ចាំរូបថតល្បីនេះទេ? ឥឡូវឪពុកក្មេងស្វែងរកមេធាវីការពាររូបថតនេះហើយ

2017-07-04 23:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

រូបថតមួយសន្លឹកបង្ហាញពី ឪពុកសុខចិត្តកាន់ឆត្រទទូរឲ្យកូនប្រុសពេលមេឃកំពុងភ្លៀងទាំងខ្លួនឯងទទឹកខ្លួនជោក ត្រូវបានគេចែកចាយលើអ៊ីនធឺណិតស្ទើរពាសពេញពិភពលោក កាលពីប៉ុន្មានឆ្នាំមុន ព្រោះវាបានឆ្លុះបញ្ចាំងពីទឹកចិត្តឪពុកចំពោះកូន។

បុរសជាឪពុកត្រូវគេដឹងថា ជាជនជាតិចិនមានឈ្មោះ Liu Qiao ត្រូវបានគេលួចថតក្នុងឆ្នាំ ២០១៥ ពេលគាត់មកយកកូនប្រុសចេញពីសាលារៀនត្រលប់ទៅផ្ទះវិញនៅសង្កាត់ Flushin ទីក្រុងញូវយ៉ក សហរដ្ឋអាមេរិក។

ចាប់តាំងពីពេលនោះមក រូបថតមួយសន្លឹកនេះត្រូវបានគេចែកចាយយ៉ាងទូលំទូលាយលើបណ្ដាញសង្គម ដោយភាគច្រើនមិនមែនសម្រាប់អាជីវកម្មឡើយ។ ប៉ុន្តែនាពេលថ្មីនេះៗ លោក Liu បានរកឃើញថា មានសហគ្រាស និងក្រុមហ៊ុនជាច្រើនបានយករូបថតនេះសម្រាប់ធ្វើអាជីវកម្មដូចជាក្រុមហ៊ុនផលិតស្រា Wuliangye និងក្រុមហ៊ុនលក់ទំនិញអនឡាញ JD ជាដើម។

បើតាមការចុះផ្សាយរបស់សារព័ត៌មានចិន The Paper បានផ្សាយថា រូបថតឪពុកកូនត្រូវបានគេឃើញនៅលើផ្ទាំងរូបភាព Poster បិតតាមស្ថានីយរថភ្លើងក្រោមដី Shanghai Metro តាំងពីពាក់កណ្ដាលខែមិថុនា អមជាមួយឃ្លាថា Imperfect Father, Perfect Love ។

ក្រោយបានឃើញរូបថតរបស់ខ្លួនត្រូវគេប្រើប្រាស់ដោយមិនសុំការអនុញ្ញាត លោក Liu សម្រេចចិត្តស្វែងរកមេធាវី ព្រោះគាត់មានអារម្មណ៍ មិនសប្បាយចិត្តពេលឃើញគេប្រើសម្រាប់ផ្សព្វផ្សាយពាណិជ្ជកម្ម ជាពិសេសខាងស្រាតែម្ដង។

លោកនិយាយថា " ខ្ញុំយល់ព្រមដែលប្រើរូបថតសម្រាប់បម្រើសាធារណជន ប៉ុន្តែរូបនេះត្រូវបានក្រុមហ៊ុនផ្សេងៗប្រើច្រើនឡើងៗ រួមទាំងការកាត់តទៀតផង។ មេធាវីរបស់ខ្ញុំបានផ្ញើលិខិតទៅក្រុមហ៊ុនទាំងនោះហើយ។ ខ្ញុំសង្ឃឹមថា ពួកគេនឹងឈប់ប្រើរូបរបស់ខ្ញុំ ដើម្បីទាញផលប្រយោជន៍ទៀត៕