ជំនឿប្លែកៗចំនួន ១០ប្រទេស អ្នកមិនធ្លាប់ដឹង
- 2016-03-15 13:05:19
- ចំនួនមតិ 0 | ចំនួនចែករំលែក 0
ជំនឿប្លែកៗចំនួន ១០ប្រទេស អ្នកមិនធ្លាប់ដឹង
ចន្លោះមិនឃើញ
អប្បិយជំនឿជាផ្នែកសំខាន់មួយនៃជីវិតរស់នៅប្រចាំថ្ងៃរបស់មនុស្សទូទៅ។ ពេលខ្លះជំនឿធ្វើឲ្យអារម្មណ៍ស្ងប់ ជឿជាក់ ហ៊ានប្រឈមមុខ តែខ្លះទៀតធ្វើឲ្យមនុស្សងប់ងុល គិតមិនបានវែងឆ្ងាយ ឬមិនឆ្លុះបញ្ចាំងពីតថភាពក្នុងសង្គម។
ទោះជាជំនឿមិនមានប្រភព ឯកសារបញ្ជាក់ច្បាស់លាស់ តែគេនៅតែឃើញកើតមាន និងប្រព្រឹត្តតៗគ្នាពីមនុស្សមួយជំនាន់ ទៅមួយជំនាន់ទៀត។ ខាងក្រោមនេះជាជំនឿខ្លះរបស់មនុស្សតាមប្រទេសនីមួយៗ ដែលភាគច្រើនយើងមិនសូវបានដឹង។
១. ថៃ៖ ព្រះភូមិ
តាមផ្ទះ និងអគារធ្វើការជាច្រើនក្នុងប្រទេសថៃ គេតែងឃើញមានដាក់ព្រះភូមិ នៅក្រៅអគារ ក្នុងអគារ ឬខាងក្រោយអគារ ដែលខ្ទមនេះមិនមែនជាការចម្លងដូចម៉ូតផ្ទះ ឬអគារនោះទេ តែជាម៉ូតប្រាសាទវិមានដ៏ស្គឹមស្កៃទៅវិញ។ គោលបំណងនៃការដាក់តាំងព្រះភូមិ គឺដើម្បីថែរក្សាការពារពីគ្រោះថ្នាក់រលំបាក់អគារ ឬផ្ទះមែនទែន។ ម្ចាស់លំនៅឋានតែងតែដាក់នំចំណី របស់របរនានា រួមមានតុក្កតាបោយដៃ ទឹក ស្រា បារី ដើម្បីទាក់ទាញម្ចាស់ទឹក ម្ចាស់ដី ម្រេញគង្វាល ឲ្យជួយថែរក្សាផ្ទះ ឬអគារខាងលើ។
២. ប្រេស៊ីល៖ ព្យួរកាបូបប៉ះកម្រាលឥដ្ឋ
ប្រជាជនប្រេស៊ីល ជឿថាការឲ្យកាបូបយួរ ឬកាបូបលុយប៉ះឥដ្ឋ វានឹងនាំសំណាងអាក្រក់ ឬនឹងជ្រុះបាត់លុយឆាប់ៗ។
៣. ចិន៖ លេខ៤ នាំគ្រោះ
លេខ ៤ ឬលេខកន្ទុយ៤ ផ្សេងៗទៀត ដូចជា ១៤, ២៤ ត្រូវគេជឿថាជាលេខនាំគ្រោះអាក្រក់ មិនគួរឲ្យជឿ ព្រោះចិនបញ្ចេញខ្យល់លេខបួន ស្រដៀងគ្នាទៅនឹងពាក្យស្លាប់។ បើនិយាយពីប្រទេសលោកខាងលិចវិញ លេខនាំគ្រោះ គឺជាលេខ ១៣ ឬ២៣ទៅវិញ។
៤. ដាណឺម៉ាក៖ ប្រមូលកែវ ចានបែកទុក
ចាន កែវផលិតពីព័រសឺឡែន ដែលប្រេះបែកហើយ ត្រូវគេប្រមូលទុកយ៉ាងស្រួល ដើម្បីគ្រវែងមុខផ្ទះនៅថ្ងៃចូលឆ្នាំសកល ដោយគេជឿថាគំនរព័រសឺឡែន នឹងនាំលាភហូរចូល។
