រមណីយដ្ឋានធម្មជាតិទឹកជ្រោះអាស្រមហោង

2015-11-06 16:51:06
ចំនួនមតិ 0 | ចំនួនចែករំលែក 0

ចន្លោះមិនឃើញ

ហោងជារមណីយដ្ឋានទឹកធ្លាក់ធម្មជាតិដ៏ស្រស់ស្អាតមួយរបស់ខេត្តត្បូងឃ្មុំ ក៏ប៉ុន្តែរមណីយដ្ឋាននេះមិនសូវជាមានអ្នកចម្ងាយស្គាល់ទេ ព្រោះវានូវកំបាំងឆ្ងាយពីផ្លូវជាតិ និងដោយកង្វះខាតការផ្សព្វផ្សាយផង លើកលែងតែប្រជាពលរដ្ឋក្បែរនោះ ដែលស្គាល់ទីនោះច្បាស់ មួយវិញទៀតដោយសារផ្លូវចូលមានភាពក្រវៀចក្រវៀន ចំណែកស្លាកសញ្ញាបង្ហាញផ្លូវមិនគ្រប់គ្រាន់។

រមណីយដ្ឋានអាស្រមហោងស្ថិតនៅក្នុងឃុំទឹកជ្រៅ ស្រុកតំបែរ ខេត្តត្បូងឃ្មុំ មានចម្ងាយប្រមាណ១៩០គីឡូម៉ែត្រពីភ្នំពេញ និង មានផ្លូវចូលបីកន្លែង ដូចជា តាមផ្សារស្ទឹង(ភូមិស្ទឹង) តាមផ្លូវរបស់ចំការកៅស៊ូក្រែក (ផ្លូវបំបែកពញាក្រែក បត់ឆ្វេង១០០ ម៉ែត្រ) និង តាមផ្សារជីពាំង (ភូមិជីពាំង)។ ផ្លូវទាំងបីនេះស្ថិតក្នុងឃុំក្រែក ស្រុកពញាក្រែក ខេត្តត្បូងឃ្មុំ ។ ទោះជាយ៉ាងណាផ្លូវទាំងបីនឹងទៅប្រសព្វគ្នានៅភូមិក្រសាំងដូចគ្នា។ ផ្លូវតាមចម្ការកៅស៊ូក្រែកល្អជាងគេ ក្នុងចំណោមផ្លូវទាំងបី ។ ចម្ងាយផ្លូវពីថ្នល់ជាតិទៅដល់ហោងមានប្រវែងប្រហែលជា ៣០ គីឡូម៉ែត្រ។

លោកតា អ៊ាត ថា គឺជាគណៈកម្មការវត្តប្រចាំរមណីយដ្ឋាននេះ បានមានប្រសាសន៍ថា នៅឆ្នាំ១៩៩៣ ហោងចាប់ផ្តើមអភិវឌ្ឍន៍ និងកែលម្អរហូតដល់បច្ចុប្បន្នបង្កើតបានវត្តមួយហៅថា វត្តគុហារសីលាមហាបូរមីគង្គារហោង និង សមទ្ធិផលជាច្រើនជាច្រើនទៀត សព្វថ្ងៃនេះមានព្រះសង្ឃ៣អង្គគង់ក្នុងវត្តនេះ។

លោកតា អ៊ាត ថា គឺជាគណៈកម្មការវត្តប្រចាំរមណីយដ្ឋាន

ចំណុចដ៏គួរចាប់អារម្មណ៍ដែលអ្នកដំណើរបច្ចុប្បន្នមិនដឹងនោះគឺថា កាលដើមឡើយហោងហ្នឹងមានរូងតូចនៅក្រោមផ្ទាំងថ្មដ៏ធំមួយ ងងឹតរកមើលអ្វីមិនយល់ បើចង់ចុះទៅកាន់រូងនោះ ត្រូវចុះតាមផ្ទាំងថ្ម តោងវល្លិ៍ តែក្រោយមកការអភិវឌ្ឍបានកែប្រែរូងនោះឲ្យធំទូលាយ មានជណ្ដើរឡើងចុះងាយស្រួល ហើយមានសង់ជាបន្ទប់ពីរបី ព្រមទាំងកន្លែងសម្រាប់តម្កល់បដិមារទុកគ្រាន់អ្នកផងទាំងឡាយគោរព បូជា ដូចដែលមានពេលបច្ចុប្បន្ន នេះ។

តើអ្នកទេសចរទៅរមណីយដ្ឋានហោងដើម្បីអ្វី?

ចម្លើយគឺទៅលេងទឹកធ្លាក់។ ទឹកធ្លាក់កម្ពស់ប្រមាណជា ៨ម៉ែត្រ និងមុខទឹកហូរប្រមាណជាង ១០ ម៉ែត្រ និងមានជម្រៅចាប់ពី១.៥ម៉ែត្រ ទៅជិត ៤ម៉ែត្រ ដែលទឹកប៉ុណ្ណេះអាចនាំកាយ នាំចិត្តអ្នកទេសចរឲ្យរីករាយសប្បាយភ្លេចអស់ក្ដីនឿយណាយបាន។ តាមធម្មតា ទឹកហូរនៅខាងលើ និងទឹកធ្លាក់ខាងក្រោមសុទ្ធតែមានមនុស្សលេងច្រើនដូចគ្នា តែបើអ្នកចង់ហែលទឹកត្រូវទៅខាងក្រោមវិញ។

“ខែបុណ្យទានមានមនុស្សមកលេងច្រើនណាស់ ពេញទឹកតែម្ដង ទាំងខាងលើទាំងក្រោម តែបើថ្ងៃធម្មតាខ្សត់មនុស្ស ទោះថ្ងៃអាទិត្យក្តី” លោកតាអ៊ាត ថា បានប្រាប់។

ពីមុនហោងគ្មានកន្លែងលក់នំចំណីទេ តែបច្ចុប្បន្នមានតូប ៦-៧ លក់នំចំណីនៅរដូវបុណ្យទាន តែគ្មានគេលក់បាយម្ហូបទេ បើអ្នកចង់ទៅលេងហោង ដូច្នេះអ្នកដែលមានបំណងមកលេងទឹកជ្រោះហោងគួររៀបចំម្ហូបអាហារសម្រាប់បរិភោគផង។

“សូមសំណូមពរដល់អ្នកទេសចររទាំងអស់ ពេលមកលេងនៅទីនេះ សូមមេត្តាជួយរក្សាអនាម័យផង ព្រោះកន្លែងយើងមិនទាន់មានធុងសំរាមគ្រប់គ្រាន់ទេ ហើយអំពាវនាវដល់សប្បុរសជន ជាពិសេសស្ថាប័នពាក់ព័ន្ធ មេត្តាជួយធ្វើផ្លូវថ្នល់ ដាក់ស្លាកសញ្ញាសំគាល់រមណីយដ្ឋាន និងធុងសំរាម ព្រោះយើងនៅខ្វះច្រើនយ៉ាងណាស់"។ លោកតា អ៊ាត ថា បន្ថែមជាចុងក្រោយ៕