អស្ចា​រ្យ! រឿង​ខ្លី​របស់និស្សិតពេទ្យទទួលបានជយលាភីលេខ ១​ និងធ្វើ​ឲ្យ​រដ្ឋ​មន្ត្រី​ក្រសួង​ព័ត៌មាន​ស្រៀវ​ខ្លួន​​

  • 2017-11-07 04:42:01
  • ចំនួនមតិ

ចន្លោះមិនឃើញ

ខ្សែ​ភាព​យន្ត​ខ្លី​ដែល​មាន​ចំណង​ ជើង​ថា​ «The Dinner» ទទួល​បាន​ជយ​លេខ​ភី​លេខ​ ១​ ក្នុងមហោស្រពភាពយន្តខ្លីចតុមុខ និង​ទទួលបានប្រាក់​រង្វាន់​ ៤លានរៀល ​មិន​ត្រឹម​តែ​ប៉ុណ្ណោះ​ក៏​ទទួល​បាន​ការ​កោត​សរសើរ​ពី​សំណាក់​ ឯកឧត្តម ខៀវ កាញារីទ្ធ រដ្ឋ​មន្ត្រី​ក្រ​សួង​ព័ត៌​មាន​ ថាមានស្នាដៃល្អ ធ្វើ​ឲ្យ​លោក​ស្រៀវ​ខ្លួន​ពេលដែលបានទស្សនាចប់។

ផលិតករ អ្នកដឹកនាំរឿង លោក នេត​ ឥន្ទន​រា​សុទ្ធី​ដេ្ឋព​

«The Dinner» ជារឿងបែបមនោសញ្ចេតនា ​ស្នេហា​ព្រឺព្រួចរបស់យុវ​វ័យ​មួយ​គូ​ ដែល​តួ​ស្រី​ជា​មាន​តួនាទី​ជា​គ្រូ​ពេទ្យ​ ហើយ​តួ​ប្រុស​ជា​ផលិត​ករ​ភាព​យន្ត​ ទាំង​ពីរ​នាក់​រួម​រស់​ស្រលាញ់​គ្នាមុនរៀបការ​ ហើយតួ​ស្រី​តែង​រក​រឿង​ប្រ​ច័ណ្ឌ​ និង​មានចរិតលក្ខណៈ​វិក​ល​ចរិក​ ឬ​ Psychopath ហើយនាងតែង​ទទូចចង់​មាន​កូន​ជា​មួយ​តួ​ប្រុស​ តែ​តួ​ប្រុស​តែង​បដិ​សេធ​ជានិច្ចអំពីសេចក្តីប្រាថ្នារបស់នាង។

រូបភាពក្រៅឆាក

ចុង​ក្រោយ​ដោយ​សារ​ នាង​ជា​តួ​ស្រី​ មា​ន​ការ​ប្រច័ណ្ឌ​ខ្លាំង​ពេក​ជាមួយ​នឹង​តួ​ប្រុស​ នាង​ក៏​រៀប​ចំ​ឧបាយ​កល ​ធ្វើ​ឲ្យ​តួ​ប្រុស​ស្រវឹង​ស្រា​ ហើយ​រួម​រ័ក្ស​ជាមួយ​នាង​ ពេល​ដែល​តួ​ប្រុស​ភ្ញាក់​ឡើង​ នាង​ក៏​ចាក់​ថ្នាំ​ស្ពឺក​ ហើយ​ធ្វើ​សកម្ម​ភាព​កាត់​ប្រដាប់​ភេទ​របស់​តួ​ប្រុស​បាន​សម្រេច​ ក្នុង​គោល​បំណង​មិន​ចង់​ឲ្យ​តួ​ប្រុស​ចាក​ចេញ​ពី​នាង​ជារៀងរហូត។

