ឌូតឺតេ បញ្ជាឲ្យបាញ់សម្លាប់ចៅហ្វាយក្រុងពាក់ព័ន្ធនឹងគ្រឿងញៀន កក្រើកហ្វីលីពីន

2017-07-31 03:16:24
ចំនួនមតិ 0 | ចំនួនចែករំលែក 0

ចន្លោះមិនឃើញ

ចៅហ្វាយក្រុង Ozamiz បានស្ថិតក្នុងបញ្ជីខ្មៅរបស់ ឌូតឺតេ យូរហើយ
ក្នុងប្រតិបត្តិការនេះ សម្លាប់ចៅហ្វាយក្រុង ភរិយាចៅហ្វាយក្រុង ហើយកូនត្រូវចាប់ខ្លួន
ប៉ូលិសបានបាញ់សម្លាប់ជនសង្ស័យគ្រឿងញៀនអស់ជាង ៧ពាន់នាក់ហើយ

ប្រធានាធិបតីហ្វីលីពីន រ៉ូឌ្រីហ្គូ ឌូតឺតេ បានចោទប្រកាន់ចៅហ្វាយក្រុងម្នាក់ថា ជាប់ពាក់ព័ន្ធនឹងការជួញដូរគ្រឿងញៀនខុសច្បាប់ ហើយក៏ត្រូវប៉ូលិសបាញ់សម្លាប់តែម្ដង។

ប្រធានាធិបតី ឌូតឺតេ

លោក Reynaldo Parojinog ជាចៅហ្វាយក្រុង Ozamiz លើកោះ Mindanao ត្រូវបានសម្លាប់រួមទាំងប្រពន្ធ អមជាមួយមនុស្ស ១០នាក់ផ្សេងទៀតនៅក្នុងផ្ទះរបស់ខ្លួន បន្ទាប់ពីប៉ូលិសទទួលបានបញ្ជា។ ក្នុងនោះក៏មានប៉ូលិសខ្លះត្រូវបានសន្តិសុខចៅហ្វាយក្រុងបាញ់សម្លាប់វិញដែរ។

អ្នកនាំពាក្យរបស់ប្រធានាធិបតីអះអាងថា លោក Parojinogs បានជាប់ឈ្មោះក្នុងបញ្ជីខ្មៅជួញដូរគ្រឿងញៀនខុសច្បាប់របស់ ឌូតឺតេ យូរមកហើយ។ ចំណែកបងប្អូនប្រុសរបស់ចៅហ្វាយក្រុងដដែល ក៏ត្រូវបាញ់សម្លាប់នាព្រលឹមថ្ងៃកើតហេតុដែរ ក្នុងទីក្រុង Ozamiz។ ឯកូនស្រីចៅហ្វាយក្រុង ជាចៅហ្វាយក្រុងរង ត្រូវបានចាប់ខ្លួន ហើយប្រឈមនឹងមុខច្បាប់ករណីគ្រឿងញៀនដូចគ្នា។

មនុស្សប្រមាណ ៧ ០០០នាក់ ត្រូវបានអាជ្ញាធរហ្វីលីពីនបាញ់សម្លាប់នៅក្រៅប្រព័ន្ធតុលាការដោយចោទថា ជាប់ពាក់ព័ន្ធនឹងគ្រឿងញៀន ចាប់តាំងពីលោក ឌូតឺតេ ដាក់ចេញច្បាប់សង្គ្រាមប្រឆាំងគ្រឿងញៀនកាលពីខែកក្កដាឆ្នាំ ២០១៦មក៕