ប្រធានក្លឹប Barcelona៖ "Messi មិនទាន់ចុះកុងត្រាថ្មីជាមួយក្លឹបនៅឡើយទេ"

2017-09-05 12:14:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រធានក្លឹបអ្នកមានបុណ្យ Barcelona លោក Bartomeu បាននិយាយថា កុងត្រាថ្មីដែលក្លឹបមួយនេះប្រកាសកាលពីខែកក្កដាឆ្នាំ ២០១៧ កន្លងទៅនេះ របស់ខ្សែប្រយុទ្ធឆ្នើម Lionel Messi មិនត្រូវបានចុះហត្ថលេខាដោយ Messi ខ្លួនឯងផ្ទាល់នោះទេ។

លោក Bartomeu

ក្នុងការសម្ភាសន៍ជាមួយកាសែតអេស្ប៉ាញ Diario Sport ចុះផ្សាយក្នុងថ្ងៃនេះ ប្រធានក្លឹប Barcelona លោក Josep Maria Bartomeu បាននិយាយថា៖ **"យើងមានកុងត្រាបី ដែលបានព្រមព្រៀង និងចុះហត្ថលេខារួចរាល់អស់ហើយ។"**

#កុងត្រាទាំងបីនោះមានដូចជា៖

កុងត្រាទីមួយ៖ អំពីមូលនិធិរបស់ Messi ដែលចុះដោយបងប្រុសរបស់កីឡាករវ័យ ៣០រូបនេះ
កុងត្រាទីពីរ៖ ទាក់ទងនឹងសិទ្ធិប្រើប្រាស់រូបថតរបស់ Messi និង
កុងត្រាទីបី៖ ជាកុងត្រាសំខាន់គឺជាកុងត្រាបន្តលេងឲ្យក្លឹបអ្នកមានបុណ្យរបស់កីឡាករឆ្នើមមួយនេះ ហើយកុងត្រាពីរចុងក្រោយនេះសុទ្ធតែចុះហត្ថលេខាដោយឪពុករបស់ Messi មិនមែន Messi ខ្លួនឯងផ្ទាល់នោះទេ នេះបើតាមសម្ដីរបស់ប្រធានក្លឹបដដែលរូបនេះ។

ទោះជាយ៉ាងណា លោក Bartomeu បានបញ្ជាក់ថាកុងត្រាថ្មីអាចយកជាការបានហើយ ព្រោះឪពុករបស់កីឡាករសញ្ជាតិអាហ្សង់ទីននេះ ជាអ្នកចាត់ចែងផ្នែករដ្ឋបាលរបស់ក្រុមហ៊ុនរបស់ Messi ហើយ លោកប្រធានក្លឹបមួយនេះបានបន្តទៀតថា ចាំតែថ្ងៃ Messi ត្រលប់មកក្លឹបវិញដើម្បីថតរូបចុះកុងត្រាផ្លូវការប៉ុណ្ណោះ។

Messi

រំឮកដែរថា កាលពីខែកក្កដាកន្លងផុតទៅនេះ ក្លឹបអ្នកមានបុណ្យបានប្រកាសថា Messi បានបន្តកុងត្រាថ្មីជាមួយក្លឹបរហូតដល់ឆ្នាំ ២០២១។ មកទល់នឹងពេលនេះហើយ ម្ចាស់ជើងឯក Ballon D'or ៥សម័យរូបនេះ មិនទាន់បានចុះកុងត្រាថ្មីដោយខ្លួនឯងផ្ទាល់នៅឡើយ ដែលជាហេតុបង្កជាការសង្ស័យថា Messi អាចនឹងចាកចេញពីក្លឹបមួយនេះនារដូវកាលក្រោយពេលដែលផុតកុងត្រាចាស់ មានន័យថាក្លឹបអ្នកមានបុណ្យនឹងមិនបានសូម្បីតែមួយកាក់មួយសេនពីការចាកចេញរបស់កីឡាករឆ្នើមមួយនេះ៕

ប្រភព៖ eurosport ប្រែសម្រួល៖ ហ៊ីម រស្មី