Samsung Tech Institute បណ្តុះធនធានជំនាញដល់យុវជនខ្មែរប្រជែងទីផ្សារការងារអាស៊ាន

2015-02-17 17:42:20
ចំនួនមតិ 0 | ចំនួនចែករំលែក 0

ចន្លោះមិនឃើញ

នាយកគ្រប់គ្រងផ្នែកផ្សព្វផ្សាយរបស់ក្រុមហ៊ុន Samsung ប្រចាំប្រទេសថៃនិងតំបន់ឥណ្ឌូចិនបានបង្ហាញការចាប់អារម្មណ៍ សម្រាប់ការបង្កើតថ្នាក់បណ្ដុះបណ្ដាលជំនាញបច្ចេកវិទ្យា Samsung Tech Institute នៅប្រទេសកម្ពុជា ដែលនឹងបង្កើតធនធានមនុស្សដ៏មានសក្ដានុពលសម្រាប់យកទៅអភីវឌ្ឍប្រទេសកម្ពុជា។

លោកស្រី Sasitorn Khoopatanakul នាយកគ្រប់គ្រងផ្នែកផ្សព្វផ្សាយរបស់ក្រុមហ៊ុន Samsung ប្រចាំប្រទេសថៃនិងតំបន់ឥណ្ឌូចិនឲ្យដឹងក្នុងពិព័រណ៍ Samsung Forum 2015 នៅប្រទេសថៃថា លោកស្រីមានការចាប់អារម្មណ៍ជាខ្លាំង សម្រាប់ការបង្កើតថ្នាក់បណ្ដុះបណ្ដាលជំនាញបច្ចេកទេស Samsung Tech Institute នៅក្នុងប្រទេសកម្ពុជា។

លោកស្រីថា ការបើកថ្នាក់បណ្ដុះបណ្ដាលរបស់ Samsung ពិតជានឹងរួមចំណែកក្នុងការជួយអភិវឌ្ឍធនធានមនុស្សផ្នែកបច្ចេកទេសរបស់ប្រទេសកម្ពុជាឲ្យកាន់តែប្រសើរឡើង ខណៈដែលប្រទេសកម្ពុជានៅខ្វះខាតធនធានមនុស្សផ្នែកបច្ចេកទេសដ៏ច្រើន ដើម្បីអាចឆ្លើយតបតាមតម្រូវការនិងភាពរីកលូតលាស់នៃសេដ្ឋកិច្ច ។

ថ្នាក់បណ្តុះបណ្តាលបច្ចេកទេសរបស់ Samsung បានបង្កើតឡើងក្នុងប្រទេសជាច្រើនក្នុងតំបន់អាស៊ានដូចជាថៃ ភូមា និងកម្ពុជាជាដើម។ ដោយឡែក Samsung បានបើកថ្នាក់បណ្ដុះបណ្ដាលជំនាញបច្ចេកទេស Tech Institute នៅក្នុងប្រទេសកម្ពុជា ដោយផ្តោតសំខាន់លើការបណ្ដុះបណ្ដាលជំនាញជួសជុលទូរសព្ទ។

លោកស្រី Sasitorn Khoopatanakul បានបន្តថា ថ្នាក់បណ្ដុះបណ្ដាលថ្នាក់បច្ចេកទេសរបស់ Samsung នេះ ជាការវិនិយោគដ៏យូរអង្វែង ដែលយុវជនខ្មែរនឹងទទួលបានការបណ្តុះបណ្តាលបច្ចេកទេសច្បាស់លាស់ ដើម្បីអាចយកចំណេះនិងជំនាញដែលបានសិក្សាយកទៅប្រកបអាជីវកម្មនិងត្រៀមខ្លួនក្នុងការប្រកួតប្រជែងក្នុងទីផ្សារការងារអាស៊ាននាពេលខាងមុខ។

លោកស្រីបញ្ជាក់ថា Samsung ក៏គ្រោងបង្កើតវគ្គបណ្ដុះបណ្ដាលជំនាញផ្សេងទៀតដូចជាទូរទស្សន៍ ទូទឹកកក និងម៉ាស៊ីនត្រជាក់ជាដើម ដើម្បីជួយលើកស្ទួយគុណភាពធនធានមនុស្សលើផ្នែកបច្ចេកទេសរបស់ប្រទេសកម្ពុជាឈានទៅការអភិវឌ្ឍកាន់តែប្រសើរ។

បន្តអាន៖ Samsung បញ្ចេញផលិតផលចាស់ដៃនៅពិព័រណ៍ Forum 2015

បន្តអាន៖ និស្សិតខ្មែរពូកែ IT ១១ នាក់ជាប់ទៅកូរ៉េទទួលប្រាក់ឧបត្ថម្ភ ២៥០០ ដុល្លារក្នុង១ខែ

អត្ថបទ៖ ប៊ុណ្ណារ៉ា