មុនចេញទៅបរទេស គួរដឹងបម្រាម ១៣យ៉ាងតាមប្រទេសទាំងនេះសិន

2017-11-16 04:33:00
ចំនួនមតិ 0 | ចំនួនចែករំលែក 0

ចន្លោះមិនឃើញ

គ្រប់ប្រទេសទាំងអស់ក្នុងពិភពលោកសុទ្ធតែមានច្បាប់និងទម្លាប់ខុសៗគ្នា ដែលជារឿយៗត្រូវបានមើលរំលងដោយជនបរទេស។ ទោះជាយ៉ាងណាក៏ដោយ ជួនកាលច្បាប់ទាំងនោះពិតជាធ្ងន់ធ្ងរណាស់ក្នុងប្រទេសនីមួយៗដែលអាចធ្វើអោយអ្នកមានបញ្ហាដូចជា ការផាកពិន័យ ឬក៏អាចជាប់ពន្ធនាគារផងដែរ។

ខាងក្រោមនេះគឺជាការហាមឃាត់ទាំង ១៣យ៉ាង ដែលអ្នកគួរដឹង៖

១. ទិញគ្រឿងស្រវឹងពេលរសៀលនៅថៃ

នៅប្រទេសថៃ គ្រឿងស្រវឹងត្រូវបានអនុញ្ញាតឲ្យលក់ចាប់ពីម៉ោង ១១ព្រឹក ដល់២រសៀល និង ៥ល្ងាច ដល់កណ្ដាលអាធ្រាត្រប៉ុណ្ណោះ។ ចំពោះអ្នកលក់ បារ ឬក្លឹបណា ដែលលក់គ្រឿងស្រវឹងក្រៅម៉ោងដែលបានកំណត់នេះ អាចនឹងប្រឈមមុខការផាកពិន័យ ៤០០០បាត (១២១ដុល្លារ) ឬអាចនឹងជាប់ពន្ធនាគាររហូតដល់ ២ឆ្នាំ។

២. រាំក្រោយពាក់កណ្ដាលអាធ្រាត្រនៅជប៉ុន

ការរាំក្រោយពាក់កណ្ដាលអាធ្រាត្រក្នុងប្រទេសជប៉ុនជាអំពើខុសច្បាប់ ដោយសារតែក្នុងឆ្នាំ ១៩៤៨ ច្បាប់នេះត្រូវបានដាក់ឱ្យអនុវត្តន៍ដើម្បីគ្រប់គ្រងឧស្សាហកម្មផ្លូវភេទ។

៣. ជក់បារីនៅសាធារណៈនៅសិង្ហបុរី

ចំណតរថយន្តក្រុង សួនកុមារ និងកន្លែងចតរថយន្ត សុទ្ធតែជាតំបន់ហាមប្រាមការជក់បារីនៅប្រទេសសិង្ហបុរី។ អ្នកជក់បារីក៏ត្រូវនៅឲ្យឆ្ងាយយ៉ាងហោចណាស់៥ម៉ែត្រពីច្រកទាំងអស់នៃអគារចំណតឡានក្រុងនិងតំបន់ទូទៅក្នុងពេលកំពុងជក់បារី បើមិនដូច្នោះទេនឹងទទួលការផាកពិន័យរហូតដល់ចំនួន ១ម៉ឺនដុល្លារសិង្ហបុរី(ប្រហែល ៧៣៧៩ដុល្លារ) ។

៤. ឆ្លងថ្នល់ខុសច្បាប់នៅអាមេរិក

នៅអាមេរិក ការឆ្លងផ្លូវគ្រប់ទីកន្លែងដែលមិនមានគំនូសសម្រាប់អ្នកថ្មើរជើងឆ្លងកាត់ អាចនឹងទទួលការផាកពិន័យ ការបង្ហាញខ្លួននៅតុលាការ និងការជាប់ពន្ធនាគារ។

៥. ដើរបណ្ដើរចុចទូរសព្ទបណ្ដើរនៅក្រុង Honolulu រដ្ឋហាវ៉ៃ សហរដ្ឋអាមេរិក

ក្នុងគោលបំណងដើម្បីធ្វើអោយអ្នកថ្មើរជើងមានទំនួលខុសត្រូវចំពោះសុវត្ថិភាពជាមួយអ្នកបើកបរ ការដើរបណ្ដើរចុចទូរសព្ទបណ្ដើរត្រូវបានហាមឃាត់នៅក្រុង Honolulu។ ប្រសិនបើអ្នកត្រូវគេចាប់បានថាចុចទូរសព្ទពេលកំពុងដើរ អ្នកអាចនឹងត្រូវពិន័យជាប្រាក់រហូតដល់ ៩៩ដុល្លារ។

