សាន់ វីហ្សា៖ ឆ្នាំនេះ ខ្ញុំលេងម៉ាអស់ដៃ
- 2015-03-12 16:31:07
- ចំនួនមតិ 0 | ចំនួនចែករំលែក 0
សាន់ វីហ្សា៖ ឆ្នាំនេះ ខ្ញុំលេងម៉ាអស់ដៃ
ចន្លោះមិនឃើញ
លោក សាន់ វីហ្សា តារាសម្ដែងម្នាក់ បាន និយាយប្រាប់ Sabay ថា សម្រាប់វ៉ុលចូលឆ្មាំថ្មីនេះ លោកបានលេងម៉ាអស់ដៃ ដោយសម្ដែងប្រុសផង ស្រីផង ហើយថតបានច្រើនបទ ជាមួយតារាចម្រៀងល្បីថែមទៀត។
វីហ្សាបាននិយាយថា បទដែលលោកបានថតភាគច្រើន លោកឲ្យផលិតកម្មថោន ភ្លេងរីខត និង ក្រសួងទេសចរណ៍ ជាដើម។ ឆ្នាំនេះអ្នកដឹកនាំសម្ដែង ភាគច្រើនតម្រូវឲ្យលោកដើរតួជាភេទទី ៣ ព្រោះតួប្រភេទនេះ ត្រូវនឹងអត្តចរិតលោក ។
លោកបានរៀបរាប់ឲ្យដឹងថា នៅផលិតកម្មថោន លោកបានសម្ដែងបាន ៥ បទ ចំណែកនៅ ផលិតកម្ម ភ្លេងរីខត មាន ២ បទ ដោយលោកបានសុទ្ធសឹងតែដើរតួសំខាន់ៗ។ លោក រំពឹងថា ទស្សនិកជនអាចចាប់អារម្មណ៍លោកច្រើន ត្បិតអីបទចម្រៀង ដែលលោកសម្ដែងសុទ្ធតែជាបទរបស់តារាចម្រៀងល្បី ហើយអ្វីដែលពិសេសជាងគេនោះ គឺលោកលេងអត្តចរិតប្លែក អ្នកទស្សនាអាចចាប់អារម្មណ៍ច្រើន។
លោក វីហ្សា មានឈ្មោះដើមថា គន់ រៀមរតនៈ មានកំណើតមកពីស្រុកស៊ីធរកណ្ដាល ខេត្ត ព្រៃវែង។ តារារូបនេះបានប្រឡូកក្នុង អាជីពសិល្បៈជិត ១០ ឆ្នាំមកហើយ ផ្ដើមពីការរាំអមឆាក ពេលរដូវចូលឆ្នាំ ហើយក៏បានឈានជើងបានសម្ដែងរឿងម្ដងម្កាល ក៏ដូចជាសម្ដែងខារ៉ាអូខេ តាមបណ្ដាផលិតកម្ម នានា។ ជាមួយគ្នានោះ លោកក៏ឧស្សាហ៍សម្ដែងនៅតាមកម្មវិធីទូរទស្សន៍ទាក់ទងកម្មវិធីមេផ្ទះ ក៏ដូចជា ឡើងសម្ដែងរឿងខ្លីៗជាដើម។
ជាធម្មតាឲ្យតែរដូវចូលឆ្នាំថ្មីចូលមកដល់ វីហ្សា តែងតែរវល់ខ្លាំងនិងអាជីពនេះ ដែលមានពេលខ្លះលោក ត្រូវបង្ខំចិត្តឈប់ពីការងារដែលលោកធ្វើរាល់ថ្ងៃចុះទៅថតនៅ តាមបណ្ដាខេត្ត ជាច្រើនថ្ងៃ ហើយត្រូវថៅកែកាត់ប្រាក់ផងក៏មាន តែបែបនេះក្ដី តារារូបនេះនៅតែខំប្រឹង ព្រោះជាអាជីពដែលខ្លួនស្រឡាញ់៕