គ្រិច ឧទ្ទិសជ័យជម្នះលើអង់គ្លេសទៅឲ្យ Baldock ដែលបានទទួលមរណភាពថ្មីនេះ

2024-10-11 00:05:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមបាល់ទាត់ជម្រើសជាតិ គ្រិច ទាំងអស់បានធ្វើការឧទ្ទិសជ័យជម្នះដែលពួកគេទទួលបានលើក្រុមជម្រើសជាតិអង់គ្លេស ២-១ ក្នុងការប្រកួត UEFA Nations League ទៅឲ្យអតីតខ្សែការពាររបស់ខ្លួន Baldock ដែលទើបតែទទួលមរណភាពកាលពីពេលថ្មីៗនេះ។

អ្នកដែលរកបានគ្រាប់បាល់ Vangelis Pavlidis បាននិយាយថា «ជ័យជម្នះទាំងអស់នេះគឺសម្រាប់មិត្តរួមក្រុមរបស់ខ្ញុំ George Baldock ដែលបានទទួលមរណភាពម្សិលមិញនេះ»។ Vangelis Pavlidis ជាអ្នកដែលរកបានគ្រាប់បាល់ជ័យជម្នះរបស់ គ្រិច នៅចុងម៉ោងដែលបញ្ចប់ទៅ២-១ ទៅលើក្រុមអង់គ្លេស។

ក្នុងការប្រកួតមុនពេលចាប់ផ្ដើមគ្រប់គ្នាទាំងអស់បានធ្វើការស្មិងស្មាធិ៍ចំនួន១នាទីផងដែរដើម្បីជាការគោរពដល់វិញ្ញាណក្ខន្ធអ្នកដែលបានស្លាប់។ Pavlidis ក៏បានចាប់យកលេខអាវដែល Baldok ធ្លាប់ពាក់កាលនៅរស់គឺលេខ២មកអបអរភ្លាមៗក្រោយពេលដែលគេរកបានគ្រាប់បាល់។

ខ្សែប្រយុទ្ធរូបនេះបាននិយាយទៀតថា «វាជាការប្រកួតមួយដ៏សំខាន់ខ្លាំងមែនទែន សម្រាប់ក្រុមជម្រើសជាតិ គ្រិច ទាំងមូល ព្រោះតែទាំងនេះគឺយើងធ្វើវាដើម្បី George ហើយវាពិតណាស់យើងផ្ដល់ជ័យជម្នះទាំងនេះទៅកាន់គេ និងគ្រួសាររបស់គេ។ យើងបាននិយាយគ្នាថាយើងលេងការប្រកួតនេះដើម្បីគេ (George Baldock )។ បាទពិតណាស់គ្មានអ្វីសំខាន់ជាងនេះទៀតទេ ហើយគ្រាប់បាល់ដែលខ្ញុំរកបានក៏សម្រាប់តែគេដែរ គ្រប់គ្នាចង់លេងការប្រកួតនេះដើម្បីគេ»។

សូមបញ្ជាក់ថា ខ្សែការពារជម្រើសជាតិ គ្រិច George Baldock បានទទួលមរណភាពនៅអាយុ៣១ឆ្នាំកាលពីល្ងាចថ្ងៃពុធ នៅអាងហែលទឹករបស់គេនៅ Glyfada ភាគខាងត្បូងនៃទីក្រុង អាតែន ប្រទេសគ្រិច៕