The Dinner Poster

ខ្សែ​ភាព​យន្ត​ខ្លី​រយៈ​ពេល​ ១៥​ នាទី​នេះ​ ជាស្នាដៃដំបូងរបស់​យុវ​ជន​វ័យ​ ២២​ឆ្នាំ​ម្នា​ក់​ ឈ្មោះ​ថា ​នេត​ ឥន្ទន​រា​សុទ្ធី​ដេ្ឋព​ ដែល​ជា​និស្សិត​ពេទ្យ​ផ្នែក​សុខ​ភាព​សា​ធារ​ណៈ ​និង​បាន​ចំណាយ​ថវិកាផ្ទាល់​ខ្លួន​ប្រហែល​ជាង​ ៥០០ ដុល្លារអាមេរិក ដើម្បី​ផលិត​រឿង​នេះ​ឡើង​។ ផលិត​ករ​វ័យ​ក្មេ​ង​រូប​នេះ​ រំឮកថា៖ «មាន​អី​បង​ ធ្វើ​កុន​ហ្នឹង​ចប់​ស៊ី​សៀង​យូរ​ដែរហ្នឹង​ តែ​ក៏​សប្បាយ​ចិត្ត​ព្រោះ​បាន​ផលិត​រឿង​សម្រេច​ ហើយ​ទទួល​បាន​ជ័យ​លាភី​ដូច​ពេល​នេះ​។​»

រូបភាពក្រៅឆាក

ទាក់​ទង​នឹងសាច់​រឿង​ដែល​ធ្វើ​ឲ្យ​ទស្ស​និក​ជន​ដែល​ជា​បុរស​ស្រៀវ​ខ្លួន​បែប​នេះ​ ផលិត​ករ​ ឥន្ទន​រា​សុទ្ធី​ដេ្ឋព​ បន្ត​ថា​ ខ្លួន​និពន្ធ​ និង​ដឹកនាំ​សាច់​រឿង​នេះ​ឡើង​តាម​បែប​សាច់​រឿង​ចិត្ត​សាស្ត្រ​ និង​បានកាឡៃសាច់​រឿង​ពិត​ៗ​ដែល​ធ្លាប់​ឮ ​និង​អាន​ពី​សៀវ​ភៅ​ ពិសេស​តាម​រយៈ​ការ​អង្កេត​តាម​ដាន​ពី​មិត្ត​ភ័ក្រ្ត​ ដែល​តែង​និយាយ​គ្នា​លេង​អំពី​មនុស្ស​ស្រី​ពេល​ដែល​ស្រលាញ់​មនុស្ស​ប្រុស​ម្នាក់​ជ្រុល​ពេក​ ហើយ​ប្រ​ច័ណ្ឌ​នោះ​ តើ​គេ​អាច​នឹង​ហ៊ាន​កាត់​របស់​យើង​ ឬអត់​?​

រូបភាពក្រៅឆាក

ផលិត​ករ​វ័យ​ក្មេង​លោក​ នេត​ ឥន្ទន​រា​សុទ្ធី​ដេ្ឋព​ ពន្យល់​ថា​៖ ​«តាម​ពិត​ខ្ញុំ​ចូល​ចិត្ត​អង្កេត​ និង​តាម​ដាន​ពី​អ្នក​ដ​ទៃ ​ដូចនេះ​បើ​មាន​មិត្ត​ភ័ក្រ្ត​បាន​មើល​រឿង​នេះ​គេ​អាច​នឹង​ដឹង​ថា​នេះ​ជា​អ្វី​ដែល​គេ​តែង​និយាយ​»។​ យុវ​ជន​ផលិត​ករ​ និង​អ្នក​ដឹក​នាំ​រឿង​រូប​នេះ​បន្ត​ថា​ នេះ​ជា​រឿង​មួយ​ដែល​រូប​លោក​ចង់​ឲ្យ​ទស្ស​និក​ជន​ពេល​ដែល​បាន​មើល​រឿង​ហ្នឹងហើយ​ គេ​នឹង​គិត​ឡើង​វិញ​ពី​ទង្វើ​របស់​ខ្លួន​ ហើយ​ពិសេស​គេ​នឹង​និយាយពីរឿង​ហ្នឹង​ទៅ​ដល់​មិត្ត​ភ័ក្រ្ត​របស់​គេ​ពេល​ដែល​ជួប​ជុំ​គ្នា​។

