មកមើលសមត្ថភាព គ្រាប់មីស៊ីលរបស់កូរ៉េខាងជើង អាចបាញ់ដល់ប្រទេសណាខ្លះ

2017-10-20 04:13:44
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រទេសកូរ៉េខាងជើង ធ្លាប់បានធ្វើការសាកល្បងបាញ់គ្រាប់មីស៊ីលរបស់ខ្លួន ជាច្រើនលើករួចមកហើយ កាលពីឆ្នាំកន្លងទៅ ដោយភាគច្រើនទទួលបានជោគជ័យ។

ការធ្វើតេស្តទាំងនេះរួមមានការបាញ់មីស៊ីល រំលងលើប្រទេសជប៉ុន និង ការធ្វើតេស្តនុយក្លេអ៊ែរ កាលពីឆ្នាំ២០១៧ ដែលបណ្ដាលឲ្យមានការរញ្ជួយដី នៅព្រំដែនប្រទេសចិនទៀតផង។

សារព័ត៌មាន ABC News បានធ្វើការស្រាវជ្រាវមីស៊ីលទាំងអស់ ដែលកូរ៉េខាងជើងបានធ្វើការសាកល្បង និងបានសិក្សាពីសក្ដានុពលរបស់ពួកវា ថាមានសមត្ថភាពអាចបាញ់ដល់ប្រទេសណាខ្លះ។

ខាងក្រោមនេះគឺជាលទ្ធផលនៃការរកឃើញ៖

#១ មីស៊ីលផ្លោង Scud

មកទល់នឹងពេលនេះ អាវុធដ៏ធំបំផុតរបស់កូរ៉េខាងជើង គឺមីស៊ីលផ្លោងរយៈចម្ងាយជិត Short-range Ballistic Missiles ឬ Scud។ ក្នុងចំណោមនោះ មីស៊ីលដែលមានរយៈចម្ងាយឆ្ងាយបំផុត គឺ ER Scud ដែលអាចធ្វើដំណើរបានដល់ទៅ ១ ០០០គីឡូម៉ែត្រ។ ទីតាំងសំខាន់ដែលមីស៊ីល Scud អាចបាញ់ដល់ រួមមានដូចជា កូរ៉េខាងត្បូង និង ទីក្រុង Osaka ប្រទេសជប៉ុន។

#២ មីស៊ីលឆ្លងទ្វីបកម្រិតកណ្តាល (Medium-range ballistic missile)

វាអាចធ្វើដំណើររហូតដល់ទៅ ២ ០០០គីឡូម៉ែត្រ ហើយធ្លាប់ទទួលបានជោគជ័យ ៧ដង ក្នុងចំណោមការបាញ់សាកល្បង ៩ដង។ វាអាចបាញ់ដល់ផ្នែកទាំងអស់នៃប្រទេសជប៉ុន រួមទាំងទីក្រុងតូក្យូ , ភាគខាងជើងប្រទេសចិន , ភាគខាងកើតម៉ុងហ្គោលី និង ភាគខាងត្បូងប្រទេសរុស្ស៊ី។

#៣ មីស៊ីលនាវាមុជទឹក

របាយការណ៍បានបង្ហាញថា កូរ៉េខាងជើង បានព្យាយាមបាញ់សាកល្បងគ្រាប់មីស៊ីល ចេញពីនាវាមុជទឹករបស់ខ្លួន នៅឯទីក្រុង Sinpo ប៉ុន្តែទទួលបានជោគជ័យតែ ៣ លើកប៉ុណ្ណោះ ក្នុងការសាកល្បង ៦ លើក។ វាមានគ្រាប់មីស៊ីលរយៈចម្ងាយជិត ១ ២០០គីឡូម៉ែត្រ និងរយៈចម្ងាយឆ្ងាយ ២ ៨០០គីឡូម៉ែត្រ ដែលគំរាមកំហែងដល់តំបន់ប៉ាស៊ីហ្វិក។

#៤ មីស៊ីលឆ្លងទ្វីបកម្រិតមធ្យម (Intermediate-range ballistic missiles)

វាមានរយៈចម្ងាយ ៤ ៥០០គីឡូម៉ែត្រ ប៉ុន្តែការសាកល្បង ១៤ លើក ទទួលបានជោគជ័យត្រឹមតែ ៣ លើកប៉ុណ្ណោះ។ វាអាចបាញ់ដល់ទីតាំងជាច្រើន ដូចជា ភាគច្រើននៃប្រទេសចិន , តំបន់ភាគខាងកើតទាំងអស់នៃប្រទេសរុស្ស៊ី , ប្រទេសភាគច្រើននៅអាស៊ីអាគ្នេយ៍ រួមទាំង ថៃ និង ហ្វីលីពីន និង ទឹកដីអាមេរិក Guam ផងដែរ។

#៥ មីស៊ីលឆ្លងទ្វីបអន្តរជាតិ (Intercontinental ballistic missile)

