៨ចំណុចគួរស្វែងយល់ សម្រាប់អ្នកចង់ធ្វើដំណើរក្រៅប្រទេសតែម្នាក់ឯង
- 2015-12-21 20:59:16
- ចំនួនមតិ 0 | ចំនួនចែករំលែក 0
៨ចំណុចគួរស្វែងយល់ សម្រាប់អ្នកចង់ធ្វើដំណើរក្រៅប្រទេសតែម្នាក់ឯង
ចន្លោះមិនឃើញ
ការធ្វើដំណើរកម្សាន្តទៅបរទេស មិនថាប្រទេសឆ្ងាយ ឬប្រទេសជិតក្បែរខាងនោះទេ អ្នកចាំបាច់រៀបចំឲ្យបានល្អ ដើម្បីទទួលបានដំណើរកម្សាន្តលំហែកាយដ៏រីករាយក្នុងជីវិត។ ការស្វែងយល់ពីកន្លែងដែលអ្នកត្រូវទៅ ការរៀបចំឯកសារ និងថវិកាគ្រប់គ្រាន់ ជារឿងមួយមិនអាចខ្វះបាន។ ខាងក្រោមនេះជាចំណុចមួយចំនួនដែលគួរត្រៀមខ្លួនសម្រាប់ដំណើរកម្សាន្តរីករាយនោះ។
១. ស្វែងរកយល់ព័ត៌មានពីទីតាំងត្រូវទៅ
ដំណើរកម្សាន្តទៅក្រៅប្រទេសតែម្នាក់ឯង ត្រូវប្រាកដថាអ្នកយល់ដឹង និងស្គាល់ច្រើនពីតំបន់ភូមិសាស្ត្រដែលត្រូវទៅ។ កន្លែងស្នាក់នៅ ភោជនីយដ្ឋាន កន្លែងទេសចរណ៍ តំបន់គួរប្រុងប្រយ័ត្នមួយចំនួននៅទីនោះ។ អ្នកក៏គួរសួរព័ត៌មានមួយចំនួនពីបងប្អូន មិត្តភ័ក្ដិ ឬអ្នកដែលធ្លាប់ទៅក្រៅប្រទេសនោះ។ ដូចនេះអ្នកអាចរៀបចំពីគម្រោងកាលវិភាគសម្រាប់កន្លែងទៅដើរលេងបានល្អ។
២. បើកមើលព័ត៌មានទាក់ទងកន្លែងដែលត្រូវទៅ
ដឹងពីព័ត៌មានថ្មីៗ ទាក់ទងនឹងអាកាសធាតុ ព័ត៌មានសន្តិសុខ អំពីតំបន់រមណីយដ្ឋានដែលអ្នកនឹងទៅ ជៀសវាងពីកន្លែងអសន្តិសុខ ឬបញ្ហាអាកាសធាតុទាំងនោះ។
៣. ត្រៀមរបស់ចាំបាច់សម្រាប់ការធ្វើដំណើរ
អ្វីដែលអ្នកភ្លេចមិនបាននោះគឺលុយ។ ដំណើរកម្សាន្តនៅក្រៅប្រទេស គប្បីដូរលុយជារូបិយប័ណ្ណប្រទេសដែលអ្នកត្រូវទៅ។ ឯកសារមួយចំនួនសម្រាប់ ទៅបរទេស ដូចជាលិខិតឆ្លងដែន ទិដ្ឋាការ សំបុត្រយន្តហោះ និងឯកសារសំខាន់ៗ អ្នកគួររៀបចំទុកមុននិងពិនិត្យកាលបរិច្ឆេទឲ្យបានត្រឹមត្រូវ។ សំលៀកបំពាក់មួយចំនួន និងថ្នាំសង្កូវខ្លះៗ ដែលអ្នកគួរមាន។
៤. រៀននិយាយពាក្យឬឃ្លាមួយចំនួន
សម្រាប់អ្នកធ្វើដំណើរទៅប្រទេសណាមួយ គប្បីរៀននិយាយពាក្យ ឬភាសានៃប្រទេសនោះខ្លះៗ ។ ប្រទេសមួយចំនួនអាច មានប្រជាជនក្នុងតំបន់ខ្លះមិនប្រើប្រាស់ភាសាអង់គ្លេស ដូចនេះបើចេះភាសា ខ្លះគឺងាយស្រួលសម្រាប់អ្នក សួរពីព័ត៌មាន និងទំនាក់ទំនងជាមួយអ្នករស់នៅទីនោះ។
៥. ទៅដល់ព្រលានយន្តហោះមុនម៉ោង
សម្រាប់ជើងហោះហើរលក្ខណៈអន្តរជាតិ គប្បីទៅដល់ព្រលានយន្តហោះឲ្យបានមុន យ៉ាងតិច៣ម៉ោងមុនជាការប្រសើរ ចៀសវាងការបញ្ហាយឺតយ៉ាវ ឬខកខានជើងយន្តហោះដោយបញ្ហាណាមួយ។
៦. កក់សំបុត្រជើងយន្តហោះធ្វើដំណើរឥតឈប់ ( Non-Stop Flight)
ជាការសន្សំសំចៃថវិកា សម្រាប់ដំណើរក្រៅប្រទេសអ្នកគួរជ្រើសរើសជើងយន្តហោះទៅកាន់គោលដៅផ្ទាល់ (ប្រសិនបើមាន) ដើម្បីចៀសវាងចំណាយច្រើនប្រសិនបើយកជើងហោះហើរឈប់ទៅកាន់កន្លែងច្រើន។ ៧. ស្មារតីប្រុងប្រយ័ត្ន
ដំណើរកម្សាន្តក្រៅប្រទេសតែម្នាក់ឯងដោយរីករាយ ត្រូវមានការប្រុងប្រយ័ត្នចំពោះរបស់ផ្ទាល់ខ្លួនរបស់អ្នកជានិច្ច។ របស់មានតម្លៃ ឧបករណ៍អេឡិចត្រូនិក ឯកសារសំខាន់ៗ មិនថានៅទីណា នៅប្រទេសណា ដើម្បីសុវត្ថិភាពក្នុងដំណើរកម្សាន្តរបស់អ្នក។
៨. ត្រៀមចិត្តជួបនឹងអ្វីថ្មី
អ្នកគួរត្រៀមចិត្តជានិច្ចថាអ្នកនឹងជួបប្រទះអ្វីថ្មី សម្រាប់ដំណើរកម្សាន្តក្នុងឬក្រៅប្រទេស។ បញ្ហាមួយចំនួន ដូចជាអាកាសធាតុ ម្ហូបអាហារ ប្រជាជនរស់នៅតំបន់នោះ ជាអ្វីដែលអ្នកនឹងជួប។ ចំណុចសំខាន់ទាំងនោះ អ្នកគប្បីត្រូវដឹងនិងស្វែងយល់ឲ្យបានច្រើន ដើម្បីឲ្យដំណើរកម្សាន្តតែម្នាក់ឯងមានភាពរីករាយ។
ចុចអាន៖
៤ ជំហាននាំអ្នកធ្វើដំណើរតាំងពីព្រលានដល់ប្រទេសគោលដៅយ៉ាងសុវត្ថិភាព
ប្រែសម្រួល៖ មាន រតនា ប្រភព៖ readersdigest,wikihow