គ្រូស្វាយរៀង និយាយចំណុចល្អរបស់គីរីវង់ និងអគ្គិសនីឆ្នាំ២០១៧

2017-01-28 01:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក សំ វ៉ាន់ដេត គ្រូបង្វឹកក្លឹបព្រះខ័នរាជស្វាយរៀងបញ្ចេញទស្សនថា ការឡើងមកកាន់លីគកំពូលកម្ពុជារបស់ គីរីវង់សុខសែនជ័យ និងក្លឹបអគ្គិសនីកម្ពុជា ក្លឹបធំផ្សេងៗមិនងាយយកឈ្នះស្រួលៗនោះទេ សម្រាប់រដូវកាលថ្មី២០១៧។

គ្រូជំនួយស្វាយរៀងតាំងពីឆ្នាំ២០០២ រូបនេះបានឲ្យដឹងថា តាមការមើលឃើញរបស់លោក ក្លឹបគីរីវង់ និងអគ្គិសនីសុទ្ធតែរៀបចំខ្លួនបានល្អដូចគ្នា។ គីរីវង់ បានចំណាយពេលមួយឆ្នាំ ដើម្បីបង្កើតពានរង្វាន់មួយ ប្រមូលធនធានកីឡាករត្រៀមឡើងមកលេងលីគកំពូលកម្ពុជា។

ចំណែកអគ្គិសនីលោកយល់ថា ជាក្លឹបមានការគិតគូបានល្អជាពិសេសមានគ្រូបង្វឹកល្អលោក ប្រាក់ វុទ្ធី និងមានការនាំចូលកីឡាករល្អៗជាច្រើនរូប។ ធនធានកីឡាករកម្ពុជារបស់ក្លឹបទាំងពីរ ប្រសិនបើប្រើកីឡាករបរទេសល្អពីរឬបីរូបទៀត ពិតណាស់ក្លឹបផ្សេងៗមិនងាយយកឈ្នះស្រួលៗនោះទេ។

សូមបញ្ជាក់ថា ការប្រកួតលីគកំពូលកម្ពុជា នឹងចាប់ផ្ដើមចាប់ពីថ្ងៃទី១៨ ខែកុម្ភៈ ដល់ថ្ងៃទី២ ធ្នូ ឆ្នាំ២០១៧ ដោយយករូបមន្តប្រកួត Play-Off ៤ក្រុម។ ដោយការលេង Play Off នេះនឹងយកតាមគំរូជប៉ុន ដោយក្រុមលេខ៣ ប្រជែងជាមួយលេខ៤ យកអ្នកឈ្នះឡើងទៅប៉ះក្រុមលេខ២ ហើយក្រុមឈ្នះនៅវគ្គនេះបន្តឡើងទៅប៉ះក្រុមលេខ១ ដណ្ដើមជើងឯកតែម្ដង។ ៕

អត្ថបទ៖ ស្រី សុវណ្ណដារ៉ា