ដឹងថា សាសា បំភ្លឺអ្វីខ្លះនៅសាលាដំបូង ខេត្តបាត់ដំបង?

2015-09-07 15:57:54
ចំនួនមតិ 0 | ចំនួនចែករំលែក 0

ចន្លោះមិនឃើញ

អតីតពិធីការិនី សាសា ព្រមចូលខ្លួនទៅបំភ្លឺនៅសាលាដំបូងខេត្តបាត់ដំបង កាលពីថ្ងៃសុក្រសប្ដាហ៍កន្លងទៅ ដោយបានយកឯកសារបញ្ជាក់ពីសមត្ថកិច្ចបង្ហាញទៅកាន់ព្រះរាជអាជ្ញា ដែលជាការទទួលខុសត្រូវហេតុការណ៍គ្រោះថ្នាក់ចរាចរណ៍កាលពីយប់ថ្ងៃទី ២ សីហា ២០១៥។ នេះបើតាមការអះអាងរបស់អ្នកនាង យិន ស្រីលាភ ជាបងថ្លៃ និងជាអ្នកកាន់ទូរសព្ទជំនួស។

បងថ្លៃដដែលបញ្ជាក់ថា៖" គ្រាន់តែភស្តុតាងមួយចូលបំភ្លឺ កុំឱ្យគេនិយាយថា គាត់អញ្ចេះអញ្ចុះ។ ការពិតថ្ងៃកើតហេតុប្អូនខ្ញុំគាត់មានក្រដាសស្នាមបញ្ជាក់ដែរពីប៉ូលីសក្នុងខេត្តមុនចាកចេញ"។ អ្នកនាងបន្ថែមថា សាសា យល់ព្រមផ្ដល់សំណងតាំងពីថ្ងៃកើតហេតុមកម្ល៉េះក្នុងនោះក៏មានសងជំងឺចិត្ត ៣ លានរៀល និង ការចំណាយលើការព្យាបាលរបួសជនរងគ្រោះ រួមទាំងការសុំទោសជនរងគ្រោះជាដើម។

ប្រភពដដែលបន្ថែមទៀតថា សាសា មិនបានបើករថយន្តគេចចេញ ដោយគ្មានការទទួលខុសត្រូវ ឬការដោះស្រាយដូចព័ត៌មានកន្លងមកនោះទេ។ ប៉ុន្តែនាងមិនចង់ធ្វើការបកស្រាយអ្វីឡើយ ដោយរង់ចាំពេលវេលាបង្ហាញខ្លួននៅតុលាការតែម្ដង ដើម្បីធ្វើការបំភ្លឺតាមដីកាកោះរបស់ចៅក្រមសាលាដំបូងខេត្ត និងយកឯកសារបញ្ជាក់មួយចំនួនទៅចូលបំភ្លឺក្នុងតុលាការពាក់ព័ន្ធករណីគ្រោះថ្នាក់ចរាចរណ៍កណ្ដាលក្រុងបាត់ដំបង។

ដោយឡែក ចំពោះភាពខកខានមិនបានចូលខ្លួនទៅបំភ្លឺតាមដីកាកោះកាលពីថ្ងៃទី ២៧ សីហាកន្លងទៅនេះ ត្រូវបានបងថ្លៃដដែលបញ្ជាក់ថា ដោយសារស្មារតីរបស់ សាសា មិនទាន់នឹងនទេ បន្ទាប់ពីជួបហេតុការណ៍អាក្រក់ ២ លើកផ្ទួនគ្នារួមមានទទួលរងអំពើហិង្សាពីលោក សុខ ប៊ុន ជាដើម។

យិន ស្រីលាភ បន្តថា៖" មកឃើញគាត់បានដឹងថា សាសា យ៉ាងម៉េច? គាត់ស្រកគីឡូខ្ញុំអាណិតគាត់មែនទែន គាត់នៅតក់ស្លុតរឿងគ្រប់យ៉ាង និងមានរបួសត្រូវព្យាបាលតទៀត"។ នាងស្នើឱ្យទុកផ្លូវដើរសម្រាប់ប្អូនថ្លៃរូបនេះ ព្រោះគ្មាននរណាម្នាក់ចង់មានបញ្ហា ដែលខាតបង់ទាំងទ្រព្យសម្បត្តិ ពេលវេលា និង កិត្តិយសនោះទេ៕

អានអត្ថបទ៖ ធ្លាយដំណឹង អ៊ិន សុភិន ប្រគល់គម្រោងសង់អគារ៦លានដុល្លារឲ្យ ប៉ែន តុលា

អានអត្ថបទ៖ គង់ ចាន់រដ្ឋា ជួបទុក្ខធំនៅស្រុកកំណើត

អត្ថបទ៖ សំ ជំនាញ