កូនប្រុសបើមាន៧យ៉ាងនេះ ចង់បានប្រពន្ធលំដាប់ណា ក៏ម៉ែឪមិនខ្លាចចូលដណ្ដឹងដែរ

2018-05-06 01:41:38
ចំនួនមតិ 0 | ចំនួនចែករំលែក 0

ចន្លោះមិនឃើញ

មានកូនប្រុសស្រី ប្រកបដោយគន្លងធម៌ ជាក្ដីប្រាថ្នារបស់ឪពុកម្ដាយគ្រប់រូប និងជួយលើកស្ទួយមុខមាត់គ្រួសារ ទោះមិនមានទ្រព្យសម្បត្តិច្រើនក៏ដោយ។ និយាយពីកូនប្រុសវិញ បើមាន៧យ៉ាងដូចខាងក្រោមនេះ ឪពុកម្ដាយនឹងមានមោទកភាពបំផុត ហើយបើដល់ពេលត្រូវរៀបការក៏លោកទាំងពីរមិនខ្លាចចូលស្ដីដណ្ដឹងដែរ ទោះខាងស្រីលំដាប់ណាក៏ដោយ។

១. អត់ដែលមានប្រវត្តិខូចខិលស្រីញី បងធំបងតូច

មានកូនប្រុសក្នុងគ្រួសារ អ្វីដែលឪពុកម្ដាយគ្រប់រូប តែងព្រួយបារម្ភបំផុត គឺខ្លាចដើរផ្លូវមិនល្អល្បែងស្រាស្រី បងធំ បងតូចនេះហើយ។ ឪពុកម្ដាយ ដែលមានកូនប្រុសដើរដោយគន្លងធម៌ ក្នុងសម័យកាលយុវវ័យកំពុងឈ្លក់វង្វេងការកម្សាន្តសប្បាយ គឺចាត់ទុកថាមានគ្រាប់ពេជ្រក្នុងគ្រួសារដូច្នោះដែរ។ ប្រុសពិតប្រាកដមិនមែន ទាល់តែចេះរឿងស្រី ស្រា ល្បែងនោះទេ តែភាពជាកូនប្រុស គឺជាជំហរដ៏រឹងមាំសម្រាប់គ្រួសារ ប្រកបដោយគន្លងធម៌ទៅវិញទេ។

រូបតំណាង

**២. មិនដែលបង្កបញ្ហាដល់គ្រួសារ មានតែចម្រុងចម្រើន**

គ្មានឪពុកម្ដាយឯណានៅលើលោកនេះ ចង់ឃើញកូននៅប៉ុស្តិ៍ប៉ូលិសនោះទេ ហើយក៏គ្មានឪពុកម្ដាយឯណា ចង់ជេរថាស្ដីពាក្យមិនល្អដាក់កូនដែរ។ ដូច្នេះហើយសូមជៀសឲ្យឆ្ងាយ ពីមនុស្សមិនល្អក្នុងសង្គម ជៀសឲ្យបានដាច់ខាតពីគ្រឿងញៀន។ អ្វីដែលគួរធ្វើគឺ ការស្រវាប្រទាញការរៀនសូត្រ ការសេពគប់មនុស្សល្អៗ ធ្វើជាពលរដ្ឋល្អ កូនល្អក្នុងគ្រួសារ។ នោះហើយជាអ្វីដែលឪពុកម្ដាយគ្រប់រូបប្រាថ្នាចង់បាន។

៣. អត្តចរិតថ្លៃថ្នូរ ដេកដើរ ឈរ អង្គុយ មានសីលធម៌

ដូចពាក្យចាស់តែងនិយាយថា ទោះមានចំណេះដឹងខ្ពង់ខ្ពស់ប៉ុណ្ណា បើគ្មានសីលធម៌ក្នុងការរស់នៅក៏មិនមានតម្លៃដែរ។ ភាពជាបុរសមិនមែនទាល់និយាយខ្លាំងៗ ច្រងេងច្រងាងនោះទេ។ សម្ដីសំដៅមានវគ្គមានឃ្លាមានអត្ថន័យ សុភាពរាបសា ចេះឱនលំទោន ដឹងខ្ពស់ទាប ទើបស័ក្ដិសមជាកូនប្រុស។ កូនប្រុសមានលក្ខណៈបែបនេះ ទោះទៅដល់ទីណាក៏តែងតែលើកមុខមាត់ ឪពុកម្ដាយជានិច្ច។

