ភាពយន្តខ្មែរ ៧ រឿងបញ្ចាំងដើមឆ្នាំ ២០១៥ មិនទាន់មានរឿងណារកចំណូលបានខ្ពស់នៅឡើយ

2015-03-12 19:01:02
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែភាពយន្តខ្មែរ ៧ រឿងដាក់បញ្ចាំងតាមរោងភាពយន្តនានានៅដើមឆ្នាំ ២០១៥ មិនទាន់មានរឿងណាអាចរកចំណូលខ្ពស់គួរឱ្យគត់សម្គាល់ទេ។ នេះបើតាមការបញ្ជាក់ពី លោក ស៊ិន ចន្ទសាយ៉ា ប្រធាននាយកដ្ឋានភាពយន្ត និង ផ្សព្វផ្សាយវប្បធម៌ នៃក្រសួងវប្បធម៌ និងវិចិត្រសិល្បៈ។

រឿងខ្មែរចំនួន ៧ រឿង បានបញ្ចាំងរួចរាល់ និង កំពុងដាក់បញ្ចាំងតាមរោងភាពយន្តនានាមានដូចជា "បង្គោលគ្រាក់សង្កត់វិញ្ញាណ" “ហនុមាន" “កូនខ្ញុំចម្លែក" “ព្រលឹង Facebook” “កូនមាសម្ដាយ" “៧ថ្ងៃ" និង រឿង "បេសកកម្មមរណៈ"។

លោក ស៊ិន ចន្ទសាយ៉ា ប្រធាននាយកដ្ឋានភាពយន្ត និងផ្សព្វផ្សាយវប្បធម៌

លោក ស៊ិន ចន្ទសាយ៉ា បញ្ជាក់ថា៖ "តាមទិន្នន័យខ្ញុំទទួលបាន ដូចជាពុំទាន់មានរឿងណារកចំណូលបានខ្ពស់នៅឡើយទេ នាដើមឆ្នាំ២០១៥។ យើងចាំមើលតទៅទៀតមើលក្រែងអាចមានរឿងក្រោយៗបំបែកកំណត់ត្រាភាពយន្តឆ្នាំមុនបាន"។

ប្រធាននាយកដ្ឋានរូបនេះបន្តថា ការណ៍ដែលខ្សែភាពយន្តខ្មែរចាក់បញ្ចាំងដើមឆ្នាំ ២០១៥ មិនសូវទទួលការចាប់អារម្មណ៍ពីទស្សនិកជន ក៏ព្រោះតែការផលិតខ្សែភាពយន្តខ្មែរភាគច្រើនស្រដៀងៗគ្នា មិនសូវជាធ្វើឱ្យអ្នកមើលចាប់អារម្មណ៍។ ទោះជាយ៉ាងណាលោកបានអះអាងថា មានខ្សែភាពយន្តផ្សេងទៀត ក៏មានការផលិតគួរឱ្យចាប់អារម្មណ៍ផងដែរ។

ទាក់ទងនឹងសន្ទុះនៃការចូលទស្សនាខ្សែភាពយន្តខ្មែរពីសំណាក់មហាជនវិញប្រធាននាយកដ្ឋានខាងលើប្រាប់ថា នៅតែមានចំនួនច្រើនដូចឆ្នាំមុនដដែល។ ក៏ប៉ុន្តែអ្នកមើលពិចារណាមុននឹងមើល ដោយចង់ទស្សនាខ្សែភាពយន្តណាមានគុណភាព និងមានសាច់រឿងបែបអប់រំ។

ក្នុងនាមប្រធាននាយកដ្ឋានភាពយន្តលោក ស៊ិន ចន្ទសាយ៉ា នៅតែជឿជាក់ថា នឹងមានខ្សែភាពយន្តខ្មែរអាចរកចំណូលបានខ្ពស់ក្នុងឆ្នាំ២០ឥ១៥ តាមរយៈការសម្រុកផលិតពីសំណាក់ផលិតករខ្មែរក្នុងឆ្នាំនេះ។

ក្នុងឆ្នាំ ២០១៤ កន្លងទៅចំនួនខ្សែភាពយន្តខ្មែរដាក់បញ្ចាំងតាមរោងភាពយន្តមានជាង ២០ ក្នុងនោះ មានខ្សែភាពយន្ត ៥ រកចំណូលបានខ្ពស់ជាងគេរហូតដល់ជាង ៣០ ម៉ឺន ដុល្លារ មានដូចជា រឿង "2brother” "ស្បែកគង់" "ក្រឡអីហ្នឹង" “ខ្មោចអាសង្ហា" និង "អាព្រឿងងាប់ហើយ"៕

អានអត្ថបទបន្ត៖ វីរីយ៉ា ចេះចំហដើមទ្រូង ព្រោះអ្នកដឹកនាំរឿង

អានអត្ថបទបន្ត៖តារាល្បីណាខ្លះ ទៅច្រៀងនៅមង្គលការសេដ្ឋីខ្មែរថ្ងៃ២០មិនានេះ?

អានអត្ថបទបន្ត៖ព្យុះរិះគន់រឿង ក្បាច់រាំនិងសាច់ភ្លេងបទ យូរី រងការវាយប្រហារពីប្រព័ន្ធផ្សព្វផ្សាយវៀតណាម

អត្ថបទ៖ អ៊ីង សុឡា