កូរ៉េខាងជើង បានសាកល្បងធ្វើតេស្តមីស៊ីលឆ្លងទ្វីបអន្តរជាតិរបស់ខ្លួនចំនួន ២ លើក នៅក្នុងឆ្នាំ២០១៧ នេះ ហើយក៏ទទួលបានជោគជ័យទាំង ២ លើកផងដែរ។

វាមានឈ្មោះថា Hwasong-14 ដែលមានរយៈចម្ងាយ ៨ ៥០០គីឡូម៉ែត្រ ដោយអាចគំរាមកំហែងតំបន់ជាច្រើន ដូចជា មជ្ឈិមបូព៌ា , ប្រទេសឥណ្ឌា , តំបន់ទាំងអស់នៃអឺរ៉ុបខាងកើត , ប្រទេសតួកគី , ប្រទេសក្រិក , តំបន់ស្កាឌីណាវ៉ាវី , ប្រទេសអាល្លឺម៉ង់ , ភាគខាងជើងប្រទេសអ៊ីតាលី , ប្រទេសស្កុតឡេន , ភាគខាងជើងប្រទេសអង់គ្លេស , ភាគខាងជើងប្រទេសអេហ្ស៊ីប , ភាគខាងជើងប្រទេសសូម៉ាលី , ភាគច្រើននៃប្រទេសអូស្ត្រាលី រួមទាំង ក្រុង Perth និង Brisbane , រដ្ឋ Alaska សហរដ្ឋអាមេរិក , តំបន់ប៉ាស៊ីហ្វិកខាងលិច សហរដ្ឋអាមេរិក និង ភាគខាងលិចប្រទេសកាណាដា។

#៦ មីស៊ីលផ្សេងៗទៀត

ថ្មីៗនេះ កូរ៉េខាងជើងបានធ្វើការសាកល្បងមីស៊ីលមួយគ្រាប់ ដែលមានរយៈចម្ងាយអតិបរិមា ១០ ០០០គីឡូម៉ែត្រ។ វាអាចបង្កហានិភ័យដល់ តំបន់ទាំងអស់នៃប្រទេសអូស្ត្រាលី , ទីក្រុង Auckland ប្រទេសនូវែលហ្សេឡង់ , តំបន់ទាំងអស់នៃទ្វីបអឺរ៉ុប (លើកលែងតែផ្នែកខ្លះ នៃភាគខាងត្បូងប្រទេសអេស្ប៉ាញ និងព័រទុយហ្គាល់) , តំបន់ទាំងអស់នៃអេហ្ស៊ីប , ប្រទេសទុយណេស៊ី , តំបន់ភាគច្រើននៃប្រទេសលីប៊ី , តំបន់ភាគច្រើននៃប្រទេសអាហ្វ្រិកខាងកើត , ទីក្រុង Los Angeles សហរដ្ឋអាមេរិក , ទីក្រុង Washington DC សហរដ្ឋអាមេរិក , ទីក្រុង New York City សហរដ្ឋអាមេរិក និង ភាគខាងលិចប្រទេសមិចស៊ីកូ។

#៧ យានបាញ់បង្ហោះអវកាស (Space launch vehicle)

កូរ៉េខាងជើង ក៏មានយានបាញ់បង្ហោះអវកាស ដែលអនុញ្ញាតឲ្យពួកគេបញ្ជូនអាវុធ ចូលទៅក្នុងតារាវិថីផងដែរ។ រយៈចម្ងាយរបស់វាគឺ ១៥ ០០០គីឡូម៉ែត្រ ដែលនឹងធ្វើឲ្យតំបន់នៅលើផែនដីភាគច្រើនមានគ្រោះថ្នាក់។

យ៉ាងណាមិញ តំបន់ដែលអាចគេចផុតពីការបាញ់ចេញពីយានខាងលើនេះ រួមមានដូចជា ប្រទេសប្រេស៊ីល , ប្រទេសអាហ្សង់ទីន , ប្រទេសឈីលី , ប្រទេសបូលីវី , ប្រទេសប៉េរូ , ប្រទេសប៉ារ៉ាហ្គាយ , ប្រទេសអ៊ុយរូហ្គាយ , ភាគខាងត្បូងប្រទេសអេក្វាឌ័រ , ភាគខាងត្បូងវ៉េណេស៊ុយអេឡា , ភាគខាងត្បូងប្រទេសកូឡុំប៊ី , ភាគខាងត្បូងប្រទេសហ្គោយ៉ាណា , ភាគខាងត្បូងប្រទេស Suriname , ភាគខាងត្បូងប្រទេសហ្គីណេ , ភាគខាងត្បូងតំបន់ French Guianaប្រទេសបារាំង និង ផ្នែកជាច្រើនទៀតនៃទ្វីបអង់តាកទិច៕

ចុចអាន៖

ប្រភព៖ indy100 ប្រែសម្រួល៖ សេង ឡុង