Caylee កូនខ្មែរអាមេរិកលេចធ្លោនិងជាប់ពានដឹកនាំរឿងឆ្នើមនៅ អាមេរិក
- 2015-01-06 16:49:36
- ចំនួនមតិ 0 | ចំនួនចែករំលែក 0
Caylee កូនខ្មែរអាមេរិកលេចធ្លោនិងជាប់ពានដឹកនាំរឿងឆ្នើមនៅ អាមេរិក
ចន្លោះមិនឃើញ
១៩៨១គឺ២ឆ្នាំក្រោយការដួលរំលំរបប ប៉ុល ពត កុមារីម្នាក់ បានចាប់កំណើតឡើងនៅ ជំរំភៀសខ្លួន ខៅអ៊ីដាង ទឹកដីថៃ មុនពេលគ្រួសារនាងត្រូវគេជម្លៀសទៅកាន់រដ្ឋ Virginia សហរដ្ឋអាមេរិកជាមួយពលរដ្ឋកម្ពុជា រួចជីវិតពីរបបអាវខ្មៅជាច្រើនទៀតក្នុងឆ្នាំ១៩៨៤។
ជាង៣០ឆ្នាំក្រោយរសាត់ពីមាតុភូមិឥលូវ Caylee So មិនត្រឹមចាស់ទុំទេ តែស្ត្រីដើមកំណើតខ្មែរធំធាត់នៅអាមេរិករូបនេះ កំពុងលេចធ្លោដោយការបញ្ចប់ការសិក្សាជាន់ខ្ពស់ជំនាញដឹកនាំនិងផលិតភាពយន្តពីមហាវិទ្យាល័យ Dodge College of Film and Media Arts នៃសកលវិទ្យាល័យ Chapman រដ្ឋកាលីហ្វ័រញ៉ា។ អ្វីដែលទាញការចាប់អារម្មណ៍បំផុតរបស់ស្ត្រីខ្មែរអាមេរិកគឺស្នាដៃរឿងខ្លី « Paulina» កាល២០១២ដែលនាងដឹកនាំផលិតឡើង បាននាំឲ្យនាងឈ្នះពានអ្នកផលិតរឿងល្អបំផុត Best Student Female Director នៅ Director’s Guild of America ដែលមានភាពយន្តជាង៦ពាន់រឿង របស់បណ្ដាអ្នកផលិតភាពយន្តវ័យក្មេងទូទាំងអាមេរិកដាក់ប្រកួតប្រជែង។
នាងក៏ជាសិស្សស្រីឆ្នើមប្រចាំសកលវិទ្យាល័យ។ នៅឆ្នាំ២០១២ Caylee ដែលអាចនិយាយភាសាខ្មែរបានខ្លះៗ ជាសិស្សលេចធ្លោជាប់ពានរង្វាន់ពីរ គឺពានអ្នកដឹកនាំរឿងល្អផ្ដាច់គេ (Best Director) និងពាន ចាប់រូបភាពឆ្នើម (Best Picture) ប្រចាំព្រឹត្តិការណ៍ពានប្រចាំឆ្នាំរបស់មហាវិទ្យាល័យភាពយន្ត Dogde College of Media and Arts។
ក្នុងបទសម្ភាសមក Sabay ឱកាសមកកម្ពុជាពេលនេះ កូនខ្មែរអាមេរិកខាងលើរៀបរាប់ដើមទងថាក្រោយចប់ការសិក្សាវិទ្យាល័យវ័យ១៨ឆ្នាំអំឡុង២០០០ នាងបានចំណាយពេល៨ឆ្នាំចូលជាទាហានអាមេរិក ក្នុងកងឆ្មាំជាតិរដ្ឋ Virginia មុនពេលចាប់ផ្ដើមសិក្សាការផលិតភាពយន្តនៅសាកលវិទ្យាល័យ Chapman។ «ពេលខ្ញុំអាយុ១៨ចប់ វិទ្យាល័យ ខ្ញុំគិតមិនទាន់ដឹងថាត្រូវធ្វើអី។ ខ្ញុំនៅកន្លែងដដែលៗមិនដឹងថាធ្វើអ្វី ហើយកាលនៅរៀនឃើញទាហានមួយមកសាលានិយាយប្រាប់យើងថា ធ្វើទាហាន២ថ្ងៃក្នុងមួយខែ យើងអាចធ្វើអង្គរក្សបាន។ ធ្វើទាហាន ខ្ញុំអាចទិញឡានបាន អាចរៀនអីក៏បាន ខ្ញុំក៏ចង់ធ្វើទាហាន»។ Caylee រៀបរាប់។