៤. ចំណេះដឹង ចំណេះធ្វើ គោលដៅ ដើរទន្ទឹមគ្នា

មានចំណេះដឹងតែម្យ៉ាងក៏មិនទាន់គ្រប់គ្រាន់ដែរ តែត្រូវចេះប្រើចំណេះដឹងទាំងនោះ ដោយវិធីណា ដើម្បីឲ្យជីវិតរស់បានសុខស្រួល ទើបចំណេះដឹងនោះមានតម្លៃ។ ទន្ទឹមនឹងនោះដែរ ក៏ត្រូវមានគោលដៅឲ្យច្បាស់លាស់ ទើបអាចអូសទាញចំណេះដឹងដែលមាន ឆ្ពោះទៅរកភាពជោគជ័យបាន។ ទាំង៣យ៉ាងនេះ មិនអាចខ្វះមួយណាបានឡើយ ក្នុងដំណើរឆ្ពោះទៅរកអនាគតដ៏ល្អ។

រូបតំណាង

៥. ភាពរឹងមាំផ្នែកផ្លូវចិត្តស័ក្ដិសមជាកូនប្រុស

រាងកាយស្រស់សង្ហា រឹងមាំ ជាផ្នែកខាងក្រៅ ដើម្បីបង្កើនភាពទាក់ទាញរបស់បុរសមួយផ្នែក។ ប៉ុន្តែអ្វីដែលសំខាន់ជាងរូបរាងទៀត គឺផ្លូវចិត្តដ៏រឹងមាំ មានគោលជំហរច្បាស់លាស់ មិនងាយចុះចាញ់ ឬមិនឡេះឡោះអត់ប្រយោជន៍។ ជាកូនប្រុសអ្វីដែលសំខាន់បំផុត គឺការតាំងចិត្តខ្ពស់ ជឿជាក់លើខ្លួនឯង មិនស្រវានេះបន្តិចនោះបន្តិចឡើយ។ ទាំងនេះហើយ ទើបទៅថ្ងៃអនាគតអាចបង្កើតគ្រួសារមួយបាន ដូចជាឪពុកដែរ។

៦. មានប្រភពចំណូលច្បាស់លាស់

ឪពុកម្ដាយ បានត្រឹមបណ្ដុះកូនឲ្យមានចំណេះដឹង តាមរយៈចំណាយលុយបញ្ជូនកូនទៅសាលា។ បន្ទាប់មកទៀតគឺជាទំនួលខុសត្រូវរបស់ខ្លួនឯង ក្នុងការត្រួសត្រាយផ្លូវដើរ ស្វែងរកការងារដែលស័ក្ដិសមនឹងចំណេះដឹង ហើយមានស្ថិរភាព។ បើទៅថ្ងៃមុខចង់បានភរិយា អ្វីដែលគ្រួសារខាងស្រីចង់ដឹងបំផុត គឺប្រភពចំណូលនេះហើយ តើអាចបង្កើតគ្រួសារមួយបានទេ ចិញ្ចឹមកូនស្រីគេបានដែរឬអត់?

៧. ការចេះកំណត់ដៃគូជីវិតដោយមានផែនការច្បាស់លាស់

ឪពុកម្ដាយនឹងមានមោទកភាពបំផុត ប្រសិនបើកូនប្រុស ចេះគិតគូរពីបញ្ហានេះ។ ត្រូវចេះសម្លឹងនារីណាដែលស័ក្ដិសមនឹងខ្លួន នារីដែលអាចរួមដំណើរវែងឆ្ងាយជាមួយគ្នាបាន ហើយស្រលាញ់នាងពិតប្រាកដ និងដឹកដៃនាងចូលរោងការ។ កុំព្យាយាមបង្ករបួសបេះដូងដល់នារី ដែលគ្មានបំណងនឹងរៀបការជាមួយនាង។ ចំណុចដែលសំខាន់បំផុតនោះ គឺការរៀបការដែលមានផែនការច្បាស់លាស់ ការកំណត់គោលដៅ និងអនាគតដ៏វែងឆ្ងាយ៕