Facebook អាចត្រូវពិន័យរាប់ពាន់លានដុល្លារ ដោយសារមុខងារមួយ

2018-04-18 01:46:26
ចំនួនមតិ 0 | ចំនួនចែករំលែក 0

ចន្លោះមិនឃើញ

បណ្ដាញ Facebook អាចត្រូវទទួលរងការពិន័យជាទឹកប្រាក់រាប់ពាន់លានដុល្លារ បន្ទាប់ពីចៅក្រមសហព័ន្ធបានសម្រេចឲ្យក្រុមហ៊ុននេះប្រឈមមុខនឹងរឿងក្ដីមួយ។

រឿងក្ដីមានជាប់ពាក់ព័ន្ធនឹងមុខងារចំណាំផ្ទៃមុខរបស់ Facebook ដែលបានល្មើសនឹងច្បាប់របស់រដ្ឋ Illinois ដោយបានរក្សាទុកទិន្នន័យ Biometric ដោយអ្នកប្រើប្រាស់មិនបានដឹងខ្លួន។ មុខងារនោះមានឈ្មោះថា Tag Suggestion ដែលវាអាចចំណាំផ្ទៃមុខរបស់អ្នកប្រើប្រាស់លើរូបថតមួយសន្លឹក និងមានសមត្ថភាព Tag ដោយស្វ័យប្រវត្តិផងដែរ។

មុខងារខាងលើបានដំណើរការនៅខែមិថុនា ឆ្នាំ ២០១១។ ផ្អែកតាមពាក្យបណ្ដឹង ដើមបណ្ដឹងបានចោទប្រកាន់ថា Facebook បានរក្សាទុកទិន្នន័យ Biometric (ផ្ទៃមុខ) របស់ពួកគេ ដោយមិនមានផ្ដល់ដំណឹងឲ្យដឹង ដែលជាទង្វើរំលោភសិទ្ធបុគ្គលមួយ។ ច្បាប់ Biometric Information Privacy Act របស់រដ្ឋ Illinois តម្រូវឲ្យមានការព្រមព្រៀងច្បាស់លាស់ មុននឹងក្រុមហ៊ុនណាមួយអាចប្រមូលយកទិន្នន័យ Biometric ដូចជាស្នាមម្រាមដៃ ឬ ផ្ទៃមុខ បាន។

ក្រោមច្បាប់នេះ Facebook អាចនឹងត្រូវរងការពិន័យចន្លោះពី ១ ០០០ ទៅ ៥ ០០០ ដុល្លារ រៀងរាល់ពេលដែលផ្ទៃមុខអ្នកប្រើប្រាស់ម្នាក់ ត្រូវបានគេយកទៅប្រើដោយគ្មានការអនុញ្ញាត។

មុខងារ Tag Suggestion ដំណើរការតាម ៤ ដំណាក់កាល ៖ ទីមួយ Software ធ្វើការចំណាំផ្ទៃមុខក្នុងរូបថតដែលបាន Upload, ទីពីរ ប្រព័ន្ធ Facebook បង្កើតទម្រង់នៃផ្ទៃមុខមួយ ដែលអាចតំណាងឲ្យមុខមនុស្សម្នាក់, ទីបី Facebook បង្កើតនូវ Face Template មួយសម្រាប់ឲ្យប្រព័ន្ធស្វែងរកទម្រង់ផ្ទៃមុខដែលស៊ីគ្នា និង ទីបួន ប្រសិនបើទម្រង់ផ្ទៃមុខស៊ីគ្នា Facebook នឹង Suggest នូវការ Tag ភ្លាម។

បន្ថែមពីនេះ Facebook ក៏បានបញ្ចេញនូវមុខងារថ្មីនៅខែធ្នូ ឆ្នាំកន្លងទៅ ដែលឲ្យដំណឹងដល់អ្នកប្រើប្រាស់នៅពេលមាននរណាម្នាក់ Upload រូបភាពរបស់ពួកគេ ក្នុងគោលបំណងបង្ការនូវការក្លែងបន្លំគណនី និង បន្ថែមសមត្ថភាពលើការ Tag ផងដែរ៕

ចុចអាន៖

ប្រភព៖ The Verge ប្រែសម្រួល៖ សុខហេង