អាជ្ញាកណ្ដាល ចៅក្រមវាយកូនឃ្លីលើតុ ៨រូប ប្រឡងជាប់កម្រិតមូលដ្ឋាន និងទទួលស្គាល់ពីស្ថាប័នអន្តរជាតិ
- 2018-01-22 04:18:59
- ចំនួនមតិ 0 | ចំនួនចែករំលែក 0
អាជ្ញាកណ្ដាល ចៅក្រមវាយកូនឃ្លីលើតុ ៨រូប ប្រឡងជាប់កម្រិតមូលដ្ឋាន និងទទួលស្គាល់ពីស្ថាប័នអន្តរជាតិ
ចន្លោះមិនឃើញ
ក្នុងចំណោមសិក្ខាកាម ២៥រូប ដែលបានចូលរួមវគ្គបណ្ដុះបណ្ដាលអាជ្ញាកណ្ដាល ចៅក្រម ថ្នាក់មូលដ្ឋាន៣ថ្ងៃកន្លងទៅនេះ មាន៨នាក់ ដែលប្រឡងជាប់ និងទទួលស្គាល់ដោយសហព័ន្ធវាយកូនឃ្លីលើតុអន្តរជាតិ។
លោក ប៊ុយ សុភ័ណ្ឌ អគ្គលេខាធិការស្ដីទីសហព័ន្ធវាយកូនឃ្លីលើតុបានឲ្យដឹងថា ឆ្លងកាត់វគ្គបណ្ដុះបណ្ដាល៣ថ្ងៃកន្លងទៅនេះ មើលឃើញថាសិក្ខាកាម មានការផុលផុស និងទទួលបានចំណេះដឹងថ្មីៗច្រើន ដូចជាបទបញ្ជាផ្សេងៗដែលពួកគេមិនធ្លាប់បានដឹងពីមុនមក។ ក្រៅពីនោះសិក្ខាកាមបានសិក្សាបន្ថែមនូវកិច្ចការមួយចំនួនដែលពួកគេត្រូវយកទៅអនុវត្ត នៅពេលធ្វើជាអាជ្ញាកណ្ដាល និងចៅក្រមនានានៅពេលរៀបចំការប្រកួតខាងមុខ។
អគ្គលេខាធិការខាងលើបន្ថែមទៀតថា នេះជាជំហានមួយសម្រាប់អាជ្ញាកណ្ដាល ចៅក្រមទាំងអស់បានពង្រឹងចំណេះដឹងថែមទៀត ហើយនៅខែមិនាខាងមុខនេះ សហព័ន្ធគ្រោងនឹងបើកវគ្គបណ្ដុះបណ្ដាលជាថ្មីម្ដងទៀត។ បន្ទាប់ពីបញ្ចប់វគ្គបណ្ដុះបណ្ដាលលើកទី២រួច សហព័ន្ធវាយកូនឃ្លីលើតុកម្ពុជានឹងស្នើសុំទៅសហព័ន្ធវាយកូនឃ្លីអន្តរជាតិ ដើម្បីធ្វើការប្រឡងនៅកម្ពុជាហើយប្រសិនពួកគេប្រឡងជាប់នោះ នឹងក្លាយជាចៅក្រម អាជ្ញាកណ្ដាលអន្តរជាតិតែម្ដង និងអាចចូលរួមក្នុងព្រឹត្តិការណ៍អន្តរជាតិដូចជា ស៊ីហ្គេម ជាដើមផងដែរ។
វគ្គបណ្ដុះបណ្ដាលចៅក្រម អាជ្ញាកណ្ដាលកម្រិតមូលដ្ឋាននេះប្រព្រឹត្តិទៅរយៈពេល៣ថ្ងៃគឺចាប់ពីថ្ងៃទី១៩ ដល់ ២១ ខែមករា ឆ្នាំ២០១៨ នៅ NOCC ដែលមានសិក្ខាកាម ២៥នាក់ សុទ្ធជាចៅក្រម អាជ្ញាកណ្ដាលថ្នាក់ជាតិ និងអតីតកីឡាករផងដែរ។ វគ្គបណ្ដុះបណ្ដាលនេះក៏បានគ្រូឧបទេសកម្រិតអន្តរជាតិមកពីប្រទេសហ្វីលីពីនទៀតផង៕
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
