ខ្វះអីជ័យជម្នះ ឲ្យតែព្យាយាមហ្វឹកហាត់

2014-11-25 23:06:32
ចំនួនមតិ 0 | ចំនួនចែករំលែក 0

ចន្លោះមិនឃើញ

"ព្យាយាមគង់បានសម្រេច" ពិតជាត្រឹមត្រូវណាស់! អ្វីៗគ្រប់យ៉ាង ឲ្យតែយើងមានចិត្តស្រលាញ់ចូលចិត្តចង់ធ្វើ ហើយតែងតែព្យាយាមធ្វើដើម្បីវា នោះគោលបំណងនឹងបានសម្រេចនៅថ្ងៃណាមួយជាមិនខាន។

អាន៖ រកឃើញហើយ ជើងខ្លាំងកីឡា AK Online និងAge of Naga ប្រចាំប្រទេសកម្ពុជា ២០១៤

ជាក់ស្ដែង ដូចជាជើងខ្លាំងវ័យក្មេងក្រុម Secret តំណាងខេត្តបាត់ដំបងអីចឹង កាលពីថ្ងៃអាទិត្យកន្លងទៅក្នុងព្រឹត្តិការណ៍ប្រកួតស្វែងរកជើងខ្លាំង AK ប្រចាំប្រទេសកម្ពុជាក្នុងឆ្នាំ ២០១៤ ពួកគេបានសម្រេចក្ដីសុបិនចំនួន ២ ក្នុងពេលតែមួយគឺក្ដីសង្ឃឹមក្នុងការបំបាក់ សងសឹកយកជ័យជម្នះលើក្រុម NeverCare ជើងខ្លាំងល្បីពេញប្រទេសកម្ពុជា ដែលធ្លាប់បំបាក់ក្រុមពួកគេ ៣ ដង និងក្ដីបំណងធំមួយទៀតគឺ ធ្វើជាជើងខ្លាំង AK តំណាងប្រទេសកម្ពុជាទៅចូលរួមប្រកួតបន្តទៀតនៅលើឆាក E-Sports អន្តរជាតិ MATIC ពីការព្យាយាមប្រឹងប្រែងហ្វឹកហាត់ បង្កើតយុទ្ធសាស្ត្រថ្មីៗ និងស្វែងយល់ពីចំណុចខ្លាំង រួមទាំងចំណុចខ្សោយរបស់គូប្រកួត និងក្រុម Secret ផ្ទាល់ជាដើម។

មុនដំណើរត្រលប់ទៅខេត្តបាត់ដំបងវិញ Mutan ប្រធានក្រុម Secret បាននិយាយថា៖ "ខ្ញុំពិតជារំភើបនឹងលទ្ធផលដ៏ល្អនេះណាស់បង ហើយខ្ញុំពិតជាអរគុណដល់សមាជិកក្រុម Secret ទាំងមូលណាស់ដែលបានសហការគ្នាបានយ៉ាងល្អគ្រប់ការប្រកួតក្នុងព្រឹត្តិការណ៍ CCC Final"។

អាន៖ ឱកាសមាសចូលរួមប្រកួត MATIC 2015 នៅប្រទេសចិនពីការកុង Clan

Mutan បន្ថែមទៀតថា៖ "មុននឹងទទួលបានលទ្ធផលដ៏ល្អនេះ ពួកខ្ញុំ Secret បានចំណាយពេលហ្វឹកហាត់ជាច្រើនរាល់ពេលទំនេររបស់ពួកខ្ញុំ។ រាល់ការប្រកួតនៅតាមខេត្តផ្សេងៗ Secret តែងតែទស្សនាការប្រកួតរបស់ក្រុមនីមួយៗតាមរយៈ LiveStram របស់ Sabaytv (មានពេលខ្លះមើលមិនទាន់ក៏បើក Replay មើលទៀត) ហើយព្យាយាមរកមើលចំណុចខ្លាំងរបស់ពួកគេដើម្បីរៀនតាម ក៏ដូចជាស្វែងរកគន្លឹះយុទ្ធសាស្ត្រថ្មីមកបំបែក ខណៈចំណុចខ្សោយរបស់ពួកគេបានក្លាយជាបទពិសោធន៍សម្រាប់ពួកខ្ញុំមិនគួរធ្វើតាម"។

ជាចុងក្រោយ Mutan ក៏បានផ្ញើសារប្រាប់ដល់អ្នកកម្សាន្ត AK ដទៃទៀតដែរថា៖ "សម្រាប់អ្នកកម្សាន្ត AK ដទៃទៀត ក៏មានឱកាសធ្វើជាតំណាងប្រទេសកម្ពុជាចូលរួមប្រកួត MATIC និងបំបាក់ក្រុមខ្លាំងៗផងដែរ ឲ្យតែយើងមានឆន្ទ និងព្យាយាមហ្វឹកហាត់ ស្វែងយល់ពីគន្លឹះនៃការកម្សាន្ត ក៏ដូចជាចំណុចពិសេសនៃសព្វាវុធ និងសមរភូមិប្រយុទ្ធនីមួយៗ មិនថាក្រុមដទៃមានសមត្ថភាពប្រយុទ្ធខ្លាំងប៉ុណ្ណាទេ ខ្ញុំជឿជាក់ថាថ្ងៃណាមួយអ្នកទាំងអស់គ្នានឹងអាចធ្វើបានដូចពួកខ្ញុំអីចឹង"។

អាន៖ NeverCare ប៊ិះខ្ចប់ក្រោមថ្វីដៃអ្នកលេងឆ្លងខេត្ត StandarD

ពិតជាត្រឹមត្រូវណាស់! ការហ្វឹកហាត់ច្រើនពិតជាអាចជួយឲ្យអ្នកកម្សាន្តមានសមត្ថភាពកើនខ្លាំងជាងមុនដោយមិនដឹងខ្លួនផងដែរ។ ជាតួយ៉ាង ដូចលទ្ធផលនៅក្នុងការប្រកួតចុងសប្ដាហ៍កន្លងទៅចឹង ក្រុមខ្លាំងដែលមិនដែលស្គាល់ពាក្យថាចាញ់នៅឆ្នាំមុន YouWillKnow ត្រូវធ្លាក់ត្រឹមវគ្គ ៨ ក្រុមចុងក្រោយនៃព្រឹត្តិការណ៍ CCC ភ្នំពេញ មិនអាចទទួលសូម្បីឱកាសការពារតំណែងជើងឯកចាស់ ខណៈក្រុម NeverCare ជាប់ជាជើងខ្លាំងតំណាងប្រទេសកម្ពុជាទាំងប្រផុតប្រផើយភ័យបុកពោះបំផុត ខុសពីឆ្នាំមុនដែលជើងខ្លាំងទាំង ២ នេះទទួលបានកៅអីចូលរួមប្រកួតក្នុងព្រឹត្តិការណ៍ MATIC ទាំងមិនសូវមានការពិបាកឡើយ។