Neymar ថា ជម្រើសជាតិប្រេស៊ីលដែលគ្រប់គ្នាគោរព បានត្រលប់មកវិញហើយ
- 2017-11-30 13:00:06
- ចំនួនមតិ 0 | ចំនួនចែករំលែក 0
Neymar ថា ជម្រើសជាតិប្រេស៊ីលដែលគ្រប់គ្នាគោរព បានត្រលប់មកវិញហើយ
ចន្លោះមិនឃើញ
ក្នុងកិច្ចសម្ភាសន៍ជាមួយ FIFA ហើយត្រូវបានចុះផ្សាយក្នុងថ្ងៃនេះ ខ្សែប្រយុទ្ធ Neymar បាននិយាយថា ក្រុមជម្រើសជាតិប្រេស៊ីលដែលគ្រប់គោរព បានត្រលប់មកវិញហើយ។
ពេលដែលសួរថា តើយល់ស្របទេ ដែលប្រេស៊ីលបានស្ដារឈ្មោះឡើងវិញបន្ទាប់ពីការចាញ់យ៉ាងដំណំកាលពី World Cup ២០១៤ Neymar បានតបថា៖ "ពិតណាស់ ខ្ញុំយល់ស្រប។ កេរ្តិ៍ឈ្មោះរបស់ក្រុមជម្រើសជាតិប្រេស៊ីលមានភាពខុសប្លែកកាលពី បី ឬបួនឆ្នាំមុន។ ក្រុមប្រេស៊ីលដែលគ្រប់គ្នាគោរព និងកោតសរសើរ ហើយលេងបាល់គួរឲ្យទាក់ទាញបានត្រលប់មកវិញហើយ។ ពេលដែលឃើញក្រុមលេងបានល្អអ៊ីចឹង យើងក៏សប្បាយខ្លាំងតាមហ្នឹងដែរ"។
ពេលសួរថាមានក្រុមណាទេ ដែលប្រេស៊ីលមិនចង់ជួបក្នុងវគ្គជម្រុះតាមពូល ខ្សែប្រយុទ្ធរូបនេះបានប្រាប់ FIFA ថា៖ "ទេ! ប្រេស៊ីលប្រុងប្រៀបរួចរាល់ដើម្បីលេងជាមួយក្រុមជម្រើសជាតិផ្សេងទៀត។ ពួកយើងខិតខំហ្វឹកហាត់ណាស់ ដើម្បីកុំឲ្យខ្លាចក្រុមដទៃ។ វាគឺជាព្រឹត្តិការណ៍ World Cup ដូច្នេះក្រុមល្អៗសុទ្ធតែមានវត្តមានក្នុងកម្មវិធីនេះ។ អ៊ីចឹង ប្រេស៊ីលត្រូវតែត្រៀមខ្លួនឲ្យរួចរាល់ដើម្បី World Cup"។
កាលពី World Cup ឆ្នាំ ២០១៤ នៅប្រេស៊ីល ខ្សែប្រយុទ្ធ Neymar បានបង្ហាញទម្រង់លេងយ៉ាងល្អ ក្នុងការជួយក្រុមជម្រើសជាតិខ្លួនលេងរហូតដល់វគ្គ ៨ក្រុមចុងក្រោយ មុនពេលខ្លួនត្រូវរងរបួសខ្នងក្នុងការប្រកួតនោះ ដែលប្រេស៊ីលប៉ះជាមួយកូឡុំប៊ី។ ពេលនោះ ប្រេស៊ីលឈ្នះហើយបានឡើងទៅលេងជាមួយ អាល្លឺម៉ង់ ក្នុងវគ្គពាក់កណ្ដាលផ្ដាច់ព្រ័ត្រ ប៉ុន្តែត្រូវចាញ់យ៉ាងដំណំ និងអាម៉ាស់ជាមួយនឹងលទ្ធផល ៧ ទល់នឹង ១ ក្នុងដីខ្លួនឯង។
តាំងពីពេលនោះមក ប្រេស៊ីលមានទម្រង់លេងមិនល្អទេ ហើយបានចាញ់ និងស្មើជាច្រើនប្រកួតក្នុងការប្រកួតអន្តរជាតិក្រោយៗ។ ទោះជាយ៉ាងណា ស្ថានភាពនេះបានផ្លាស់ប្ដូរ បន្ទាប់ពីលោក Tite បានមកដឹកនាំក្រុមជម្រើសជាតិនេះកាលពីខែមិថុនា ឆ្នាំ ២០១៦មក ដោយបច្ចុប្បន្នប្រេស៊ីលកំពុងបង្ហាញទម្រង់លេងបានយ៉ាងល្អ ដោយចាញ់តែម្ដងគត់ និងឈ្នះដល់ទៅ ១៣លើក ក្នុង ១៧ប្រកួតចុងក្រោយ៕