នេត​ ឥន្ទន​រា​សុទ្ធី​ដេ្ឋព​ ជាផលិតករ និងអ្នកដឹកនាំវ័យ២២ឆ្នាំ ដែលធ្លាប់មានស្នាដៃផលិតវីឌីអូបទចម្រៀងឲ្យ ឡូរ៉ាម៉ម និងក្មេងខ្មែរជាដើម។ នៅក្នុងសង្គមផលិតករខ្សែភាពយន្តដូចគ្នា អ្នកនិពន្ធវ័យក្មេងរូបនេះ តែងត្រូវបានរៀមច្បង និងក្រុមផលិតល្បីៗដូច Studio 4 ជាដើមចង់ឲ្យជួយដឹកនាំរឿងខ្នាតខ្លី និងវែងរបស់ខ្លួន ដោយសារយុវជនម្នាក់នេះមិនត្រឹមតែមានលក្ខណៈលម្អិតលើការងារ និងយកចិត្តទុកនោះទេ គឺរូបគាត់មានសិល្បៈក្នុងការធ្វើឲ្យសមាជិកក្រុមស្រលាញ់រាប់អាន និងស្ម័គ្រចិត្តធ្វើការឲ្យអស់ពីចិត្ត។

លោក នេត​ ឥន្ទន​រា​សុទ្ធី​ដេ្ឋព​

លោក នេត​ ឥន្ទន​រា​សុទ្ធី​ដេ្ឋព​ បញ្ជាក់ថា៖ «ការធ្វើឲ្យសមាជិកយើង និងក្រុមការងារយើងរីករាយនឹងការងារជាកត្តាជំរុញឲ្យការផលិតរឿងជោគជ័យ ហើយខ្ញុំក៏សូមអរគុណដល់ក្រុមផលិតមែនទែន បើគ្មានពួកគាត់ជឿជាក់ និងជួយជ្រោមជ្រែងខ្ញុំទេ ម្ល៉េះក៏គ្មាន «The Dinner» ដែរ។

ជាក់ស្តែងអ្នកដឹកនាំរឿងវ័យក្មេង រូបសង្ហាម្នាក់នេះមានឱកាសជាច្រើនក្នុងការផលិតខ្សែភាពយន្តបន្តទៀតបន្ទាប់ពីទទួលបានពានរង្វាន់នេះ តែដោយសារជាប់ភារកិច្ចបំពេញការងារពេញម៉ោងនៅក្នុងអង្គការមួយកន្លែង ហើយ ឥន្ទន​រា​សុទ្ធី​ដេ្ឋព​ បានប្រាប់ថា រូបគេចង់បំពេញការងារមនុស្សធម៌ និងសិក្សារៀនសូត្រពីបញ្ហាសង្គមឲ្យបានច្រើន មុននឹងបង្ហាញខ្លួនម្តងទៀតជាមួយខ្សែភាពយន្តថ្មីសម្រាប់តំណាងឲ្យកម្ពុជាតែម្តង។

សកម្មភាពក្រៅឆាក
សកម្មភាពក្រៅឆាក

រូបភាព៖ ផ្តល់ឲ្យ

ចុចអាន

-សិល្បករ​ជំ​នាញ​ផាត់​មុខ​បែប​ភ័យ​រន្ធត់ ​លាក់​ខ្លួន​ធ្វើការ​នៅ​បាត់​ដំបង​

-ផលិតករស្រី​វ័យក្មេង ចំណាយថវិកាផ្ទាល់ខ្លួន ផលិតកុន​ខ្លីនិយាយ​ពី​ភ្លើង​ស្នេហ៍​ក្នុង​សម័យ​វាល​ពិ​ឃាត

-យី កក្កដា សិល្ប​ករ​ពហុ​ជំនាញ ចេះគូរគំនូរ២ផ្ទាំងក្នុងពេលតែមួយ មាន​ប្រវត្តិ​កំសត់​នឹក​ស្មានមិនដល់​


អត្ថបទ៖ Sunny