តម្លៃទុរេនកំពត ថ្លៃជាងទុរេននាំចូលពីវៀតណាម ៣ដង

2016-05-27 16:45:23
ចំនួនមតិ 0 | ចំនួនចែករំលែក 0

ចន្លោះមិនឃើញ

ខែទុរេនបានឈានចូលមកដល់ហើយ និងកំពុងដាក់លក់ព្រោងព្រាតនៅតាមទីផ្សារ ព្រមទាំងដងផ្លូវនានាក្នុងរាជធានីភ្នំពេញ។ ចំពោះតម្លៃវិញ ខុសៗគ្នាទៅតាមតំបន់ដែលទុរេននោះនាំចូល ដូចជា កំពត កំពង់ចាម និងទុរេនដែលនាំចូលពីប្រទេសវៀតណាមជាដើម។

តាមនារីវ័យក្មេងម្នាក់ ដែលកំពុងលក់ទុរេននៅមហាវិថីព្រះសីហនុ ជិតស្តុបពេទ្យចិន បានបញ្ជាក់ថា ទុរេនដែលខ្លួនកំពុងលក់ នាំមកពីខេត្តកំពង់ចាម មានតម្លៃ ១៥០០០រៀល។ ចំពោះទុរេនកំពត នៅពេលនេះមិនទាន់សម្បូរនៅឡើយទេ ហើយអាចដាក់លក់តម្លៃរហូតដល់ ២៨០០០រៀល។

ប្អូនស្រីបានបន្ថែមទៀតថា មិនបានយកទុរេនវៀតណាមមកលក់ឡើយ ប៉ុន្តែធ្លាប់ដឹងតម្លៃនាំចូលនៅផ្សារដើមគរ ត្រឹម ៥០០០ ទៅ ៦០០០រៀលប៉ុណ្ណោះ។ អាជីវករយកទុរេនវៀតណាមមកដាក់លក់វិញក្នុងតម្លៃចន្លោះពី ៨០០០ ទៅ ១ម៉ឺនរៀល។

ខែដែលសម្បូរទុរេនបំផុត គឺចាប់ពីខែមេសា រហូតដល់ខែកក្កដា ខណៈដែលខែសីហា និងកញ្ញាចាប់ផ្ដើមខ្សត់ខ្សោយទៅវិញបន្តិច។ ចំពោះទុរេនកំពត ខុសពីទុរេនកំពង់ចាម ព្រោះខែនេះនៅមិនទាន់សម្បូរនៅឡើយទេ ទើបមានតិចតួចប៉ុណ្ណោះ ដែលនាំឲ្យតម្លៃថ្លៃ៕

ចុចអាន៖ រៀនធ្វើបង្អែមបាយដំណើបសង់ខ្យាទុរេន ងាយៗ

អត្ថបទ៖ គង់ វិសាល