ការពិតគួរឲ្យចាប់អារម្មណ៍ ១០ចំណុចពីតារាចម្រៀង Original Song រុន ស៊ីរ៉ា

2017-12-05 04:01:36
ចំនួនមតិ 0 | ចំនួនចែករំលែក 0

ចន្លោះមិនឃើញ

កញ្ញា រុន ស៊ីរ៉ា ដែលជាបេក្ខជន Hear My Song និងជាតារាចម្រៀងក្នុងដួងចិត្តមិត្តយុវវ័យជាច្រើន ជាមួយបទចម្រៀង Original Song «ច្រណែនគេដែលមិនមែនជាខ្ញុំ» «ហេតុអ្វីក៏ជាខ្ញុំត្រូវយំម្នាក់ឯង» និងបទចម្រៀងមួយចំនួនទៀតដែលកំពុងត្រៀមចេញជាវីដេអូបទចម្រៀងថ្មីក្នុងពេលឆាប់ៗ។ តែមុននឹង Sabay និយាយពីបទថ្មី ឥឡូវទៅដឹងចំណង់ចំណូលចិត្ត និងប្រវត្តិខ្លះៗរបស់ ស៊ីរ៉ា បន្តិចសិន៖

១/ រុន ស៊ីរ៉ា គឺជាឈ្មោះកំណើតរបស់ ស៊ីរ៉ា ហើយនាងមានស្រុកកំណើតនៅក្នុងខេត្តបាត់ដំបង បច្ចុប្បន្នមានអាយុ ២២ឆ្នាំ។

២/ ស៊ីរ៉ា ជានារីធម្មតាម្នាក់ ហើយនាងក៏ធ្លាប់មានស្នេហាដែរ តែស៊ីរ៉ាប្រាប់ថា វាជាស្នេហាក្មេងៗ មិនប្រាកដប្រជា ដូចនេះនាងក៏បែកគ្នា ហើយក៏មិនទាន់មានអ្នកណាក្នុងបេះដូងរបស់នាងដែរពេលនេះ។

៣/ ឆ្នាំនេះតារាចម្រៀង ស៊ីរ៉ា ទើបតែបញ្ចប់បរិញ្ញាប័ត្រ ផ្នែកឱថសសាស្រ្ត ហើយនាងក៏មានបរិញ្ញាប័ត្រខាងគណនេយ្យករផងដែរ។ ម្ចាស់បទ «ច្រណែនគេដែលមិនមែនជាខ្ញុំ» រូបនេះក៏មានគម្រោងបើកឱសថស្ថាន ព្រោះវាក៏ជាការងារមួយដែលនាងតែងចង់ធ្វើ ពិសេសមានជំនាញនេះពីសាលារៀនស្រាប់។

៤/ ដឹងអត់ ស៊ីរ៉ា ក៏ជាអ្នកដោះស្រាយវិបត្តិស្នេហាម្នាក់ដែរ ព្រោះបទចម្រៀងនីមួយៗរបស់នាងកើតឡើងដោយសារស្តាប់រឿងស្នេហាខូចចិត្តរបស់មិត្តភ័ក្រ្តរៀបរាប់ ហើយនាងក៏ជួយលើកទឹកចិត្តពួកគេ រួចក៏តែងវាជាបទចម្រៀង ពិសេសបទ «ហេតុអ្វីក៏ជាខ្ញុំត្រូវយំម្នាក់ឯង»។

៥/ កញ្ញាម្ចាស់បទ «មុខងាប់» ក៏ចូលចិត្តស្លៀកពាក់សមញ្ញៗដូចជាអាវយឺ ខោខ្លី ឬវែង និងស្បែកជើងប៉ាត់តា ធម្មតា មិនសូវចេះស៊ីវិល័យ ដែលកាលមិនទាន់ឡើងច្រៀងលើឆាក មានគេគិតថា ស៊ីរ៉ា ជាមនុស្សប្រុស។

៦/ មិនត្រឹមតែពូកែលេងហ្គីតា នាងក៏មានចំណូលចិត្តលើឧបករណ៍តន្រ្តីបុរាណខ្មែរ។ កញ្ញា ស៊ីរ៉ា ប្រាប់ថា នាងក៏កំពុងឆ្លៀតពេលរៀនលេងឧបករណ៍ខ្មែរ ដូចជាទ្រខ្មែរជាដើម។

៧/ ស៊ីរ៉ា រៀនលេងហ្គីតាពីប៉ារបស់នាងតាំងពីក្មេង ព្រោះគ្រួសាររបស់ ស៊ីរ៉ា ជាអ្នកចូលចិត្តតន្រ្តី និងចេះលេងភ្លេងខ្លះៗ ដើម្បីកំដរអារម្មណ៍ប៉ុណ្ណោះ។ ក្រោយមកតារាចម្រៀងរូបនេះ និងបងប្រុសម្នាក់ទៀតក៏ចូលរៀនជំនាញលេងហ្គីតានេះជាមួយគ្រូបង្រៀនដែលមានជំនាញច្បាស់លាស់។

៨/ ជាកូនពៅក្នុងគ្រួសារ ស៊ីរ៉ា មានបងប្រុសតែម្នាក់ប៉ុណ្ណោះ ដែលជាអ្នកបើកផលិតកម្ម Frame29 និងតែងតែថតវីដេអូបទចម្រៀងឱ្យស៊ីរ៉ារាល់ដង។

៩/ពេលវិស្សមកាល ឬថ្ងៃបុណ្យសម្រាកបានយូរ ស៊ីរ៉ា ចូលចិត្តទៅលេងខេត្តសៀមរាប និងមាត់សមុទ្រជាងគេ។

១០/ ចុងក្រោយនេះពិសេសជាងគេ ស៊ីរ៉ា ជាមនុស្សម្នាក់ដ៏សមញ្ញ រាបសា ពិសេសមិនសូវចេះនិយាយច្រើននោះទេ តែក៏មានអ្នកតាមស្រលាញ់ច្រើនគួរសមដែរ។ ចំពោះមនុស្សប្រុសដែលនាងប្រាថ្នាចង់បានជាគូ ជាមនុស្សសុភាពរាបសា ស្រលាញ់នាង និងគ្រួសាររបស់នាងតែប៉ុណ្ណឹងបានហើយ។ ស៊ីរ៉ា បាននិយាយថា៖ «គ្មាននរណាម្នាក់ល្អគ្រប់ដប់នោះទេ ចឹងខ្ញុំមិនដឹងរើសម៉េចទេ»។