សមាគមជនជាតិជប៉ុននៅកម្ពុជា ស្រាយបំភ្លឺការចុះផ្សាយខុសការពិតពីបុរសជប៉ុនម្នាក់ដែលត្រូវគេឆក់អស់ពីខ្លួន
- 2021-02-14 04:10:56
- ចំនួនមតិ 0 | ចំនួនចែករំលែក 0
សមាគមជនជាតិជប៉ុននៅកម្ពុជា ស្រាយបំភ្លឺការចុះផ្សាយខុសការពិតពីបុរសជប៉ុនម្នាក់ដែលត្រូវគេឆក់អស់ពីខ្លួន
ចន្លោះមិនឃើញ
សេចក្ដីកែតម្រូវ អត្ថបទចុះផ្សាយថ្ងៃ១៤ កុម្ភៈ ដែលមានចំណងជើងថា៖ ជួយគាត់ផង! បុរសជប៉ុនម្នាក់ត្រូវចោរឆក់អស់ពីខ្លួន ធ្លាក់ខ្លួនរើសអេតចាយ គេងក្បែរបន្ទប់ទឹកវត្តបុទុម
កាលពីថ្ងៃទី១៤ ខែកុម្ភៈ មានការចុះផ្សាយពីបុរសជនជាតិជប៉ុនម្នាក់ ដែលបានធ្លាក់ខ្លួនដើររើសអេតចាយនៅរាជធានីភ្នំពេញ យប់ឡើងគេងក្បែរបន្ទប់ទឹកវត្តបុទុម ព្រោះត្រូវចោរលួចកាបូបលុយ និងលិខិតឆ្លងដែនទៅអស់ហើយ។
តាមរយៈសមាគមន៍ជនជាតិជប៉ុននៅកម្ពុជា យើងសូមកែតម្រូវអត្ថបទនេះ ដែលមានខ្លឹមសារដូចខាងក្រោម៖
លោក កូអុិជិ តាគូម៉ា ប្រធានសមាគមជនជាតិជប៉ុននៅកម្ពុជា បានឲ្យដឹងថា ប្អូនប្រុសបង្កើតរបស់បុរសឈ្មោះគូបូតា ហ្គែន ដែលកំពុងរស់នៅប្រទេសជប៉ុន បានផ្ញើថវិកាមកកាន់ស្ថានទូតជប៉ុនប្រចាំកម្ពុជា ដើម្បីឲ្យស្ថានទូតធ្វើអន្តរាគមន៍ជួយទិញសំបុត្រយន្តហោះឲ្យចំនួន ១លើក ព្រមទាំងមានសប្បុរសជនជនជាតិជប៉ុនរស់នៅកម្ពុជា ជួយឧបត្ថម្ភ និងបរិច្ចាគជាសំបុត្រយន្តហោះចំនួន ១លើកទៀត ដើម្បីឲ្យលោកគូបូតា បានវិលត្រឡប់ទៅកាន់ប្រទេសជប៉ុនវិញ។ រួមសេចក្ដីមក យ៉ាងហោចណាស់ ក៏មានការជួយឧបត្ថម្ភ និងបរិច្ចាគចំនួន ២លើក ក្នុងការទិញសំបុត្រយន្តហោះ ដើម្បីឲ្យលោកគូបូតា បានវិលត្រឡប់ទៅកាន់ប្រទេសជប៉ុនវិញ។ លើសពីនេះទៀត លោកគូបូតា ក៏បានទទួលការឧបត្ថម្ភគាំទៃ្រផ្នែកហិរញ្ញវត្ថុផ្សេងទៀតផងដែរ។
រូបលោក គូបូតា ផ្ទាល់ក៏បានបញ្ជាក់យ៉ាងច្បាស់លាស់ថា រូបលោកពិតជាបានទទួលការឧបត្ថម្ភគាំទ្រនានាពីខាងស្ថានទូត។ ព័ត៌មានដែលខាងសមាគមទទួលបានពីរូបលោកគូបូតា ហ្គែន ដោយផ្ទាល់ តាមរយៈការសាកសួរអំពីអង្គហេតុ និងរឿងរ៉ាវរបស់សាមីខ្លួនលោកគូបូតា ដោយការសាកសួរនេះធ្វើឡើងដោយសមាគមជនជាតិជប៉ុននៅកម្ពុជា រួមជាមួយវត្តមាននៃមេធាវី ដែលជាទីប្រឹក្សានៃសមាគមជនជាតិជប៉ុននៅកម្ពុជា។
បច្ចុប្បន្ន លោក គូបូតា កំពុងស្ថិតក្រោមការឃុំខ្លួនរបស់ប៉ូលិស។ ទោះជាយ៉ាងណាក៏ដោយ រូបលោកនឹងត្រូវនិរទេសវិលត្រឡប់ទៅកាន់ប្រទេសជប៉ុនវិញ នៅពេលដែលការរៀបចំចាំបាច់នានាសម្រាប់ការចាកចេញពីប្រទេសកម្ពុជា ត្រូវបានបញ្ចប់រួចរាល់សព្វគ្រប់។ គួរបញ្ជាក់ថា សំបុត្រយន្តហោះលើកនេះ ក៏នឹងត្រូវបានបរិច្ចាគដោយប្រជាជនជប៉ុនផងដែរ។
ខ្លឹមសារនៃអត្ថបទ និងមតិយោបល់ដែលបានលើកឡើងថា ស្ថានទូតជប៉ុនប្រចាំកម្ពុជា និងសហគមន៍ជនជាតិជប៉ុនដែលកំពុងស្នាក់នៅក្នុងប្រទេសកម្ពុជា មិនបានជួយឧបត្ថម្ភ និងគាំទ្រលោកគូបូតា ហ្គែន ដែលកំពុងប្រឈមមុខនឹងភាពខ្វះខាត គឺជារឿងដែលប្រាសចាកការពិត។
សមាគមន៍ជនជាតិជប៉ុនប្រចាំកម្ពុជា សូមសម្ដែងនូវអំណរគុណអនេកប្បការ និងសូមខន្តីអភ័យទោសផងដែរ ចំពោះប្រជាជនកម្ពុជាជាច្រើនដែលមានការព្រួយបារម្ភ៕