១០យ៉ាង គួរដឹងពីកីឡាករចំណូលថ្មី Liverpool ជម្រើសជាតិប្រេស៊ីល Firmino
- 2015-06-26 14:00:15
- ចំនួនមតិ 0 | ចំនួនចែករំលែក 0
១០យ៉ាង គួរដឹងពីកីឡាករចំណូលថ្មី Liverpool ជម្រើសជាតិប្រេស៊ីល Firmino
ចន្លោះមិនឃើញ
ក្លិបហង្សក្រហម Liverpool បានប្រកាសទិញបានតារាវ័យក្មេងក្រុមជម្រើសជាតិប្រេស៊ីល Roberto Firmino របស់ Hoffenheim កាលពីថ្ងៃពុធ នូវតម្លៃថ្លៃបំផុតទី២ ក្នុងប្រវត្តិសាស្ត្រក្លិប ២៩លានផោន (ជាង៤៥,៦លានដុល្លារ) ហើយកីឡាកររូបនេះ នឹងពាក់អាវលេខ១១ នារដូវកាលថ្មី។
Firmino ដែលបច្ចុប្បន្នកំពុងជាប់ភារកិច្ច ជាមួយក្រុមជម្រើសជាតិប្រេស៊ីល កំពុងលេង Copa America នៅប្រទេសឈីលី ត្រូវបានគេព្យាករថា នឹងក្លាយជាតារាលេចធ្លោមួយរូបនាពេលខាងមុខ និងជឿថា ការទិញកីឡាករជម្រើសជាតិសាំបា របស់ហង្សក្រហមមួយនេះ ជាការទិញចូលដ៏ល្អបំផុតមួយ ដែលអាចជួយឲ្យក្លិបរីកចម្រើនជាងមុនបាន។
ខាងក្រោមនេះ គឺជារឿង១០យ៉ាង ដែលអ្នកគួរតែស្វែងយល់ពីកីឡាករ ដែលនឹងបង្ហាញមុខនៅ English Premier League នារដូវកាលថ្មី២០១៥/១៦៖
១. ថ្ងៃខែឆ្នាំកំណើត៖ Firmino កើតថ្ងៃទី០២ ខែតុលា ឆ្នាំ១៩៩១ នាទីក្រុង Maceio ប្រទេសប្រេស៊ីល។ ថ្ងៃខែកំណើតរបស់កីឡាករវ័យ២៣ឆ្នាំរូបនេះ គឺដូចទៅនឹងវីរបុរសប្រេស៊ីលលោក Mario Zagallo ដែលធ្លាប់ជួយឲ្យប្រេស៊ីល លើកពាន World Cup ៣សម័យកាល (កីឡាករ២ដង, គ្រូបង្វឹក១ដង)។ ចៃដន្យផងដែរ ថ្ងៃខែកំណើតនេះ ក៏ដូចទៅនឹងមេដឹកនាំដ៏ល្បី និងជាបិតាសន្តិភាពឥណ្ឌា មហាត្មះគន្ធី ផងដែរ។
២. ការចាប់ផ្តើមអាជីព៖ Firmino ចាប់ផ្ដើមអាជីពជាកីឡាករបាល់ទាត់ដំបូង លេងជាខ្សែបម្រើការពារ ឲ្យក្លិបនៅស្រុកកំណើត Clube de Regatas Brasil មុនពេលផ្ទេរទៅក្លិប Figueirense វ័យ១៧ឆ្នាំ។ នៅឆ្នាំ២០១០ ខ្សែបម្រើរូបនេះ បានជាប់ឈ្មោះលេងនៅឈុតធំក្រុម Figueirense ហើយ១រដូវកាលដំបូង Firmino ជួយឲ្យក្រុមឡើងពីក្របខ័ណ្ឌ Serie B ទៅ Serie A លើកដំបូង បន្ទាប់ពីខកខាននៅលីកកំពូល២ឆ្នាំ។
៣. គ្រាប់ដំបូងនៅអឺរ៉ុប៖ រកគ្រាប់បញ្ចូលទីដំបូងនៅអឺរ៉ុប គឺជាគ្រាប់បាល់ជ័យជម្នះជួយឲ្យក្រុម Hoffenheim ឈ្នះ Eintracht Frankfurt ១-០ នៅ Bundesliga។
៤. ត្រូវក្លិបបញ្ឈរជើង៖ Firmino ត្រូវបានក្លិប Hoffenheim បញ្ឈរជើងម្ដង កាលពីខែវិច្ឆិកា ឆ្នាំ២០១១ ដោយសាររឿងយឺតយ៉ាវអត់បានទៅហ្វឹកហាត់។
៥. Idol របស់ខ្លួន៖ Idol របស់ Firmino តាំងពីតូចមកគឺ Ronaldinho ប៉ុន្តែរូបគេក៏ធ្លាប់និយាយថា ចូលចិត្តស្ទីលលេងរបស់ Ronaldo, Romario និង Rivaldo ផងដែរ។
