ម៉ា វីរ៉ូ រត់២០គ.មរាល់ថ្ងៃ ទើបបានលេខ១ ពាក់កណ្តាលម៉ារ៉ាតុងនៅព្រះសីហនុ
- 2018-03-12 10:26:18
- ចំនួនមតិ 0 | ចំនួនចែករំលែក 0
ម៉ា វីរ៉ូ រត់២០គ.មរាល់ថ្ងៃ ទើបបានលេខ១ ពាក់កណ្តាលម៉ារ៉ាតុងនៅព្រះសីហនុ
ចន្លោះមិនឃើញ
កីឡាករមាឌតូចតែរត់លឿន ម៉ា វីរ៉ូ ទទួលបានចំណាត់ថ្នាក់លេខ១លើវិញ្ញាសាចម្ងាយ២១គីឡូម៉ែត្រនៃការរត់ប្រណាំងពាក់កណ្ដាលម៉ារ៉ាតុងនៅខេត្តព្រះសីហនុនេះកាលពីចុងសប្តាហ៍កន្លងទៅនេះ។
ម៉ា វីរ៉ូ បានឲ្យដឹងថា ចំពោះការប្រកួតអត្តពលកម្មពាក់កណ្ដាលម៉ារ៉ាតុងកាលពីថ្ងៃអាទិត្យកន្លងទៅនេះ មិនសូវជាពិបាកនោះទេ ដោយសារបានហ្វឹកហាត់ត្រៀមដល់ទៅ៣ខែ មុនការប្រកួតមកម្ល៉េះ ដូច្នេះហើយទើបទទួលបានលទ្ធផលល្អបែបនេះ។
ចំពោះការហ្វឹកហាត់វិញ កីឡាករជម្រើសជាតិកម្ពុជាបន្តថា ក្នុង១ថ្ងៃ យ៉ាងហោចណាស់ក៏រត់រយៈពេល១ម៉ោង និង៣០នាទី។ បើគិតទៅប្រហែលជាង២០គីឡូម៉ែត្រ។ នៅថ្ងៃខ្លះគឺហ្វឹកហាត់ផ្ដោតលើលឿន ពោលហាត់រត់លឿន រត់យឺត និងហាត់រត់ឡើងទួល ឬឡើងជណ្ដើរពហុកីឡដ្ឋានជាតិជាដើម។ បើនិយាយពីរបបអាហារវិញមិនមានអ្វីខុសពីធម្មតានោះទេ គ្រាន់តែបរិភោគឲ្យបានគ្រប់គ្រាន់ និងទៀងទាត់។
លោក សែម ផល្លា គណៈកម្មការរៀបចំការប្រកួតក៏បានឲ្យដឹងដែរថា ព្រឹត្តិការណ៍រត់ប្រណាំងពាក់កណ្ដាលម៉ារ៉ាតុងលើកទី៧នេះ មានការចូលរួមលើសពីឆ្នាំមុនទៅទៀត ដែលចំនួនកីឡាករ កីឡាការិនីទាំងអស់ប្រហែលជា ២០០០នាក់។ ការប្រកួតដំណើរការបានយ៉ាងរលូន មិនមានបញ្ហាណាមួយនោះទេ។ ការរៀបចំសណ្ដាប់ធ្នាប់ចរាចរណ៍ល្អប្រសើរជាងឆ្នាំមុនទៅទៀត ខណៈផ្លូវរត់ក៏ល្អសមរម្យផងដែរ។
ព្រឹត្តិការណ៍រត់ប្រណាំងពាក់កណ្ដាលម៉ារ៉ាតុងនេះធ្វើឡើងកាលពីថ្ងៃអាទិត្យ ទី១១ ខែមីនា ឆ្នាំ២០១៨ នៅក្រុមព្រះសីហនុ ដែលប្រកួតលើ ៣វិញ្ញាសា ៣គីឡូម៉ែត្រ ១០គីឡូម៉ែត្រ និង២១គីឡូម៉ែត្រ។ ២១គីឡូម៉ែត្រ ចំណាត់ថ្នាក់លេខ១ កីឡាករ ម៉ា វីរ៉ូ (១ម ២០នាទី) លេខ២ កីឡាករ Adelmann Frank (១ម ២៤នាទី) និងលេខ៣ កីឡាករ Cenenov Senenov Andel (១ម ២៦នាទី)៕
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
