ស្អាតហើយពូកែទៀត! នារីវ័យ១៧ឆ្នាំរូបនេះ គ្រោងហោះទៅភពអង្គារ មុនគេបង្អស់

2018-07-10 02:22:30
ចំនួនមតិ 0 | ចំនួនចែករំលែក 0

ចន្លោះមិនឃើញ

នាង Alyssa Carson អាយុ១៧ឆ្នាំ មកពីទីក្រុង Baton Rouge រដ្ឋ Louisiana សហរដ្ឋអាមេរិក កំពុងត្រូវបានអង្គការ NASA បង្វឹកក្លាយជាអវកាសយានិក។ ក្ដីសុបិនរបស់នាង គឺដើម្បីក្លាយជាមនុស្សដំបូងនៅលើភពព្រះអង្គារ ហើយនាងកំពុងចង់ចូលរួមបេសកកម្ម «មនុស្សដំបូងរបស់ពិភពលោកទៅកាន់ភពព្រះអង្គារ ឆ្នាំ២០៣៣»។

នាង Alyssa Carson

ក្នុងនាមជាមនុស្សទីមួយដែលបានបញ្ចប់កម្មវិធី NASA Passport Program ដោយឆ្លងកាត់មជ្ឈមណ្ឌល NASA Visitor Centers ទាំង១៤ នាង Alyssa ក៏ជាមនុស្សវ័យក្មេងជាងគេ ដែលត្រូវបានទទួលយក និងបញ្ចប់ការសិក្សាថ្នាក់ Advanced Possum Academy ដែលធ្វើឲ្យនាងទទួលបានវិញ្ញាបនបត្រ អាចទៅអវកាស និងក្លាយជាសិក្ខាកាមអវកាសយានិកផងដែរ។

ក្រៅពីការហ្វឹកហាត់ផ្នែកអវកាស នារីវ័យក្មេងដ៏ពូកែរូបនេះ ក៏កំពុងតែសិក្សាមុខវិជ្ជាសាលារបស់នាងជា៤ភាសា (អង់គ្លេស, ចិន, បារាំង និង អេស្ប៉ាញ) ទៀតផង។

នាង Alyssa បាននិយាយថា «ការប្រកួតប្រជែងធំបំផុត គឺពេលវេលា និងការធ្វើអ្វីគ្រប់យ៉ាងឲ្យរួចរាល់តាំងពីក្មេង។ ការហ្វឹកហាត់នៅវ័យក្មេង ក៏នឹងមានការលំបាកបន្ថែមទៀតសម្រាប់ខ្ញុំដែរ ប៉ុន្តែរហូតមកដល់ពេលនេះខ្ញុំបានធ្វើវាយ៉ាងល្អ»។

យ៉ាងណាមិញ នារីវ័យក្មេងរូបនេះបានបន្ថែមថា «ត្រូវធ្វើតាមក្តីសុបិនរបស់អ្នក ហើយកុំឲ្យនរណាម្នាក់យកវាចេញពីអ្នកឲ្យសោះ»៕