១៣០ឆ្នាំ ព្រះកេស និង ដងខ្លួនបដិមាព្រះហរិហរភ្នំដា ត្រូវបានតភ្ជាប់ឡើងវិញ

2016-01-21 23:10:53
ចំនួនមតិ 0 | ចំនួនចែករំលែក 0

ចន្លោះមិនឃើញ

ការតភ្ជាប់រវាងព្រះកេសដែលយកមកពីសារមន្ទីរជាតិសិល្បៈអាស៊ីហ្គីម៉េ ប្រទេសបារាំង និង ដងខ្លួនដែលនៅសារមន្ទីរជាតិកម្ពុជា ដែលបានបែកគ្នាអស់រយៈកាលជិត ១៣០ ឆ្នាំមកហើយ។ រូបបដិមាព្រះហរិ ហរ ជាវត្ថុសក្ការ និង សិល្បៈដ៏ប្រណីតរបស់ខ្មែរក្នុងរចនាបថភ្នំដា នាសតវត្សទី ៦-៧។ ពិធីតភ្ជាប់ត្រូវបានធ្វើឡើងនៅសារមន្ទីរជាតិកម្ពុជា កាលពីព្រឹកមិញ។

ឧបនាយករដ្ឋមន្ត្រី សុខ អាន ទទួលបន្ទុកទីស្ដីការគណៈរដ្ឋមន្ត្រី បានថ្លែងស្វាគមន៍ការវិលត្រឡប់មកវិញនៃព្រះកេសរបស់ព្រះបដិមាព្រះហរិហរភ្នំដា ដើម្បីតភ្ជាប់ជាមួយនឹងដងខ្លួនវិញ បន្ទាប់ពីព្រាត់គ្នាអស់រយៈពេល ១៣០ ឆ្នាំ ដែលប្រៀបបាននឹងការផ្ដល់ជីវិតជាថ្មីឡើងវិញដល់ព្រះហរិហរៈ។ "តាមជំនឿខ្មែរយើង នេះគឺជានិមិត្តរូបដ៏ល្អប្រពៃនៃការជួបជុំគ្នា ការរួបរួម ភាពចំរុងចម្រើន ភាពសុខដុមរមនា និង ភាពរឹងមាំនៃព្រលឹងជាតិខ្មែរផងដែរ"។

យុវជន សួន សុភា និស្សិតឆ្នាំទី ៤ នៃសាកលវិទ្យាល័យភូមិន្ទវិចិត្រសិល្បៈ ផ្នែកបុរាណវិទ្យា បានបញ្ចេញចំណាប់អារម្មណ៍ថា ការតភ្ជាប់បដិមាករនៅពេលនេះ គឺជារឿងល្អណាស់ ព្រោះថា បដិមាកខ្មែរបានបាត់បង់ច្រើនដោយសារតែសង្គ្រាម។ "ខ្ញុំចង់ឲ្យរាជរដ្ឋាភិបាលក៏ដូចជាអ្នកប្រវត្តិសាស្រ្តត្រូវខិតខំស្រាវជ្រាវនូវវត្ថុបុរាណដែលបាត់បង់ ហើយយើងទាមទារមកវិញប្រសិនបើយើងមានឯកសារគ្រប់គ្រាន់"។

ទាក់ទិននឹងបញ្ហានេះ ឯកឧត្តម ថៃ នរៈសត្យា អ្នកនាំពាក្យក្រសួងវប្បធម៌ថ្លែងប្រាប់អ្នកកាសែតថា សព្វថ្ងៃនេះ វត្ថុបុរាណជាច្រើនរបស់ខ្មែរកំពុងរងការខូចខាត ហើយមួយចំនួនបានបាត់បង់ ហើយក្រសួងវប្បធម៌មិនដែលនៅស្ងៀមនោះទេ គឺកំពុងធ្វើការស្រាវជ្រាវជាបន្ដបន្ទាប់ដើម្បីស្វែងរករូបឬវត្ថុបុរាណដែលបានបាត់បង់ ហើយក្រសួងកំពុងបណ្ដុះយុវជនជំនាន់ក្រោយបន្តធ្វើការងារនេះផងដែរ។

ការជួបជុំរវាងព្រះកេស និង ដងខ្លួនព្រះហរិហរៈ នាពេលនេះគឺជាផ្លែផ្កានៃកិច្ចសហប្រតិបត្តិការរវាងប្រទេសកម្ពុជា និង បារាំង ជាពិសេសគឺរវាងនាយកដ្ឋានសារមន្ទីរ នៃក្រសួងវប្បធម៌ ជាមួយនិង សារមន្ទីរសិល្បៈអាស៊ីហ្គីម៉េ ដែលផ្អែកលើស្មារតីនៃកិច្ចព្រមព្រៀងដែលបានចុះហត្ថលេខានាថ្ងៃទី ២៦ ខែតុលា ឆ្នាំ ២០១៥ នៅទីក្រុងប៉ារីស ប្រទេសបារាំង ស្ដីពីការផ្លាស់ប្ដូរបញ្ញើវត្ថុសិល្បៈដែលបានអនុញ្ញាតឲ្យព្រះកេស និង ដងខ្លួនព្រះហរិហរៈ បានជួបជុំគ្នានៅកម្ពុជា ក៏ដូចជា ការអនុញ្ញាតឲ្យជើងទម្រ និង បដិមាព្រះនាងឧមារំា បានជួបជុំគ្នានៅប្រទេសបារាំង៕