និងអ្នកឌីហ្សាញ រូបភាពសិល្បៈលើភាពយន្តគំនូរជីវចល បែប Animation របស់ក្រុមហ៊ុនសិល្បៈ Phare Creative Studio នៅខេត្តបាត់ដំបង និងជាគ្រូបង្រៀនផ្នែកគំនូរផាត់ពណ៌ នៅអង្គការ ហ្វាពន្លឺសិល្បៈខេត្តបាត់ដំបង។

តែបន្ចុប្បន្ន អ្នកនាងជាអ្នកជំនាញលើការផាត់មុខរបៀបរន្ធត់ របួស របៀបជាខ្មោច ដែលអ្នកនាង កុឡាប ប្រាប់ថាជាជំនាញបន្ទាប់បន្សំដែលរៀនសូត្រដោយខ្លួនឯងបន្ថែមពី យូធូប និងស្រាវជ្រាវ ដោយយោងតាមមូលដ្ឋានគ្រឹះនៃចំណេះដឹងលាយពណ៌ ផាត់ពណ៌ និងសង្កេតមើលរបួសស្នាមពិតៗ និងរៀនអនុវត្តដោយខ្លួនឯងផ្ទាល់។

កាលពីឆ្នាំ ២០១១ សិល្បកររូបនេះ មានឱកាសទទួលអាហារូបករណ៍ រយៈពេល ៣ឆ្នាំ ដើម្បីទៅរៀនឲ្យបានលម្អិត កាន់តែច្បាស់ និងស្វែងយល់កាន់តែស៊ីជម្រៅទៅលើការប្រើប្រាស់ពណ៌លើរូបភាពគំនូរ ឬ Illusion Painting នៅសាកលវិទ្យាល័យ Ecole Pivaut University នៅប្រទេសបារាំង ទីក្រុងប៉ារីស។

មុនត្រលប់មកកម្ពុជាកាលពីឆ្នាំ ២០១៤ អ្នកនាងបានទៅធ្វើទស្សនកិច្ចក្នុងសារមន្ទីរ និងជារោងសិប្បកម្មផលិតសម្ភារៈកុនខ្នាតអន្តរជាតិ មួយដែលមានឧបករណ៍គ្រប់ប្រភេទសម្រាប់ផ្ទល់ និងលក់ជាសេវាកម្មដល់ផលិតករភាពយន្តផ្សេងៗ ដែលបទពិសោធន៍ទាំងនេះបានជម្រុញទឹកចិត្តអ្នកនាងឲ្យចូលចិត្តលើការងារសិល្បៈតុបតែង ផាត់មុខរបៀបភ័យញាប់ញ័របែបនេះ។

កាលពីក្មេង អ្នកស្រីចូលចិត្តលើការផាត់ពណ៌ និងការគូររូបជាខ្លាំង រហូតសុំឪពុកឈប់រៀនពីសាលារដ្ឋ ដែលរឿងនេះធ្វើឲ្យលោកឪពុក មិនសប្បាយចិត្ត តែអ្នកស្រីក៏មិនបោះបង់ក្តីស្រមៃ ដោយឈប់ទៅសាលាដោយខ្លួនឯង និងគិតតែរឿងគូររូបតែមួយមុខ ដោយមិនខ្វល់ជួយធ្វើការងារផ្ទះអ្វីទាំងអស់។

ដោយមានដុងពីកំណើតលើផ្នែកសិល្បៈគំនូរ បានធ្វើឲ្យអ្នកស្រីទទួលបានប្រាក់កំរៃខ្លះៗពីគំនូរ រហូតដល់ថ្ងៃមួយដែលក្តីសុបិនបានមកដល់ដោយបានស្គាល់សាលាបង្រៀនសិល្បៈ ហ្វាពន្លឺសិល្បៈដោយចៃដន្យ តាមរយៈការជជែកគ្នាពីអ្នកផ្សារ។

អ្នកស្រីក៏ផ្តើមរៀនសូត្រពីសិល្បៈនេះតាមរយៈគ្រូមានជំនាញ ហើយស្នាដៃរបស់អ្នកនាង ក៏ត្រូវបានបរទេស ក៏ដូចជាលោកគ្រូអ្នកគ្រូនៅសាលាហ្វាពន្លឺសិល្បៈបង្ហាញដល់ គ្រូម្នាក់មកពីប្រទេសបារាំង ហើយអ្នកនាងនឹងគ្រួសារក៏ទទួលបានអាហារូបករណ៍ទៅរៀនជំនាញនេះបន្តនៅសាលារបស់ជនជាតិបារាំងម្នាក់នោះរហូតដល់ទៅ ៣ឆ្នាំដោយជោគជ័យ។

សម្រាប់ថ្ងៃអនាគត អ្នកនាង កុឡាបចង់ត្រឡប់ទៅប្រទេសបារាំងវិញដើម្បីរៀនបន្ថែមលើរបៀបធ្វើ Prop និងការ Make up តួរបែបខ្មោច ឬរបួសស្នាមនានា ហើយអ្នកនាងក៏មានបំណងចែករំលែកចំនេះដឹងរបស់ខ្លួនជួនដល់យុវជនជំនាន់ក្រោយ និងបើកក្រុមហ៊ុនផ្ទាល់ខ្លួនដើម្បីផ្តល់ជាសេវាកម្មនានានៅក្នុងវិស័យផលិតភាពយន្ត។

ចុចអាន៖

អត្ថបទ៖ Sunny