កន្ធាយសមុទ្រលើកគ្នាឡើងគោក ក្រោយអ្នកទេសចរសម្រុកទៅលេង

2015-09-16 21:26:31
ចំនួនមតិ 0 | ចំនួនចែករំលែក 0

ចន្លោះមិនឃើញ

កន្ធាយសមុទ្ររាប់ពាន់ក្បាលត្រូវបានគេប្រទះឃើញនាំគ្នាឡើងឆ្នេរ ក្រោយភ្ញៀវទេសចរសម្រុកទៅលេងយ៉ាងណែនណាន់តានតាប់នៅឆ្នេរសមុទ្រ Ostional Wildlife Refuge ប្រទេសកូស្តារីកា។ តើកន្ធាយទាំងនោះលើកគ្នាទាំងហ្វូង ដើម្បីស្វាគមន៍ភ្ញៀវទេសចរដែលមកលេងតំបន់របស់ខ្លួន ឬយ៉ាងណា?

ចម្លើយគឺមិនមែនទេ ពួកវាបានចាកចេញពីផ្ទៃទឹកព្រមៗគ្នា ដើម្បីទៅក្រាបពង ព្រោះខ្លាចក្រុមអ្នកទេសចរលួចយកពងរបស់វា។ ការនាំគ្នាសម្រុកទៅលេងច្រើនបែបនេះ គឺជាការបង្អាក់ដល់រដូវក្រាបពងប្រចាំឆ្នាំរបស់សត្វកន្ធាយ។ ចំនួនអ្នកទេសចរដ៏ច្រើនមិនធ្លាប់មានពីមុន ដែលបានទៅលេងឆ្នេរសម្រាប់ខែនេះ ហើយមានអ្នកខ្លះបានចូលទៅកាន់ទីតាំងហាមឃាត់ ដើម្បីបានមើលឃើញកន្ធាយរាប់ពាន់ក្បាលក្រាបពងនេះតែម្ដង។

ភ្ញៀវទេសចរបានឈរតាមផ្លូវ ដៃអាចប៉ះអង្អែលខ្នងកន្ធាយ ដាក់ក្មេងតូចៗលើខ្នងកន្ធាយ និងអាចថតរូបយ៉ាងរំភើបរីករាយ។ សកម្មភាពបែបនេះហើយធ្វើឲ្យកន្ធាយមួយចំនួនភ័យស្លន់ស្លោ បានត្រឡប់ចូលទឹកសមុទ្រវិញដោយមិនបានក្រាបពង។

ក្រោយឃើញហេតុការណ៍នេះកើតឡើង អាជ្ញាធរប្រទេសកូស្តារីកា បានចាប់ផ្ដើមស៊ើបអង្កេតបន្ទាន់មួយទៅលើក្រុមមនុស្ស ដែលបានប្រព្រឹត្តិអាកប្បកិរិយាមិនសមរម្យ ទៅលើអំបូរសត្វងាយរងគ្រោះទាំងនេះ។

បើយោងទៅតាមមូលនិធិសត្វព្រៃពិភពលោក បានឲ្យដឹងថាតំបន់ឆ្នេរ Ostional Wildlife Refuge ជាតំបន់មួយក្នុងចំណោមតំបន់ពីរសំខាន់ៗក្នុងលោកជាសំបុកកន្ធាយក្រាបពង។ ទោះជាការប្រមូល និងការលក់ពងសត្វកន្ធាយស្របច្បាប់នៅទីនោះក្ដី មនុស្សទាំងអស់ត្រូវអនុញ្ញាតត្រឹមតែបីថ្ងៃដំបូងនៃរដូវក្រាបពងប៉ុណ្ណោះ៕