Jay Chou មុនបានច្រៀង គ្មានផ្ទះនៅ ហូបតែបាយសល់ពីគេ

2015-03-20 17:06:27
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀងតៃវ៉ាន់ Jay Chou និងភរិយា Hannah Quinlivan បានរៀបការជាមួយគ្នា៣ដងម្ដងនៅប្រទេសអង់គ្លេស ម្ដងនៅតៃវ៉ាន់ និងម្ដងទៀតនៅប្រទេសអូស្ត្រាលី ប៉ុន្តែក្នុងអាពាហ៍ពិពាហ៍ទាំង ៣លើកនេះ Jay Chou មិនបានអញ្ជើញអតីតអ្នកគ្រប់គ្រង Jacky Wu ឡើយ ដែលនាំឲ្យអ្នកគ្រប់គ្រងរូបនេះ រិះគន់ថា Jay Chou ជាមនុស្សរមិលគុណ។

ឆ្លើយតបការរិះគន់នេះ មិត្តភ័ក្ដិម្នាក់របស់ Jay Chou គឺតារាចម្រៀង Will Liu បានចេញមុខនិយាយការពារមិត្តរបស់ខ្លួន ថានៅពេលដែល Jay ចូលធ្វើការក្នុងក្រុមហ៊ុន Alfaរបស់លោក Jacky នៅឆ្នាំ២០០០ គេមិនបានធ្វើជាអ្នកចម្រៀងឡើយ គឺត្រឹមតែជាអ្នកនិពន្ធទំនុកច្រៀង និងបទភ្លេងតែប៉ុណ្ណោះ ហើយក៏មិនដែលទទួលការបង្ហាត់បង្រៀនពី Jacky ដើម្បីក្លាយជាអ្នកចម្រៀងប៉ុបដែរ។

Will បានបង្ហើបថាពេលនោះ Jay បានទទួលប្រាក់កម្រៃតិចតួចបំផុតពី Jacky ដែលមិនគ្រប់គ្រាន់សូម្បីតែសម្រាប់ទិញបាយហូប។ មិត្តភ័ក្ដិម្នាក់នេះបានបន្តទៀតថាកាលនោះ Jay ស្នាក់នៅកន្លែងធ្វើការ ប៉ុន្តែតែងតែមកប្រើប្រាស់បន្ទប់ទឹកនៅផ្ទះរបស់គេជានិច្ច ព្រោះនៅក្រុមហ៊ុនពិបាកពេក ហើយនៅពេលថ្ងៃ Jay ហូបតែបាយចានស្រាក់សល់ពី Will តែប៉ុណ្ណោះ។ Jay Chou ស្ថិតក្នុងស្ថានភាពបែបនេះ ៣ឆ្នាំ ទម្រាំមានឱកាសចេញអាល់ប៊ុមចម្រៀងផ្ទាល់ខ្លួន។ Will និយាយថា “Jay មិនមែនជាមនុស្សឆ្មើង និងរមិលគុណឡើយ”។ លោកបានលើកឧទាហរណ៍ថា ក្រោយពីមានឈ្មោះល្បី Jay បានអញ្ជើញលោកឲ្យមកសម្ដែងរឿងជាមួយគ្នា និងបានជួយឧបត្ថម្ភលោកដើម្បីបើកកន្លែងហាត់ប្រាណមួយទៀតផង។

មកដល់ពេលនេះ Jay Chou បានក្លាយជាតារាចម្រៀងកំពូលម្នាក់នៅតៃវ៉ាន់ ក៏ដូចជានៅអាស៊ី ហើយអាល់ប៊ុមចម្រៀងរបស់គេអាចលក់ដាច់ជាង ៣០លានបន្ទះហើយជុំវិញពិភពលោក។ គេហទំព័រ Channelnewsasiaបានចុះផ្សាយនៅឆ្នាំ២០១៥នេះថា តារាវ័យ ៣៦ឆ្នាំរូបនេះ មានទ្រព្យសម្បត្តិសរុបជាង ១៥៨លានដុល្លារ ៕