ចិនមានមហិច្ឆតាធំ គ្រោងសង់ផ្លូវឆ្លងកាត់សមុទ្រ សម្រាប់ទីក្រុងទំហំធំជាង London ៣៥ដង

2018-05-01 04:00:32
ចំនួនមតិ 0 | ចំនួនចែករំលែក 0

ចន្លោះមិនឃើញ

ចិន បានរៀបចំគម្រោងសាងសង់ផ្លូវឆ្លងកាត់សមុទ្រសម្រាប់ទីក្រុងដ៏ធំមួយ ដែលមានប្រជាជនជាង ១០០ លាននាក់។ គម្រោងដែលចំណាយប្រាក់ ៥០ ពាន់លានយ័ន (ប្រហែល ៧,៨ ពាន់លានដុល្លារ) នេះក៏រួមបញ្ចូលទាំង ស្ពាន និង កោះសិប្បនិម្មិត ដែលស្ថិតនៅលើទន្លេ Zhujiang River Estuary។

ផ្លូវឆ្លងកាត់សមុទ្រនោះនឹងតភ្ជាប់ទីក្រុង Zhongshan និង Shenzhen ក្បែរទីក្រុង Hong Kong និង Macau។ វាត្រូវបានគេគ្រោងនឹងប្រើសម្រាប់តំបន់ឆកសមុទ្រ Guangdong-Hong Kong-Macao Bay Area ដែលមានទំហំធំជាងទីក្រុង London ៣៥ ដង ឬ ធំជាងទីក្រុង New York City ដល់ទៅ ៧១ដង។

គម្រោងនេះដែរត្រូវបានគេឲ្យឈ្មោះថា Shenzhong Channel មានប្រវែង ២៤គីឡូម៉ែត្រជាមួយនឹងសំណង់ទាំងនៅខាងលើ និងក្រោមទឹក។

យោងតាមទីភ្នាក់ងារសារព័ត៌មានចិន Xinhua បានឲ្យដឹងថា សំណង់នៃស្ពាននឹងចាប់ផ្តើមធ្វើឡើងនាខែកញ្ញា ខណៈសំណង់នៃកោះសិប្បនិម្មិតបានចាប់ផ្តើមដំណើរការរួចទៅហើយ។ គម្រោងទាំងមូលត្រូវបានគេកំណត់ថ្ងៃបើកឲ្យដំណើរការ ក្នុងឆ្នាំ២០២៤ ខាងមុខ។

គួរបញ្ជាក់ថា គម្រោង Shenzhong Channel អាចកាត់បន្ថយរយៈពេលធ្វើដំណើររវាងទីក្រុង Zhongshan និង Shenzhen ពីរយៈពេល ២ម៉ោង មកត្រឹមតែ ៣០នាទីប៉ុណ្ណោះ៕