លក្ខណៈសុវត្តិភាពលើប្រព័ន្ធប្រតិបត្តិការ iOS និង Android ខុសគ្នាបែបណាខ្លះ?

2017-12-17 02:28:22
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅលើទីផ្សារមានប្រព័ន្ធប្រតិបត្តិការដំណើរការលើទូរស័ព្ទពីរ Android និង iOS មានការនិយមប្រើប្រាស់។ ចំពោះ iOS មានតែ Device របស់ Apple ខណៈ Android មានក្រុមហ៊ុនផលិតទូរស័ព្ទផ្សេងកំពុងប្រើប្រព័ន្ធប្រតិបត្តិការមួយនេះ ដូចជា Samsung, LG ជាដើម។ សុវត្ថិភាពលើប្រព័ន្ធជាកត្តាសំខាន់ដែលប្រព័ន្ធត្រូវតែមានជួយការពារព័ត៌មានរបស់អ្នកប្រើប្រាស់។

១. Bloatware

Bloatware សំដៅលើកម្មវិធីអ្នកមិនធ្លាប់ប្រើ ហើយជាប្រភេទកម្មវិធីមិនអាចលុប ធ្វើកំណែទម្រង់មិនស្គាល់ ចំណាយថ្ម និងអ៊ីនធឺណិត និងកាត់បន្ថយ Storage របស់ Device។

iOS

លើ iOS 11 មាននូវកម្មវិធីមានស្រាប់ជាមួយប្រព័ន្ធមួយចំនួន។ កម្មវិធីទាំងនោះមានសុវត្ថិភាពក្នុងការប្រើប្រាស់ជាយូរឆ្នាំ ដែលរចនា និងបង្កើតដោយក្រុមហ៊ុន Apple ផ្ទាល់។ ម្យ៉ាងវិញទៀត អ្នកអាចលុបនូវកម្មវិធីមានស្រាប់មួយចំនួនទាំងនោះបាន រួចបើត្រូវការវិញអាចចូល App Store ទាញយកមកប្រើវិញបាន។ ក្នុងការលុបអ្នកចុចលើកម្មវិធីណាមួយឲ្យជាប់ រួចចុចសញ្ញាខ្វែងលើ icon របស់កម្មវិធីក្នុងការលុប ហើយចុចប៊ូតុង Home ដើម្បីបញ្ចប់ដំណើរការលុប។

Android

Google បានបង្កើតនូវប្រព័ន្ធប្រតិបត្តិការមួយឡើង ប៉ុន្តែមានក្រុមហ៊ុនផលិតទូរស័ព្ទជាច្រើនយកទៅប្រើដោយធ្វើកំណែទម្រង់បន្ថែម ហើយបន្ថែមនូវកម្មវិធីមានស្រាប់មួយចំនួនរៀងៗខ្លួន។ ម្យ៉ាងវិញទៀត អ្នកក៏មិនងាយស្រួលក្នុងការលុបនូវកម្មវិធីទាំងនោះផងដែរ ពេលខ្លះលុះត្រាតែអ្នក Root device ទើបអ្នកអាចលុបកម្មវិធីទាំងនោះបាន។ ការ Root device មានន័យថាអ្នកបំបែកប្រព័ន្ធសុវត្ថិភាពរបស់ប្រព័ន្ធ ជាចំណុចមិនគួរអនុវត្តនោះទេ ប្រសិនបើអ្នកមិនចង់ឈឺក្បាលពេលក្រោយ។

២. ការ Lock device

លើទូរស័ព្ទអ្នកមានជម្រើសច្រើនក្នុងការ Lock device ដោយប្រើ PIN, password, ឬផ្សេងៗ។

iOS

លើ iOS 11 ប្រព័ន្ធប្រតិបត្តិការអាចឲ្យអ្នកប្រើប្រាស់ Lock និង Unlcok device ដោយប្រើមុខ ហៅថា FaceID។ ត្បិតតែ FaceID ចាត់ទុកថាផ្តល់សុវត្តិភាពខ្ពស់ តែមានការបំបែកដោយប្រើ Mast (ស្រោមមុខ)។ ក្រៅពីនោះក៏មាន TouchID ជាមុខងារស្កេនក្រយៅដៃក្នុងការចូលប្រើ Device។ អ្នកក៏អាចកំណត់ Passcode បានដែរ ដោយមានជម្រើស ៦ខ្ទង់ ៤ខ្ទង់ លេខសុទ្ធ អក្សរផ្សំជាមួយលេខ។ មួយវិញទៀតគឺ Erase Data ជាមុខងារមួយក្នុងការលុបរាល់ទិន្នន័យលើ Device ក្រោយអ្នកបញ្ចូល Passcode ខុស ១០ដង។ ប្រសិនបើមុខងារនេះមិនបើកដំណើរការនោះ Device នឹងត្រូវការ Restore ក្នុង iTune ក្រោយពេលបញ្ចូលខុស ១០ដង។