៦. ឈ្នះពានរង្វាន់ល្អឯកជន៖ ខ្សែបម្រើប្រយុទ្ធរូបនេះ ធ្លាប់ត្រូវបានគេបោះឆ្នោតឲ្យជាប់ក្នុងពានរង្វាន់ ‘Breakthrough of the Year’ របស់លីកកំពូលអាល្លឺម៉ង់ កាលរដូវកាល២០១៣/១៤ បន្ទាប់ពីស៊ុតបាន១៦គ្រាប់ និង assists ១២ដង ក្នុងការបង្ហាញខ្លួន ៣៣ប្រកួតជាមួយក្រុម Hoffenheim។
៧. សុខភាពល្អរឹងមាំ៖ កីឡាករប្រេស៊ីលរូបនេះ មានសុខភាពល្អណាស់ និងបញ្ហារបួសស្ទើរតែគ្មានសោះ ដោយនៅ Bundesliga មាន៣៤ប្រកួត រូបគេលេងបានដល់ទៅ ៣៣ប្រកួតសម្រាប់ ៣រដូវកាលចុងក្រោយនេះ។
៨. តម្លៃថ្លៃដាច់គេនៅអាល្លឺម៉ង់៖ តម្លៃផ្ទេរទៅ Liverpool ២៩លានផោន ឬ៤១លានអឺរ៉ូ (ជាង៤៥,៦លានដុល្លារ) គឺជាតម្លៃថ្លៃខ្ពស់ដាច់គេនៅក្នុងប្រវត្តិសាស្ត្រ លីកកំពូលអាល្លឺម៉ង់ Bundesliga។
៩. ធ្លាប់ទៅលេងនៅឥណ្ឌា៖ Firmino ធ្លាប់ទៅលេងនៅប្រទេសឥណ្ឌា១ប្រកួត ពេលដែលក្រុម Hoffenheim ធ្វើដំណើរទៅប្រកួតទេសចរណ៍ និងយកឈ្នះលើក្រុម Mizoram All-Stars XI ៣-០។
១០. អ្នកគាំទ្រប្រេស៊ីលស្រលាញ់ខ្លាំង៖ កីឡាករវ័យក្មេងរូបនេះ បានធ្វើឲ្យអ្នកគាំទ្រប្រេស៊ីលស្រលាញ់ខ្លាំង តាំងពីស៊ុតបញ្ចូលទីគ្រាប់ដំបូង លើក្រុមអូទ្រីស កាលឆ្នាំមុន ជួយឲ្យប្រេស៊ីលឈ្នះ ២-១ ក្នុងការប្រកួតមិត្តភាព។ Firmino ជាប់ជម្រើសជាតិលើកដំបូងកាលឆ្នាំ២០១៤ និងស៊ុតបាន៤គ្រាប់ ក្នុងការបង្ហាញខ្លួន៩ប្រកួតឲ្យសាំបា។
ក្រៅពីចំណុចខាងលើនេះ ម្ដាយរបស់ Firmino អ្នកស្រី Cícera ធ្លាប់បានប្រាប់ដល់ទូរទស្សន៍ក្នុងស្រុកថា កាលនៅតូចកូនអ្នកស្រីធ្លាប់គេងឱបបាល់ និងលួចចេញទៅហ្វឹកហាត់តាំងពីម៉ោង ០៥:០០នាទីព្រឹក ដោយសារចង់លេងបាល់ខ្លាំង។
រីឯគ្រូបង្វឹករបស់ Firmino ដំបូងបង្អស់ លោក Guilherme Farias ធ្លាប់និយាយកាលពីដើមខែនេះថា មានគ្រាមួយ ដោយសារតែឪពុករបស់ខ្លួនត្រូវគេបញ្ឈប់ពីការងារ និងម្ដាយជាមេផ្ទះ ធ្វើឲ្យគ្រួសាររបស់កីឡាកររូបនេះខ្វះខាតយ៉ាងខ្លាំង ដល់ថ្នាក់ Firmino ខ្ចីលុយរបស់លោក ពេលទៅហ្វឹកហាត់ម្តងៗក៏មាន។
យ៉ាងណាមិញ យើងនឹងចាំមើលវាសនារបស់កីឡាកររូបនេះ នៅទឹកដីអង់គ្លេសជាមួយនឹងក្រុមហង្សក្រហម នឹងទៅជាយ៉ាងណាទៀត នៅរដូវកាលថ្មីខាងមុខនេះ៕
ចុះប្រិយមិត្តជឿថា Firmino នឹងលេងបានល្អ ឬអត់នៅ Liverpool?
-ចុចអាន៖ Ronaldinho៖ Firmino& Coutinho ខ្សែបម្រើជា “ក្ដីសុបិន” សម្រាប់ខ្សែប្រយុទ្ធ Liverpool
-ចុចអាន៖ Liverpool ព្រមព្រៀងទិញ Firmino តម្លៃថ្លៃបំផុតទី២ ប្រវត្តិសាស្ត្រក្លិប
ប្រែសម្រួល៖ វិន ជីវ័ន្ត ប្រភព៖ mirror, sportskeeda, wikipedia