ធា គ្រុយ៖ ពេលធ្វើការ ហេតុអ្វីពេទ្យចាំបាច់ពាក់អាវស?

2016-04-11 16:21:27
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងពិធីបំពាក់ឯកសណ្ឋានពេទ្យ និងការធ្វើសច្ចាប្រណិធាន សម្រាប់សិស្សមហាវិទ្យាល័យវិទ្យាសាស្ត្រសុខាភិបាល កាលពីថ្ងៃទី ៧ មេសាកន្លងមក ឯកឧត្ដម សាស្ត្រាចារ្យ វេជ្ជបណ្ឌិត ធា គ្រុយ រដ្ឋលេខាធិការក្រសួងសុខាភិបាល និងជាប្រធានគណៈគ្រូពេទ្យកម្ពុជា បានដាក់សំណួរ ទៅកាន់សិស្សពេទ្យរាប់ពាន់នាក់ថា ពេលធ្វើការ ហេតុអ្វីពេទ្យចាំបាច់ពាក់អាវស?

លោកសាស្ត្រាចារ្យ បានធ្វើការបកស្រាយយ៉ាងដូច្នេះថា គ្រូពេទ្យពាក់អាវស (ឯកសណ្ឋានពេទ្យ) ព្រោះគ្រូពេទ្យ ជាបុគ្គលសំខាន់ម្នាក់ ដែលពាក់ព័ន្ធសុខភាព និងអាយុជីវិតរបស់មនុស្ស។

"ពាក់អាវស ដើម្បីឱ្យដឹងថា ខ្លួនឯងមានភារកិច្ចសំខាន់ ទទួលបន្ទុកសង្គ្រោះជីវិត និងសុខភាពរបស់អ្នកជំងឺ។ ឱ្យដឹងថា អ្នកឯងជានរណាគេ កំពុងធ្វើអ្វី ត្រូវធ្វើអ្វី។ ទោះជាប់សន្យាអ្វី ជាមួយអ្នកណាក៏ដោយ ឱ្យតែពាក់ព័ន្ធជាមួយជីវិតក្បែរខ្លួន អ្វីៗទាំងឡាយនោះ ត្រូវទុកចោលទាំងអស់។ ជាអ្នកជាប់ភារៈសំខាន់!។ ខ្ញុំបានស្ដាប់សច្ចាប្រណិធានមិញ អស់លោកជ្រាប អ្នកអានក៏ជ្រាបអ្នកថាតាមក៏ជ្រាប។ មិញដល់ថ្នាក់ថា ស៊ូបោះបង់ជីវិត មិនលះបង់អ្វីដែលត្រូវធ្វើ។ តឹងតែងមែនទែន! ខ្ញុំបារម្ភ! ឃ្លាមួយហ្នឹង ខ្ញុំបារម្ភ […] ខ្ញុំសង្ឃឹមថាអស់លោកកំពុងស្បថមែនទែន ខ្ញុំសង្ឃឹមថាលោកនឹងបន្តទទួលពាក្យសម្បថនេះ ទៅពិចារណា និងអនុវត្តតាមលទ្ធភាពខ្ពស់បំផុត ប្រឹងប្រែងបំផុត មិនខ្ជីខ្ជា។ និយាយឱ្យចំមែនទែនមិនបាច់ស្បថក៏បានដែរ ឱ្យតែមាំទាំ ឱ្យតែច្បាស់លាស់ មិនបាច់ស្បថក៏បានដែរ តែបើបានស្បថទៀតកាន់តែមាំទាំ […] ខ្ញុំចង់បានជាងគេ គឺឃ្លាមួយម៉ាត់នេះទេ ស្មារតីទទួលខុសត្រូវខ្ពស់! ថាអស់លោកមានស្មារតីទទួលខុសត្រូវខ្ពស់អត់? ពីព្រោះពាក់ព័ន្ធនឹងជីវិតអ្នកជំងឺ ដែលនៅនឹងមុខយើង”។

ឯកឧត្ដមធា គ្រុយ បានបន្តថា៖ “...បងប្អូនៗតិចទៀតចុះកម្មសិក្សានៅមន្ទីរពេទ្យ ហើយពិសេសពេលបងប្អូនចេញមក បងប្អូននឹងមើលឃើញ នៅពេលបងប្អូននៅចំពោះជីវិតមួយ។ ជីវិតនោះមិនមែនស្បថស្បែដូចមនុស្សពីរនាក់ស្រលាញ់គ្នាទេ។ អត់មានបង អូនស្លាប់ អត់មានអូន បងពិបាករស់។ ដល់មែនទែនទៅ មិនដឹងយ៉ាងណាដែរ ពេលហ្នឹងថាអ៊ីចឹង ដល់ពេលគ្មានបងអូនក៏រស់ស្រួលម្យ៉ាងដែរ អត់មានអូន បងរស់ស្រួលមួយបែបទៀត ប៉ុន្តែជីវិតមួយហ្នឹង បើអត់គ្រូពេទ្យដឹងតែស្លាប។ បើអស់លោកមាំទាំប្រឹងប្រែងខ្ពស់ អ្នកជំងឺម្នាក់ចង់ស្លាប់ ក៏ពិបាកស្លាប់ដែរ...”។

ចំណុចមួយទៀត ការពាក់អាវស គឺជារូបភាពមួយបង្ហាញថា ពេទ្យជាអ្នកត្រឹមត្រូវ ថ្លៃថ្នូរ ប្រកបដោយការទទួលខុសត្រូវខ្ពស់ និងជាមនុស្ស មានចំណេះដឹង មានរាងកាយមាំទាំ មានសមត្ថភាព មានជំនាញ និងមានសីលធម៌ល្អ។

"ធ្វើពេទ្យមិនមែនចេះតែពេទ្យមួយមុខទេ។ ធ្វើគ្រូពេទ្យត្រូវមានសមត្ថភាព ជំនាញមាំទាំ បើមានសីលធម៌ អត់សមត្ថភាព មិនអាចវះកាត់ឱ្យអ្នកជំងឺជាបានទេ។ បើមានសមត្ថភាព អត់សីលធម៌ នោះពេទ្យនឹងច្នៃជំនាញ ជាប្រយោជន៍ផ្ទាល់ខ្លួនហើយ។ វាជាកញ្ចប់មួយដែលមកជាមួយគ្នា ទាំងជំនាញមាំទាំ និងសីលធម៌។ អាជីពគ្រូពេទ្យ បើគ្មានសីលធម៌ទេ គ្រោះថ្នាក់បំផុតគ្រូពេទ្យពូកែ"។

លោកវេជ្ជបណ្ឌិត បានបញ្ជក់ថា ក្រមសីលធម៌សំខាន់ណាស់។ ចំពោះគ្រូពេទ្យ មិនផ្សាយពាណិជ្ជកម្មពីមុខរបរខ្លួន និងមិនប្រកាសថាខ្លួនឯងពូកែដែរ។ របរគ្រូពេទ្យ ត្រូវបានហាមមិនធ្វើការជួញដូរ ជាវិជ្ជាជីវៈវិជ្ជាសាស្ត្រ ឬសុខាភិបាល និងមាននាទីរក្សាការសម្ងាត់ជូនអ្នកជំងឺ៕

ចុចអាន៖ លើកទី១ កម្ពុជាមានពិធីបំពាក់ឯកសណ្ឋានពេទ្យ និងធ្វើសច្ចាប្រណិធាន

អត្ថបទ៖ អ៊ុំ សុភក្តិ