ទីបំផុត Anita Yuen បកស្រាយជម្លោះជាង ២ទសវត្សរ៍ជាមួយ ឈិនឡុង

2017-08-21 04:11:30
ចំនួនមតិ 0 | ចំនួនចែករំលែក 0

ចន្លោះមិនឃើញ

អស់រយៈពេលជាង ២២ឆ្នាំហើយ ដែលមជ្ឈដ្ឋានភាគច្រើនមានការយល់ច្រឡំ ពីទំនាក់ទំនងរវាងកំពូលតារាសម្ដែងប្រុស Jackie Chan (ឈិន ឡុង) និងតារាស្រីហុងកុង Anita Yuen ថាមានភាពល្អក់កករជាមួយគ្នា ពេលពួកគេសម្ដែងរឿង “Thunderbolt” កាលពីឆ្នាំ ១៩៩៥។

ព័ត៌មាននេះកើតឡើង និងល្បីតៗគ្នា អស់រយៈពេលជាង ២ ទសវត្សហើយ ហើយពេលនេះតារាស្រី Anita បានចេញមុខបកស្រាយរាល់ការពិត ទាក់ទងនឹងបញ្ហាមួយនេះហើយ។

កាលពីថ្ងៃសុក្រ ទី ១៨ ខែសីហាសប្ដាហ៍មុន Anita បានបង្ហោះសារមួយលើគណនី Weibo អមជាមួយរូបថតជុំគ្នាជាមួយលោក ឈិនឡុង ដែលនាំឲ្យបណ្ដាញផ្សព្វផ្សាយជាច្រើនសន្មតថាជា "រូបថតប្រចាំសតវត្ស”។ តារាស្រីវ័យ ៤៥ ឆ្នាំរូបនេះបានសរសេរថា៖ "បណ្ដាញផ្សព្វផ្សាយ តែងនិយាយខ្ញុំ ថាជាតារាស្រីដែល Jackie Chan ខឹង។ តែយ៉ាងណាពេលនេះ ខ្ញុំក៏សូមអរគុណ ចំពោះការសម្របសម្រួលរបស់លោក Eric Tsang ដែលទីបំផុតខ្ញុំបានដឹងរឿងពិតហើយ។ អរគុណបងធំ Jackie Chan សម្រាប់ការលើកលែងទោស នេះជាកាដូដ៏អស្ចារ្យសម្រាប់ខ្ញុំ ហើយខ្ញុំនឹងបន្តព្យាយាមធ្វើជាតារាសម្ដែងដ៏ល្អម្នាក់”។

លោក Eric Tsang (រូបកណ្ដាល)

នៅពេលដែលឮសំណួរថា ហេតុអ្វីបានជា ឈិនឡុងខឹងនាង? តារាស្រីរូបនេះឆ្លើយថា៖ "លោក (ឈិនឡុង) ប្រាប់ខ្ញុំថា បើខ្ញុំមិនបាននិយាយ លោកក៏មិនចាំរឿងពេលនោះដែរ។ ជាការពិតពេលនោះខ្ញុំបានធ្វើរឿងខុសឆ្គងមួយ ដែលនាំឲ្យរៀមច្បងរូបនេះមានអារម្មណ៍តូចចិត្ត តែពេលនេះអ្វីគ្រប់យ៉ាងប្រែជាល្អវិញហើយ”។

ចុងបញ្ចប់នាងបាននិយាយថា៖ "ពេលនោះខ្ញុំគឺជាតារាថ្មីថ្មោង ទើបប្រឡូកក្នុងសិល្បៈ ហើយមានរឿងច្រើន ដែលខ្ញុំមិនបានដឹង រហូតនាំទុក្ខឲ្យមនុស្សជាច្រើន។ ឆ្លៀតក្នុងឱកាសនេះ ខ្ញុំក៏ចង់សុំទោស សម្រាប់អាកប្បកិរិយាមិនគប្បីពីមុនរបស់ខ្ញុំដែរ”។