៦. ស្បថជាសាធារណៈនៅប្រទេសអូស្ត្រាលី

ការស្បថជាសាធារណៈត្រូវបានហាមឃាត់នៅរដ្ឋចំនួន៣របស់អូស្ត្រាលីដូចជា រដ្ឋ New South Wales, Victoria និង Queensland។ អ្នកប្រព្រឹត្តល្មើសនឹងទទួលការផាកពិន័យចាប់ពី ៧៦ដុល្លារដល់ ១៨៥ដុល្លារ។

៧. ស្លៀកពាក់ឈុតហែលទឹកក្នុងទីក្រុងនៃប្រទេស អេស្ប៉ាញ

ការស្លៀកពាក់ឈុតហែលទឹកក្នុងទីក្រុងប្រទេសអេស្ប៉ាញត្រូវបានចាត់ទុកថាជាការអាក្រាតពាក់កណ្ដាល និងអាចទទួលការផាកពិន័យចាប់ពី ១១៨ដុល្លារ ដល់ ២៣៧ដុល្លារ។

៨. យកថ្នាំបំបាត់ការឈឺចាប់ចូលក្នុងប្រទេសអារ៉ាប់រួម

អ្នកដំណើរដែលលួចយកថ្នាំបំបាត់ការឈឺចាប់ចូលក្នុងប្រទេសអារ៉ាប់រួមអាចនឹងប្រឈមមុខនឹងការជាប់ពន្ធនាគាររហូតដល់ ៤ឆ្នាំ។

៩. ឲ្យចំណីព្រាបក្នុងទីក្រុង Venice ប្រទេសអ៊ីតាលី

ការអោយចំណីព្រាបក្នុងទីក្រុង Venice គឺជាអំពើខុសច្បាប់ចាប់តាំងពីឆ្នាំ ២០០៨មក។ ច្បាប់នេះត្រូវបានបង្កើតឡើងដើម្បីកាត់បន្ថយការធ្លាក់ចុះចំនួនសត្វស្លាបនៅលើវិមានដ៏ល្បីល្បាញនិងសំណង់អាគាររបស់អ៊ីតាលី។

១០. បើកបរដោយមិនបើកចង្កៀងមុខនៅប្រទេសស៊ុយអែត

មិនថាពេលណាក៏ដោយ យានយន្តទាំងអស់ដែលធ្វើដំណើរក្នុងប្រទេសស៊ុយអែតត្រូវតែបើកចង្កៀងមុខជាដាច់ខាតដោយសារតែនៅរដូវរងាប្រទេសនេះទទួលពន្លឺព្រះអាទិត្យតែ ៥ ទៅ ៦ម៉ោងប៉ុណ្ណោះក្នុងមួយថ្ងៃ។

១១. ពាក់ស្បែកជើងកែងនៅតំបន់ប្រវត្តិសាស្ត្រប្រទេស ក្រិក

ច្បាប់ហាមមិនអោយពាក់ស្បែកជើងកែងនៅតំបន់ប្រវត្តិសាស្ត្រនេះ ត្រូវបានបង្កើតឡើងក្នុងឆ្នាំ ២០០៩ ដោយសារប្រជាជនក្នុងប្រទេសជឿថាវិមានទាំងនេះមានស្បែកដែលចេះឈឺចាប់ដោយតែកែងនៃស្បែកជើង។

១២. ឈប់លើផ្លូវ Highway ប្រទេស អាល្លឺម៉ង់

អ្នកបើកបរដែលបង្កអោយមានការកកស្ទះដោយសារតែការឈប់នៅលើផ្លូវ Highway អាចនឹងត្រូវពិន័យប្រាក់ចន្លោះពី ៣៥ដុល្លារ ទៅ៨៣ដុល្លារ។

១៣. ស្លៀកខោខ្លីពណ៌ផ្កាឈូកនៅថ្ងៃអាទិត្យក្នុងរដ្ឋ Vicotria ប្រទេសអូស្ត្រាលី

មូលហេតុនៅពីក្រោយច្បាប់ហាមប្រាមនេះមិនមានច្បាស់លាស់នោះទេ ប៉ុន្តែវាត្រូវបានគេជឿថាការស្លៀកខោខ្លីពណ៌ផ្កាឈូកជាការប្រព្រឹត្តបទល្មើសទាក់ទងនឹងម៉ូតសម្លៀកបំពាក់៕

ចុចអានអត្ថបទ៖

ប្រភព៖ Businessinsider ប្រែសម្រួល៖ គង់ វិសាល