កុំប្រញាប់មានស្នេហា បើគិតថាហេតុផល ៥យ៉ាងនេះ មកបង្ខំចិត្ត
- 2017-09-28 03:54:39
- ចំនួនមតិ 0 | ចំនួនចែករំលែក 0
កុំប្រញាប់មានស្នេហា បើគិតថាហេតុផល ៥យ៉ាងនេះ មកបង្ខំចិត្ត
ចន្លោះមិនឃើញ
ចង់ចាប់ផ្ដើមទាក់ទងជាមួយនរណាម្នាក់ តើយល់ច្បាស់ហើយឬនៅ ពីពាក្យថា "ស្នេហា" ព្រោះធម្មតាមានមនុស្សជាច្រើនយល់ច្រឡំ ចាប់ផ្ដើមទទួលយកទាំងប្រើហេតុផលមិនសមស្រប រហូតជួបបញ្ហាបែរស្ដាយក្រោយ។ បើគិតថាហេតុផលខាងក្រោមនេះ ជាអ្នកបង្ខំឲ្យមានស្នេហា គួរកុំទាន់អាលប្រញាប់ទទួលយក រហូតដល់យល់ច្បាស់ពីស្នេហាសិន។
១. ដើម្បីបន្លប់ភាពឯកា
មុនពេលសម្រេចចិត្តទាក់ទងជាមួយនរណាម្នាក់ ត្រូវសួរខ្លួនឯងថា "ដើម្បីអ្វី?” ហើយបើចម្លើយចេញពីចិត្តគឺ "ព្រោះខ្ញុំមានអារម្មណ៍ឯកា" គួរគិតឡើងវិញម្ដងទៀត។ ស្នេហា មិនមែនជាអ្នកកំដរភាពឯកាទេ គឺជាការយល់ចិត្ត អាណិត ស្រលាញ់ យល់ពីគ្នាទៅវិញទៅមក។ បើអ្នកមានអារម្មណ៍ថាឯកា គួរព្យាយាមរកអ្វីមកបន្លប់ ជាជាងទទួលយកនរណាម្នាក់មកកំដរជីវិត ទាំងមិនយល់ច្បាស់ថាស្នេហាជាអ្វី។
២. ដើម្បីឲ្យមានអ្នកស្រលាញ់
សួរខ្លួនឯងទៀតថា "ដើម្បីអ្វី?” ហើយបើចម្លើយចេញពីចិត្តគឺ "ដើម្បីមានអ្នកស្រលាញ់" នោះអ្នកកាន់តែខុសទៀតហើយ។ ត្រូវចាំ និងរំឭកខ្លួនឯងជារាល់ថ្ងៃថា គ្មាននរណាម្នាក់ ស្រលាញ់អ្នក ជាងអ្នកស្រលាញ់ខ្លួនឯងឡើយ។ កុំព្យាយាមរំពឹងលើគេ បង្ខំឲ្យគេមកស្រលាញ់ខ្លួន ទាំងខ្លួនឯងមិនទាន់យល់ពីខ្លួនឯង។ ត្រៀមខ្លួនឲ្យបានល្អសិន នោះអ្នកនឹងជួបមនុស្សត្រឹមត្រូវ សម្រាប់អនាគត។
៣. ដើម្បីទទួលបានភាពកក់ក្ដៅ
ពេលមានបញ្ហា អ្នកក៏គិតចង់រកមនុស្សមកដោះស្រាយជាមួយ... ពេលយំ បើបានឱប ឬផ្អែកលើស្មាគេក៏គិតថាកក់ក្ដៅ... ប៉ុន្តែមិនគួរយកហេតុផលទាំងនេះ មកចាប់ផ្ដើមទំនាក់ទំនងស្នេហាឡើយ ព្រោះវាជាហេតុផលមិនសមស្រប។ មានបញ្ហា អ្នកអាចរកវិធីផ្សេងដើម្បីបន្លប់។ កុំព្យាយាមយករឿងមិនល្អ ទៅទម្លាក់លើគេរាល់ថ្ងៃ។
៤. ដើម្បីលុបដានស្នេហាចាស់
នៅក្នុងភាពយន្តមួយចំនួន ពេលតួណាម្នាក់បែកពីសង្សារយូរ តែងមានអ្នកលួងលោមថា "ល្មមឈប់គិតទៅ វាហួសហើយ"។ ពាក្យនេះ ចង់ឲ្យបំភ្លេចស្នេហ៍ចាស់ តែមិនមែនចាប់ផ្ដើមស្នេហ៍ថ្មី ដើម្បីលុបដានឡើយ។ បំភ្លេចស្នេហ៍ចាស់ មានន័យថាឈប់គិត ឈប់ខ្វល់ រៀនស្រលាញ់ខ្លួនឯង ធ្វើអ្វីដែលអាចឲ្យចិត្តរីករាយ ជាជាងបង្ខំទទួលយកទំនាក់ទំនងមួយផ្សេងទៀត។
៥. ព្រោះតែសម្ពាធជុំវិញខ្លួន
ពេលខ្លះ អ្នកកំពុងមានអារម្មណ៍រីករាយនឹងជីវិតឯកាណាស់ទៅហើយ ប៉ុន្តែសម្ពាធពីជុំវិញខ្លួន បែរធ្វើឲ្យអ្នកចង់ចាប់ផ្ដើមជីវិតគូ។ មិត្តភក្តិមានកូនអស់ ឯតារាសម្ដែងនៅក្នុងភាពយន្តខ្លះ បានបញ្ចប់រឿងជាមួយគ្រួសារយ៉ាងមានសុភមង្គល ក៏ធ្វើឲ្យអ្នកចាប់ផ្ដើមចង់មានស្នេហាបែបនោះដែរ។ ជីវិតពិតមិនដូចក្នុងកុនទេ ព្រោះក្នុងកុន អាចកែសាច់រឿងបាន ឯជីវិតពិត បើជួបបញ្ហាហើយ គឺត្រូវដោះស្រាយដោយខ្លួនឯង៕
ចុចអានអត្ថបទ៖
ហេតុផល ៦ យ៉ាងមនុស្សស្រីគួរពិចារណាឱ្យច្បាស់មុនចង់យកប្ដីចិត្តឯង
នារីមាន ១០ចំណុចនេះហើយ ដែលបុរសបាក់ចិត្តស្រលាញ់ងើបមុខមិនរួច
១០ចំណុច ជាភាពទាក់ទាញរបស់បុរស នារីៗភាគច្រើនប្រាថ្នាចង់បានបំផុត