ទិដ្ឋភាពហ្វូងសេះបង្កង់គេចមិនផុតពីមាត់ក្រពើ ពេលដល់រដូវផ្លាស់ទី

2015-09-22 20:51:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ហ្វូងសត្វក្រពើជាច្រើនក្បាល បានខាំហែកស៊ីសត្វសេះបង្កង់ទាំងរស់នៅតាមដងទន្លេ ខណៈសេះបង្កង់ដាច់ហ្វូងនេះព្យាយាមហែលឆ្លងទឹកទៅត្រើយម្ខាងក្នុងប្រទេសកេនយ៉ា ក្នុងរដូវដែលពួកវាត្រូវផ្លាស់ទី។

អ្នកថតរូបលោក Paolo Torchio អាយុ៥៤ឆ្នាំ ជនជាតិអ៊ីតាលី បានឃើញហេតុការណ៍ផ្ទាល់ភ្នែក បាននិយាយប្រាប់ថា ក្រពើធំៗ បានហែលមកចោមរោមសេះបង្កង់ បន្ទាប់ពីវាត្រូវបានហក់ត្របាក់ខាំ រួចក្រពើផ្សេងទៀតបានប្រញាយដណ្ដើមគ្នាចាប់ហែកសេះបង្កង់ជាចម្រៀកៗក្នុងទឹកតែម្ដង។

ហេតុការណ៍នេះបានកើតឡើងនៅក្នុងទន្លេ Mara ក្នុងតំបន់អភិរក្សជាតិ Maasai Mara ប្រទេសកេនយ៉ា ដែលនៅទីនោះសត្វសេះបង្កង់ តែងតែធ្វើបម្លាស់ទីឆ្លងកាត់ទន្លេ ដែលជាឱកាសក្លាយជាចំណីឆ្ងាញ់មាត់សម្រាប់ហ្វូងក្រពើទាំងនេះ។

ជារៀងរាល់ឆ្នាំ នៅភាគខាងកើតទ្វីបអាហ្វ្រិក សត្វសេះបង្កង់ ៣០ម៉ឺនក្បាល បានបម្លាស់ទីពីប្រទេសតង់ហ្សានី ទៅកាន់ប្រទេសកេនយ៉ា ដើម្បីស្វែងរកអាហារ។ ការធ្វើដំណើរវែងឆ្ងាយជាង ២៩០០គីឡូម៉ែត្របែបនេះហើយ ទើបធ្វើឲ្យហ្វូងសត្វទាំងនេះមានគ្រោះថ្នាក់ ឬបាត់បង់ជីវិតមុនពេលទៅដល់គោលដៅ៕