ចំណាយពេល ១០ ឆ្នាំទើបក្លាយជាជាងចម្លាក់

2015-10-20 17:31:41
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលបើអ្នកបានធ្វើដំណើរពីភ្នំពេញតាមផ្លូវជាតិលេខ ៣ មកដល់វិទ្យាល័យ ១ ឧសភា នោះមានន័យថា អ្នកកំពុងស្ថិតនៅលើទឹកដី នៃខេត្តតាកែវហើយ។ ហើយបើសិនជាអ្នកក្រឡេកភ្នែកថយក្រោយប្រមាណជា ៥០ ម៉ែត្រ អ្នកប្រាកដជាប្រទះភ្នែកនឹងដុំថ្មរាយប៉ាយ ពីមុខរោងមួយខ្នងដែលបាំងដែកជាជញ្ជាំង ។ ថ្មទាំងនោះមានខ្លះ លេចចេញជារូបរាងពិតប្រាកដ ឯខ្លះទៀតគ្រាន់តែមានទ្រង់ទ្រាយជារូបដែលយើងអាចសម្គាល់បានថា ជារាងរបស់ព្រះស្ថិតក្នុងឥរិយាបថពែនភ្នែន និង មានដុំថ្មមួយចំនួនទៀតមិនទាន់ច្នៃនៅឡើយ។

វុធ គឺជា ឈ្មោះរបស់ម្ចាស់រោង និង ជាជាងចម្លាក់ ក្នុងភូមិតាលឿ ឃុំឧត្តមសូរិយា ស្រុកត្រាំកក់ ខេត្តតាកែវ ហើយវុធបានប្រើពេល ១០ ឆ្នាំ ដើម្បីក្លាយជាជាងចម្លាក់ស្ទាត់ជំនាញ។ វុធបានប្រាប់ថា គាត់បានបញ្ចប់បរិញ្ញាបត្រផ្នែកចម្លាក់ ពីសកលវិទ្យាល័យភូមិន្ទវិចិត្រសិល្បៈក្នុងឆ្នាំ ២០០៦ តែដោយសារតែក្នុងសាលាភាគច្រើនរៀនបានតែទ្រឹស្តី និង ការអនុវត្តមិនសូវមាន ក្រោយបញ្ចប់បរិញ្ញាបត្រ គាត់ក៏សម្រេចចិត្តចូលរៀនជាមួយជាងចម្លាក់បន្តទៀត ដើម្បីបានអនុវត្តឲ្យថ្នឹកក្នុងការងារនេះ។ ដោយចំណាយពេលប្រមាណជា ៥ ឆ្នាំបន្ថែមទៀត ទើបគាត់អាចចេញមកប្រកបអាជីវកម្មនេះដោយទំនុកចិត្តបាន។ មកទល់សព្វថ្ងៃនេះ វុធបានបើកអាជីវកម្មចម្លាក់នេះបាន ២ ឆ្នាំ ហើយ ហើយឥឡូវគាត់មានកូនជាង ដែលមករៀនជាមួយគាត់ បីនាក់ដែរ ដោយគិតឈ្នួលបង្រៀន ១០០ ដុល្លារ ក្នុង ១ ខែ សម្រាប់អ្នកមិនចេះសោះ។ ម៉្យាងវិញទៀត ក្នុងករណីដែលអតិថិជនគាត់ ប្រញាប់ចង់បានឆាប់ ជាងវុធត្រូវប្រញឹកដៃធ្វើជាងធម្មតា និងត្រូវជួលគេថែមទៀត ដើម្បីឲ្យទាន់ពេល។ ភាគច្រើនបដិមារដែលធ្វើ គឺ មានអតិថិជនមកកុម្មង់មុន។

ជាងចម្លាក់សម្តីតិចរូបនេះបានបញ្ជាក់ថា គាត់អាចឆ្លាក់បានគ្រប់យ៉ាងតាមតម្រូវការ មិនថា ជាថ្ម ឈើ ខ្នាយ ភ្លុក ឬ បណ្តោង ។ គាត់អាចឆ្លាក់បានជារូបមនុស្ស សត្វ វត្ថុ បដិមារសម្រាប់សក្ការៈ ក្នុងសាសនាព្រះពុទ្ធ ចិន ឬ ឥស្លាមទេ និយាយជារួម គឺឆ្លាក់បានទាំងអស់ លើកលែងតែគ្រឿងអលង្ការជាដើមដែលគាត់មិនទទួលធ្វើ។

ថ្មទាំងអស់ គឺទិញគេ ដឹកតាំងពីបន្ទាយមានជ័យ គឺពីស្រុកព្រះនេត្រព្រះ មកម៉្លេះ ឯតម្លៃផ្សេងៗគ្នាទៅតាមទំហំតូច ឬធំ ខ្លះ។ វុទ្ធប្រាប់ថា បើរូបធំអាចចំណាយពេលជាងមួយខែ តែបើរូបតូចល្មម អាចប្រើពេលតែមួយអាទិត្យ។ មេជាងខាងលើបន្ថែមថា បដិមារទាំងអស់ មិនមែនគាត់ឆ្លាក់តែម្នាក់ឯងទេ គឺមានការជួយពីកូនជាងរបស់គាត់ដែរ ដើម្បីឲ្យកូនជាងរបស់ គាត់ឆាប់ស្ទាត់ជំនាញដែរ តាមរយៈការអនុវត្តផ្ទាល់តែម្តង។ ជាងវុធ បានបន្ថែម៕