មេធាវីរបស់ Angelina Jolie មិនទទួលអតិថិជនដែលមានទ្រព្យសម្បត្តិក្រោម១០លានដុល្លារ

2016-09-26 18:15:34
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅក្នុងបណ្ដឹងលែងលះលើកទី៣របស់ខ្លួន កំពូលតារាសម្ដែងហូលីវូដ Angelina Jolie បានត្រលប់មកពឹងពាក់មេធាវីដែលបានជួយនាងបែកគ្នាជាមួយអតីតស្វាមីកាលពី១៤ឆ្នាំមុន។

មេធាវីរូបនោះមិនទទួលពាក្យបណ្ដឹងរបស់អតិថិជនដែលមានទ្រព្យសម្បត្តិក្រោម១០លានដុល្លារ គិតតម្លៃខ្លួន៨៥០ដុល្លារក្នុងមួយម៉ោង និងត្រូវកក់លុយមុន២៥០០០ដុល្លារ។ នោះគឺមេធាវីស្រី Laura Wasser អ្នកតំណាងផ្នែកច្បាប់របស់តារាសម្ដែងអាមេរិក Angelina Jolie នៅក្នុងបណ្ដឹងលែងលះជាមួយស្វាមី Brad Pitt។

មេធាវីរូបស្រស់ម្នាក់នេះក៏ជាអ្នកតំណាងរបស់តួរឿង "Tom Raiders” នៅក្នុងបណ្ដឹងលែងលះជាមួយតារាសម្ដែង Billy Bob Thornton កាលពីឆ្នាំ២០០២ផងដែរ។ Laura Wasser ត្រូវគេដាក់រហស្សនាមឲ្យថាជា "រាជិនីលែងលះ" របស់ហូលីវូដព្រោះក្រុមតារាតែងស្វែងរកនាងនៅពេលពួកគេចង់បែកគ្នាជាមួយដៃគូរបស់ខ្លួន។ ក្រោយ Angelina មេធាវីវ័យ៤៨ឆ្នាំរូបនេះចាប់ផ្ដើមសាងកេរ្តិ៍ឈ្មោះរបស់ខ្លួននៅពេលនាងបានជួយឲ្យ Britney Spears ឈ្នះក្ដី និងដណ្ដើមបានសិទ្ធិចិញ្ចឹមកូនទាំង២។

ក្រៅកំពូលតារាទាំង២ខាងលើ អតិថិជនរបស់ Laura រួមមានសិល្បករលំដាប់Aរបស់ហូលីវូដជាច្រើនរូបដូចជា Robyn Moore, Nick Lachey, Ryan Reynolds, Kim Kardashian, Heidi Klum, Ashton Kutcher, Denise Richard, Stevie Wonder(២ដង) ជាដើម។ ថ្មីនេះបំផុត មេធាវីកើតឆ្នាំ១៩៦៨ បានក្លាយជាអ្នកតំណាងឲ្យតារាប្រុស Johnny Depp ជាមួយប្រពន្ធវ័យក្មេង Amber Heard។

អតិថិជនរបស់ Laura

មេធាវីល្បីឈ្មោះរូបនេះផ្ទាល់ក៏ធ្លាប់ប្រេះស្រាំនៅក្នុងអាពាហ៍ពិពាហ៍ផងដែរ។ អតិថិជនទី១របស់នាងគឺរូបនាងផ្ទាល់ដោយនារីម្នាក់នេះបានលែងលះប្ដីក្នុងឆ្នាំ១៩៩៣។ នៅក្នុងបទសម្ភាសន៍ជាមួយបណ្ដាញព័ត៌មាន Telegraph, Laura បានចែករំលែកថា កាលណាតារានៅតែរៀបការ នោះនាងនឹងនៅតែជួបអតិថិជនចាស់របស់ខ្លួនទៀត៕