សូហ្វតេន្នីស រំពឹងចម្រាញ់បានយុវជនឆ្នើម ពីការប្រកួតថ្នាក់ជាតិ២០១៨
- 2018-03-21 04:37:13
- ចំនួនមតិ 0 | ចំនួនចែករំលែក 0
សូហ្វតេន្នីស រំពឹងចម្រាញ់បានយុវជនឆ្នើម ពីការប្រកួតថ្នាក់ជាតិ២០១៨
ចន្លោះមិនឃើញ
សហព័ន្ធកីឡាសូហ្វតេន្នីសកម្ពុជា បានប្រកាសបើកការប្រកួតជើងឯកថ្នាក់ជាតិប្រចាំឆ្នាំ២០១៨ កាលពីព្រឹកមិញនេះនៅពហុកីឡដ្ឋានជាតិ។
លោក ជា ប៊ុនហេង អនុប្រធានទី១នៃសហព័ន្ធខាងលើបានឲ្យដឹងថា ការបង្កើតថ្នាក់ជាតិឆ្នាំនេះទាំងគណៈកម្មការបច្ចេកទេស ព្រមទាំងគ្រួជម្រើសជាតិទាំងអស់ នឹងប្រឹងប្រែងសម្លឹងស្វែងរកកីឡាករឆ្នើមៗ ពិសេសរើសយកក្មេងដែលមានទេពកោសល្យមកចូលជាថ្នាលរបស់ជម្រើសជាតិ។ ជារៀងរាល់ឆ្នាំព្រឹត្តិការណ៍ធំនេះ តែងប្រមូលបានយុវជនល្អៗ ដើម្បីយកមកបណ្ដុះបណ្ដាល។
លោកបញ្ជាក់ថា ការជ្រើសរើសចូលជាយុវជនថ្នាលរបស់ជម្រើសជាតិ មើលទៅលើចំណុចសំខាន់ៗមួយចំនួនដូចជា កាយសម្បទា និងទឹកចិត្តស្រលាញ់កីឡាសូហ្វតេន្នីស ជាដើម។ ការរំពឹងទុកនោះគឺឆ្នាំនេះ នឹងអាចរើសបានកីឡាករល្អៗមួយចំនួនទៀត ជាមួយនឹងការជ្រើសរើសនេះដែរសហព័ន្ធមិនបានកំណត់ចំនួនឡើយ។
ការប្រកួតថ្នាក់ជាតិឆ្នាំនេះមានក្លឹបចូលរួមចំនួន ៨ ក្នុងនោះមាន ៤ ក្លឹបនៅភ្នំពេញ និង ៤ ក្លឹបមកពីខេត្តកំពង់ឆ្នាំង កំពង់ស្ពឺ ត្បូងឃ្មុំ និងខេត្តព្រៃវែង។ វិញ្ញាសាមាន ឯកត្តជនបុរស-នារី វាយគូបុរស-នារី វាយគូចម្រុះ ឯកត្តជនយុវជនបុរស-នារីក្រោម ១៨ ឆ្នាំ វាយគូបុរស-នារីក្រោម ១៨ ឆ្នាំ និង វាយក្រុមបុរសក្រោម ១៨ឆ្នាំ។ កីឡាករចូលរួមមានបុរស ៥២ នាក់ និងនារី ២៧ នាក់៕