ពិតជាផ្អែមល្ហែមខ្លាំង! Justin Timberlake ថាអាល់ប៊ុមថ្មីជាសំបុត្រស្នេហាទៅកាន់ភរិយា

2018-02-02 09:23:39
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀងនិងសម្ដែង Justin Timberlake ទើបតែបញ្ចេញអាល់ប៊ុមទី៥របស់ខ្លួន ចំណងជើងថា "Man Of The Woods” នៅថ្ងៃទី២ ខែកុម្ភៈនេះ។

ក្នុងឱកាសចូលរួមកម្មវិធី សម្ភាសជាមួយប៉ុស្តិ៍វិទ្យុ Zane Lowe on Beats 1 ម្ចាស់បទ "Mirror” វ័យ ៣៦ឆ្នាំនេះមិនអាចឈប់រំលឹកពីប្រពន្ធខ្លួនតារាសម្ដែង Jessica Biel និងកូនប្រុសអាយុ ២ឆ្នាំរបស់ខ្លួន Silas ដែលជាកត្តាជំរុញទឹកចិត្តខ្លួនឲ្យផលិតអាល់ប៊ុមនេះបានសម្រេច។

តារាចម្រៀងសញ្ជាតិអាមេរិករូបនេះ ក៏ជាតារាដែលនឹងសម្ដែងនៅក្នុងកម្មវិធីប្រកួតកីឡា បាល់ឱបដ៏ធំមួយគឺ Super Bowl នៅថ្ងៃអាទិត្យចុងសប្ដាហ៍នេះ បានសារភាពថាបទចម្រៀង "Montana” នៅក្នុងអាល់ប៊ុមថ្មីនេះ រំឭកពីការសុំរៀបការរបស់ខ្លួនទៅកាន់ភរិយា Jessica Biel។

Justin នៅក្នុងកម្មវិធីវិទ្យុ Zane Lowe on Beats 1

Justin និងភរិយា Jessica Biel

ហើយថ្មីៗនេះ Justin ទើបតែបញ្ចេញវីដេអូចម្រៀងថ្មីចំណងជើងដូចអាល់ប៊ុម "Man of the Woods” ចូលរួមសម្ដែងជាមួយភរិយារបស់ខ្លួន បង្ហាញពីចំណងស្នេហាដ៏ជិតស្និទ្ធរបស់ពួកគេ។

Justin បានថ្លែងនៅក្នុងកម្មវិធីសន្និសីទ Superbowl's Pepsi Half Time កាលពីថ្ងៃព្រហស្បតិ៍ថា ខ្លួនពិតជាសប្បាយរីករាយក្នុងការផលិតអាល់ប៊ុមថ្មីនេះ ដោយសហការជាមួយភរិយាខ្លួន។ តារារូបនេះបានបញ្ជាក់ថា៖ "នៅពេលដែលខ្ញុំធ្វើការជាមួយប្រពន្ធខ្ញុំ ការងារទាំងនោះគឺវាពិតជាងាយស្រួលច្រើន ពួកយើងអាចនឹងធ្វើការរួមគ្នាជាមួយគម្រោងផ្សេងៗទៀត ជាច្រើន"។

Justin បន្តថា៖ "ខ្ញុំគ្រាន់តែចង់បង្ហាញភាពស្មោះត្រង់នៅក្នុងអាល់ប៊ុមនេះ ហើយមានបទចម្រៀងនិងវីដេអូខ្លះៗ ត្រូវការខ្ញុំឲ្យសម្ដែងឲ្យបានល្អខ្លាំង ប៉ុន្តែក្នុងនោះមានបទចម្រៀងមួយ ដែលបាននិពន្ធនិងរៀបរាប់ជាពិសេសសម្រាប់ភរិយាខ្ញុំតែម្ដង"៕