ក្នុងកាតព្វកិច្ចនេះ Caylee បានបំពេញបេសកកម្មខ្លះនៅ អ៊ីរ៉ាក់ ហើយក៏ជាពេលដែលនាំឲ្យនាងចាប់អារម្មណ៍ជំនាញផលិតភាពយន្ត ក្រោយមើលរឿង Million Dollar Baby ស្នាដៃអ្នកដឹកនាំល្បីល្បាញ Clint Eastwood, Hilary Swank និង Morgan Freeman ជាភាពយន្តល្បីល្បាញមួយ និងរកចំណូលបានច្រើនក្នុង Box Office។ Caylee រំលឹកថា៖ «ខ្ញុំចាប់អារម្មណ៍ថាតើនរណាអាចធ្វើឲ្យរឿងមួយ គេមើលហើយរំជួលចិត្តទៅតាមសាច់រឿងអីចឹង? ទីបំផុតខ្ញុំរកឃើញគឺអ្នកដឹកនាំរឿង។ ដូច្នេះខ្ញុំគិតថាខ្ញុំអាចធ្វើបាន ២០០៩ពេលខ្ញុំទៅអាមេរិកវិញ ខ្ញុំបោះបោះបង់ការសិក្សាជំនាញពាណិជ្ជកម្មរៀន២ឆ្នាំមកហើយ ទៅផ្នែកសរសេររឿងវិញនៅ Dogde College Media and Arts»។
នៅពេលរៀនឆ្នាំទី៣ អ្វីដែលពិសេសសម្រាប់ពលរដ្ឋខ្មែរអាមេរិកកាំងទៀតនោះគឺ Caylee បានក្លាយជាស្ថាបនិកចាប់ដៃជាមួយកូនខ្មែរអាមេរិកម្នាក់ទៀតគឺលោក Prach Ly បុគ្គលមានបំណិនសិល្បៈ បង្កើតឲ្យមានមហោស្រព Cambodian Town Film Festival ឡើងជាលើកដំបូងនៅ ឡុងប៊ិច។ Cambodian Twon Film Festival មួយឆ្នាំៗបញ្ចាំងរឿងជាង៣០រឿង និងទទួលការគាំទ្រសន្ធឹកសន្ធាប់ពីទស្សនិកជន។ មនុស្សជាច្រើនបានទៅទស្សនាពេញៗ ដែលភាគច្រើនជាប្រជាជនខ្មែរអាមេរិកនៅ ឡុងប៊ិច មកពី វីជីនៀ បូស្តុន និង កាលីហ្វ័រញ៉ា។ អ្នកខ្លះមកតាំងពីកាណាដា។ ផលិតករអាកាំងមួយចំនួនក៏ទៅកាន់ទីនោះដើម្បីស្វែងយល់ពីខ្មែរ។
ស្ត្រីខ្មែរអាមេរិកដែលឪពុកម្ដាយមានប្រភពពីខេត្តស្វាយរៀង មុនជម្លៀសទៅអាមេរិកសម័យខ្មែរក្រហម អធិប្បាយពីមហោស្រពរបស់កូនខ្មែរអាមេរិក៖ «Prach Ly គាត់គិតជាយូរ តែមិនមានមនុស្សជួយ ហើយគាត់បានហៅខ្ញុំចូលរួម ខ្ញុំយល់ព្រមហើយពួកយើងក៏ចាប់ផ្ដើមវា ព្រោះថានៅ អាមេរិក វាលំបាករកកន្លែងមើលរឿងខ្មែរ ពិសេសរឿងចាស់ៗដូចជា អនអើយស្រីអន ក្រពើឆាវាន់ ជាដើម»។
មានប្រភពជាកូនខ្មែរ និងបានបញ្ចប់សញ្ញាប័ត្រដឹកនាំភាពយន្តនៅអាមេរិកតើ Caylee មានគម្រោងចូលរួមជាមួយសិល្បៈខ្មែរបែបណាខ្លះដែរ? នាងតបថា៖ «សហការគ្នាផលិតនិងនាំភាពយន្តមកទីនេះជាក្ដីប្រាថ្នារបស់ខ្ញុំ។ មកខ្មែរប៉ុន្មានថ្ងៃនេះ ខ្ញុំបានជួបជាមួយផលិតករខ្មែរល្បីៗ ដើម្បីសិក្សាថាតើទីនេះ ខ្ញុំមានលទ្ធភាពបែបណា ប្រឈមអ្វីខ្លះ? រដូវណា ទីណា អំណោយផលដល់ការថតរឿង? ហើយដំណើរការចែកចាយភាពយន្តវាយ៉ាងម៉េច?»។
មិនមានគម្រោងច្បាស់លាស់ទេ តែ Caylee ថាថ្ងៃក្រោយបើមានឱកាសផលិតរឿងនៅកម្ពុជា នឹងមករស់នៅកម្ពុជាខ្លះ និងនៅអាមេរិកខ្លះ។ នាងបានមកកម្ពុជាតាំងពីថ្ងៃទី២៣ធ្នូម៉្លេះនិងបានទៅកាន់កន្លែងទេសចរណ៍ល្បី ពិសេសខេត្តសៀមរាប មុនពេលចេញអាមេរិកវិញនៅដើមសប្ដាហ៍ក្រោយ។ Caylee ក៏កំពុងគ្រោងថតរឿងថ្មី ដែលផ្សព្វផ្សាយពីរបាំអប្សរាខ្មែរ គឺរឿង Invisible Dance៕
ព្រឹកព្រលឹមស្រស់ស្រាយជាមួយ «សុបិនស្នេហ៍» ស្នាដៃកូនខ្មែរអាមេរិក Laura Mam
អត្ថបទ៖ ប៉ែន សុផាន់ណា