Android

ប្រព័ន្ធប្រតិបត្តិការនេះមានមុខងារ ស្កេនមុខ និងស្កេនក្រយៅដៃ ក្នុងការចូលប្រើ Device។ មុខងារស្គេនមុខលើ Samsung Galaxy S8 ក៏នៅតែអាចបំបែកបានដោយប្រើរូបថតផងដែរ។ លើ Samsung Galaxy S8 មានមុខងារស្កេនប្រស្រីភ្នែក តែមិនមានគ្រប់ Device ដែលដំណើរការប្រព័ន្ធមួយនេះនោះទេ។ លើ Android 8.0 អ្នកមានមុខងារ Lock device មួយចំនួនដូចជា Swipe (គ្មានការការពារ), Pattern (ភ្ជាប់គំនូស), PIN (អាចប្រើដល់ទៅ ១៦ខ្ទង់), Password (អាចប្រើបានដល់ទៅ 16អក្សរ)។ ជម្រើសល្អបំផុត អ្នកអាចប្រើទាំងមុខងារស្កេនម្រាមដៃ និង PIN ដូច្នេះបើមួយខូច អាចប្រើមួយទៀតបាន។ ក្រុមហ៊ុនផលិតទូរស័ព្ទបានអភិវឌ្ឍន៍ជំនាន់ Android របស់ខ្លួនដែលអាចជំនួសពីលើ PIN និង Password របស់ប្រព័ន្ធខណៈ Android ទម្រង់ដើមមានសុវត្ថិភាពរួចទៅហើយ។

៣. សុវត្ថិភាព App Store និង Play Store

Apple App Store និង Google Play Store ជាកន្លែងមួយអាចឲ្យអ្នកទាញយកកម្មវិធីប្រើប្រាស់ ដោយមានមុខងារជាច្រើន តែមិនមានន័យថាមានសុវត្ថិភាពដូចគ្នានោះទេ។

iOS App Store

App Store មានការគ្រប់គ្រងលើដំណើរការអភិវឌ្ឍន៍កម្មវិធីសម្រាប់ iOS ក្នុងការដាក់ Store ខ្លួន។ ក្នុងឆ្នាំ ២០១៥ Apple បានលុបនូវកម្មវិធីរាប់រយដោយសារកម្មវិធីទាំងនោះមានបង្កប់មេរោគ។ យ៉ាងណាមិញ ក៏នៅមានមេរោគកើនឡើងដដែល បើតាម Skycure report។

Android Play Store

Google Play Store មានបញ្ហាមេរោគកាន់តែច្រើន។ តាមការសិក្សាស្រាវជ្រាវបង្ហាញថា មានកម្មវិធីគោលបំណងមិនល្អដល់ទៅ ៤ លានជាង។ អ្នកស្រាវជ្រាវសុវត្ថិភាពនៅ Check Point សម្គាល់ថា ថ្វីបើ Google បានលុបកម្មវិធីលក្ខណៈបែបនោះ តែជំនាន់ថ្មីលេចឡើងទាក់ទាញក្នុងការទាញយកដដែល។ បច្ចុប្បន្ន អ្នកប្រើប្រាស់ Android អាចប្រឈមនឹងមេរោគដូចជា Xavier, Judy, ExpensiveWall, Googlian, Godless និង Sonic Spy បើមិនប្រើដោយមានភាពប្រយ័ត្នប្រយែង។

ក្នុងឆ្នាំ ២០១៧ Google ផ្ដល់នូវមុខងារធំមួយឈ្មោះ Google Play Protection ជាកម្មវិធីធានាសុវត្ថិភាពរួមមានការស្កេន Device ការ Verify កម្មវិធីមុនពេលទាញយក និង ការតាមដាន Device ដែលអាចជួយអ្នកជ្រើសរើសកម្មវិធីដែលទុកចិត្តបាន។

៤. ការការពារ Malware និង Ransomware

Malware ជាមេរោគអាចលួចទិន្នន័យ Encryption ទិន្នន័យ និងការងារមួយចំនួនទៀត ក្នុងការវាយប្រហារលើDevice អ្នកប្រើប្រាស់។ Ransomware ជាប្រភេទ Malware ដែល Lock នូវទិន្នន័យអ្នក ហើយទាមទារតម្លៃណាមួយក្នុងការចូលប្រើវិញ ដោយមិនមានការធានា។

iOS

Apple បានផ្ដល់សុវត្ថិភាពដល់ iOS តាំងពីក្រោមដល់លើ។ iOS មាននូវ Sandbox ដ៏ល្អមួយរវាងកម្មវិធី និងប្រព័ន្ធប្រតិបត្តិការ ដែលអាចកាត់បន្ថយភាពងាយរងគ្រោះក្នុងកូដ ធ្វើឲ្យអ្នកប្រើប្រាស់មានសុវត្ថិភាពក្នុងការប្រើ។ កម្មវិធីទាំងអស់ត្រូវបាន Sandbox ដែលបិទពីការចូលប្រើ File បានរក្សាទុកដោយ Device ផ្សេងទៀត។

Android

Android ក៏ផ្ដល់នូវកម្រិតខ្ពស់សម្រាប់សុវត្ថិភាពផងដែរ។ Android sandbox ផ្ដាច់ទិន្នន័យកម្មវិធី និងកូដដំណើរការ ដែលទិន្នន័យមានសុវត្ថិភាពរវាងកម្មវិធីជាច្រើន។ ដូចទៅនឹង iOS ដែរ កម្មវិធីក៏ត្រូវបានបិទពីការទំនាក់ទំនងជាមួយនឹង Device ផ្សេងទៀតផងដែរ។

មួយវិញទៀត iOS និង Android មាននូវ Full disk encryption ត្រូវបានចងទៅនឹង System hardware ដែលបង្កើត Key សំងាត់ (Private Key) ផ្ដល់ផលពិបាកក្នុងការពន្លាមើល៕