ទៅលេងសិង្ហបុរីចង់ធ្វើដំណើរឆ្ងាយជិតអស់លុយតិច ទិញកាត Special day pass
- 2016-07-22 18:05:37
- ចំនួនមតិ 0 | ចំនួនចែករំលែក 0
ទៅលេងសិង្ហបុរីចង់ធ្វើដំណើរឆ្ងាយជិតអស់លុយតិច ទិញកាត Special day pass
ចន្លោះមិនឃើញ
សិង្ហបុរីជាប្រទេសមានការអភិវឌ្ឍជឿនលឿន។ ការរស់នៅប្រទេសស៊ីវិល័យនេះមានការចំណាយខ្ពស់ មិនថាលើសេវាកម្មនិងរបស់របរប្រើប្រាស់ប្រចាំថ្ងៃ។
កញ្ញា យាន សៀងលីដេត និស្សិតខ្មែរដែលកំពុងសិក្សាជំនាញវិទ្យាសាស្ត្រកុំព្យូទ័រនៅសាកលវិទ្យាល័យបច្ចេកវិទ្យា ណានយ៉ាង (Nanyang Technological University) ឲ្យដឹងថា សិង្ហបុរីជាប្រទេសកូនកោះតូច ដែលមានខឿនសេដ្ឋកិច្ចអភិវឌ្ឍខ្លាំង ហើយពលរដ្ឋរស់នៅក្នុងជីវភាពធូធារ។ ជាប្រទេសដែលជឿនលឿននិងជាគោលដៅសម្រាប់អ្នកធ្វើជំនួយ ការរស់នៅក្នុងប្រទេសនេះមានការការចំណាយខ្ពស់។
កញ្ញាថា ភ្ញៀវទេសចរដែលមកលេងប្រទេសសិង្ហបុរី ត្រូវការធ្វើដំណើរច្រើន និងចង់កាត់បន្ថយការចំណាយ កញ្ញាណែនាំឲ្យប្រើប្រាស់កាតធ្វើដំណើរពិសេស Special day pass ដែលកាតនេះអាចប្រើប្រាស់សេវាដឹកជញ្ជូនសាធារណៈឥតកំណត់ ទៅកម្សាន្តគោលដៅទេសចរនានាទូទាំងទីក្រុងដ៏ទំនើបនេះ។
លីដេតបន្តថា សេវាធ្វើដំណើរក្នុងប្រទេសសិង្ហបុរីមានតម្លៃថ្លៃដូចជាតាក់ស៊ីជាដើម។ ប៉ុន្តែភ្ញៀវទេសចរអាចជ្រើសរើសមធ្យោបាយធ្វើដំណើរ ដោយប្រើប្រាស់សេវាដឹកជញ្ជូនសាធារណៈដែលមានតម្លៃធូរថ្លៃ និងមានភាពងាយស្រួល។
កាត Special day pass សម្រាប់ភ្ញៀវទេសចរនេះ មាន ៣ ប្រភេទហើយតម្លៃខុសៗគ្នា។ សម្រាប់រយៈពេលមួយថ្ងៃតម្លៃ ១០ ដុល្លារ ពីរថ្ងៃតម្លៃ ១៦ ដុល្លារ និងបីថ្ងៃតម្លៃ ២០ ដុល្លារ ដោយភ្ញៀវទេសចរអាចធ្វើដំណើរឥតកំណត់ជាមួយសេវារថយន្តក្រុង និងសេវារថភ្លើង MRT ។
កាតធ្វើដំណើរពិសេសសម្រាប់ភ្ញៀវទេសចរ Special day pass
ពលរដ្ឋខ្មែរមួយចំនួនដែលមកកម្សាន្តប្រទេសសិង្ហបុរី មិនប្រាកដជាអ្នកសល់លុយសល់កាក់ ដើម្បីចាយវាយក្នុងប្រទេសស៊ីវិល័យល្បីចាយលុយផុយៗនេះទេ។ អ្នកខ្លះមកប្រទេសសិង្ហបុរីក្នុងបេសកកម្មការងារចាំបាច់ ហើយអ្នកខ្លះមកដើម្បីស្វែងយល់ពីភាពជឿនលឿនប្រទេសកូនខ្លាអាស៊ីនេះ។
លីដេត ដែលបានទៅសិក្សានិងរស់នៅប្រទេសសិង្ហបុរីជិត ៥ ឆ្នាំ ប្រាប់ថា ប្រព័ន្ធសេវាដឹកជញ្ជូនសាធារណៈរបស់ប្រទេសសិង្ហបុរីអាចនិយាយថាល្អបំផុត និងមានភាពងាយស្រួលបំផុត ដែលផ្តល់សេវាដឹកជញ្ជូនទៅកាន់គ្រប់គោលដៅទូទាំងទីក្រុង។
យុវតីរូបនេះចង់ឲ្យពលរដ្ឋដែលមកកម្សាន្តប្រទេសសិង្ហបុរី គួរសាកល្បងសេវាដឹកជញ្ជូនសាធារណៈប្រទេសនេះ ដែលនឹងផ្តល់បទពិសោធន៍ដ៏អស្ចារ្យសម្រាប់ដំណើរទេសចរមកប្រទេសដ៏ស្រស់ស្អាតបំផុតមួយនេៅអាស៊ីនេះ។
ចុចអាន៖ ៥ កន្លែងដ៏ទាក់ទាញនៅម៉ាឡេស៊ី និងសិង្ហបុរី ខ្មែរនិយមទៅកម្សាន្តជាងគេ
អត្ថបទ៖ ប៊ុណ្ណារ៉ា