៥. អេហ្ស៊ីប៖ បើកមុខកន្ត្រៃ ត្រូវតែកាត់អ្វីមួយ
ប្រសិនបើបើក ឬសង្កត់មុខកន្ត្រៃឲ្យចេញពីគ្នា ដោយមិនកាត់អ្វីសោះ នោះប្រជាជនអេហ្ស៊ីបជឿថានឹងគ្រោះអាក្រក់ដាក់ខ្លួន។ មួយទៀត បើដាក់កន្ត្រៃក្រោមខ្នើយគេង ដើម្បីកុំឲ្យយល់សប្ដិអាក្រក់។
៦. បារាំង៖ ជាន់លាមកឆ្កែជើងឆ្វេង
ប្រជាជនបារាំង មានជំនឿថាវានឹងនាំសំណាងល្អ ប្រសិនបើអ្នកជាន់លាមកឆ្កែនឹងជើងឆ្វេង តែសំណាងអាក្រក់ បើជាន់ជើងស្ដាំ។
៧. ជប៉ុន៖ ក្មេងៗត្រូវបាំងពោះ ពេលមានផ្គររន្ទះ
ក្មេងៗជប៉ុនត្រូវចាស់ៗប្រាប់ឲ្យយកអ្វីបាំងពោះ អំឡុងពេលមានផ្គររន្ទះ និងពិសេសពេលគេង ព្រោះគេជឿថាប្រសិនបើមិនប្រយ័ត្ន អាទិទេពផ្គរនឹងលួច ហើយស៊ីផ្ចិតពេលមានព្យុះភ្លៀង។
៨. កូរ៉េខាងត្បូង៖ បើកកង្ហារកៀកកន្លែងគេង
ប្រជាជនកូរ៉េខាងត្បូង ជឿថាការបើកកង្ហារក្នុងបន្ទប់ពេលគេងលក់ វានឹងសម្លាប់អ្នក ឬហៅ Fan Death។
៩. នីហ្សេរីយ៉ា៖ វាយនឹងអំបោស
ប្រសិនបើបុរសម្នាក់ត្រូវគេវាយនឹងអំបោស បុរសនោះត្រូវគេជឿថានឹងងាប់លិង្គ ឬលិង្គលែងដំណើរការ បើមិនចង់មានរឿងនេះកើតឡើង គេត្រូវវាយបកអ្នកនោះភ្លាមៗមិនក្រោម ៧ដងវិញ។
១០. លោកខាងលិច៖ ការដាក់ឈ្មោះកប៉ាល់ មិនឲ្យបញ្ចប់ដោយអក្សរ A
អ្នកដើរសមុទ្រជាច្រើនជឿថា កប៉ាល់ដែលមានឈ្មោះបញ្ចប់ដោយអក្សរ A នឹងនាំសំណាងអាក្រក់ពេលធ្វើដំណើរ។ ជំនឿនេះកើតឡើងតាំងពីកប៉ាល់ Lusitania and Britannia បានលិចក្នុងសង្គ្រាមលោកលើកទីមួយ។ ម្យ៉ាងទៀត ការដូរឈ្មោះកប៉ាល់ ក៏គេមានជំនឿថានឹងធ្វើឲ្យជួបគ្រោះលិចដែរ៕
ចុចអាន៖ ១១ យ៉ាងតាមជំនឿបុរាណ ដែលស្ត្រីមិនគួរធ្វើ មិនអញ្ចឹងទេ…
ចុចអាន៖ ជំនឿដែលពាក់ព័ន្ធជាមួយម្ដាយ និង ទារកទើបនឹងកើត
ចុចអាន៖ ជំនឿសុំកូននៅតែល្បី នៅវត្តវិហារសួគ៌
ប្រែសម្រួល៖ ឡេង ភារុណ ប្រភព៖ Listverse, Distractify