កសិករពិការដៃទាំងសងខាង តស៊ូមើលថែម្តាយចាស់ជរា ធ្វើឲ្យគ្រប់គ្នារំជួលចិត្ត

2017-11-21 03:38:33
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្របពេលដែលមនុស្សកាន់តែចាស់ ត្រូវឃ្លាតឆ្ងាយពីឪពុកម្ដាយកាន់តែឆ្ងាយ និងកម្រមានពេលមើលថែរក្សាពួកគាត់ បុរសជនជាតិចិន វ័យ៤៨ឆ្នាំម្នាក់ មានឈ្មោះថា Chen Xingyin មកពីទីក្រុង Chongqing បាននិយាយថា គ្មានអ្វីអាចបញ្ឈប់ខ្លួន មិនឲ្យមើលថែអ្នកម្ដាយដ៏មានគុណបានឡើយ។

ក្នុងនាមជាកូនពៅ នៃគ្រួសារដែលមានសមាជិក ៦នាក់ លោក Chen បានធ្វើចម្ការ , ចម្អិនអាហារ និង ចិញ្ចឹមពពែជាដើម។ ប៉ុន្តែលោកមិនមែនជាកសិករធម្មតានោះទេ។ ជាការពិតណាស់ លោក Chen បានបាត់បង់ដៃទាំងសងខាង នៅក្នុងឧបទ្ទវហេតុឆក់អគ្គិសនី នៅពេលមានអាយុទើបតែ ៧ឆ្នាំ ធ្វើឲ្យលោកពិបាករស់នៅ និងធ្វើការដូចមនុស្សធម្មតាណាស់។

ទោះបីជាយ៉ាងណាក៏ដោយ លោក Chen គឺជាមនុស្សដែលរហ័ស និងមានសមត្ថភាពជាងមនុស្សធម្មតាមួយចំនួនទៅទៀត។ ជីវិតរបស់កសិកររូបនេះ កាន់តែលំបាកខ្លាំង នៅពេលដែលម្ដាយអាយុ ៨៨ឆ្នាំ ចាប់ផ្ដើមកើតជំងឺរលាកទងសួត ហើយត្រូវដេកនៅតែលើគ្រែ កាលពីឆ្នាំ២០១៤។ យ៉ាងណាក៏ដោយ លោក Chen មិនបោះបង់ម្ដាយចោលឡើយ ហើយថែមទាំងមើលថែរក្សាអ្នកមានគុណ ដោយខ្លួនឯងទៀតផង។

លើសពីនេះទៅទៀត លោក Chen ធ្វើការយ៉ាងយកចិត្តទុកដាក់ទ្វេដង ដើម្បីប្រាកដថា ម្ដាយទទួលបានអ្វីគ្រប់យ៉ាង ដែលគាត់ត្រូវការ។ ក្រៅពីការមើលថែកសិដ្ឋានគ្រួសារ លោកយកចិត្តទុកដាក់ និងចិញ្ចឹមម្ដាយ ដោយគ្មានជំនួយពីនរណាម្នាក់ឡើយ។ លោកប្រើជើងដើម្បីរៀបចំ និងចម្អិនអាហារ ហើយប្រើមាត់ដើម្បីបញ្ចុកម្ដាយទៀតផង។

យ៉ាងណាមិញ អ្នកនិយមប្រើប្រាស់បណ្ដាញសង្គមម្នាក់ បានបញ្ចេញមតិកោតសរសើរចំពោះ លោក Chen ថា «ពេលខ្លះ ជើងរបស់គាត់មានប្រយោជន៍ជាងដៃរបស់ខ្ញុំទៅទៀត។ អ្វីដែលខ្ញុំគោរពចំពោះគាត់បំផុត គឺ ការប្រឹងប្រែងធ្វើយ៉ាងណាឲ្យជីវិតរបស់គាត់ល្អប្រសើរ ជាជាងការពឹងផ្អែកលើជំនួយរបស់អ្នកដទៃ»។ ចំណែកឯអ្នកខ្លះទៀត បាននិយាយថា «ខ្ញុំមានអារម្មណ៍ថាចង់យំ នៅពេលបានឃើញរូបគាត់ បញ្ចុកម្ដាយរបស់គាត់បែបនេះ»៕