ភ្ញាក់ផ្អើលមិនខាន ពេលដឹងចំនួនប្រាក់ខែ Pilot របស់អាកាសចរណ៍ធំៗលើលោក

2018-07-04 06:38:25
ចំនួនមតិ 0 | ចំនួនចែករំលែក 0

ចន្លោះមិនឃើញ

ការងារជា Pilot ឬហៅថាអ្នកបើកយន្តហោះគឺជាការងារក្នុងក្ដីស្រមៃរបស់បុរសជាច្រើន ហើយក៏ជាបុរសដែលនារីជាច្រើនប្រាថ្នាចង់បានជាសង្សារផងដែរ ដោយសារតែការងារមួយប្រភេទនេះត្រូវបានគេចាត់ទុកជាការងារដែលអាចកើបលុយបានឆិបៗ ហើយថ្លៃថ្នូរ។

ប៉ុន្តែជាធម្មតា ទោះបីមុខតំណែងដូចគ្នា ប៉ុន្តែប្រាក់ឈ្នួលនឹងទទួលបានខុសៗគ្នាទៅតាមក្រុមហ៊ុន ឬ ស្ថាប័នផ្សេងៗគ្នាដែរ។ ថ្ងៃនេះវិបសាយកញ្ញានឹងនាំស្រីៗយើងទៅតាមដានតម្លៃប្រាក់ខែរបស់ Pilotរបស់ក្រុមហ៊ុនអាកាសចរណ៍ល្បីៗក្នុងលោកបន្តិចមើលថាបានថ្លៃកម្រិតណា!

Jestar Pacific

យោងតាមព័ត៌មានដែលកំណត់នៅក្នុងសេចក្ដីប្រកាសរើសបុគ្គលិករបស់ក្រុមហ៊ុនអាកាសចរណ៍វៀតណាម ដែលមានទីស្នាក់ការនៅទីក្រុងហាណូយ Jetstar Pacific ប្រាក់ខែរបស់កាពីតែនដែលចាប់ផ្ដើមឆ្នាំដំបូងគឺពី ៧ពាន់ដុល្លារឡើងទៅ ។ ចំណែកកាពីតែនដែលធ្វើការមានបទពិសោធន៍ការងារច្រើនឆ្នាំ អាចឡើងដល់១ម៉ឺនដុល្លារ ។

Emirates Airlines

ជាក្រុមហ៊ុនហោះហើររបស់អារ៉ាប់រួម ដែលមានទីស្នាក់ការនៅទីក្រុងឌូបៃ និងបង្កើតឡើងតាំងពីឆ្នាំ១៩៨៥មក Emirates Airlines បានធ្វើប្រតិបត្តិការជាច្រើនលើករាប់ភ្លេច ដោយមានកាពីតែនសរុបជាង៤ពាន់នាក់ ស្មើនឹងប្រហែល១០០សញ្ជាតិ។ ក្រុមហ៊ុនយក្សមួយនេះ មានយន្តហោះមិនក្រោម២០០គ្រឿង ពង្រីកគោលដៅហោះហើរដល់ទៅ៨៣ប្រទេសនិង៦ទ្វីប។

ចំណែកអ្វីដែលគ្រប់គ្នាចង់ដឹងគឺតម្លៃប្រាក់ខែរបស់បុគ្គលិកជាពិសេស អ្នកបើកយន្តហោះនោះ គឺសម្រាប់អ្នកចាប់ផ្ដើមដំបូង នឹងទទួលបានប្រាក់ខែ ជាង១ម៉ឺន១ពាន់ដុល្លារ ដោយមិនរាប់បញ្ចូលទាំងប្រាក់ឧបត្ថម្ភផ្សេងៗឡើយ។

United Arilines

ក្រុមហ៊ុនអាកាសចរណ៍មួយនេះបង្កើតឡើងនៅឆ្នាំ១៩២៦ ដោយមានបុគ្គលិកសរុបជាង៨ម៉ឺននាក់គិតមកដល់បច្ចុប្បន្ន។ United Airlines គឺជាក្រុមហ៊ុនអាកាសចរណ៍ធំបំផុតលំដាប់ទី៣ ដោយវាយតម្លៃលើប្រាក់ចំណូលដែលរកបានប្រចាំឆ្នាំ។ សម្រាប់ប្រាក់ខែរបស់ Pilot ជាមធ្យមអាចឈានដល់ ៥ម៉ឺនដុល្លារ ក្នុងមួយខែ។

Singapore Airlines

ក្រុមហ៊ុនអាកាសចរណ៍ Singapore Airlines បានចាប់ផ្ដើមប្រតិបត្តិហោះហើរអស់រយៈពេលជាង៤៥ឆ្នាំមកហើយ គឺតាំងពីខែតុលាឆ្នាំ១៩៧២មកម្ល៉េះ ដោយមានបុគ្គលិកសរុបជាង២ម៉ឺន៥ពាន់នាក់។ នៅក្នុងតំបន់អាស៊ាន ប្រាក់ខែអ្នកបើកយន្តហោះរបស់ជើងហោះហើរសិង្ហបុរីមានតម្លៃថ្លៃជាងគេបង្អស់។ ឧទាហរណ៍ កាពីតែនដែលបើកយន្តហោះ Boeing 777 និង Airbus A330 របស់ Singapore Airlines អាចបានប្រាក់ខែ ប្រហែល១ម៉ឺនដុល្លារក្នុងមួយខែ ។

Cathay Pacific

ក្រុមហ៊ុនអាកាសចរណ៍លំដាប់ផ្កាយ៥ របស់ហុងកុងមួយនេះ ត្រូវបានគេបង្ហើបថា កាពីតែនអាចទទួលបានប្រាក់ខែប្រហែល ១ម៉ឺន៣ពាន់ដុល្លារ ក្នុងមួយខែ។

American Airlines

ក្រុមហ៊ុនមួយនេះត្រូវបានចាត់ចំណាក់ថ្នាក់ជាអាកាសចរណ៍ធំបំផុតក្នុងពិភពលោក ដោយវាស់លើទំហំយន្តហោះដែលមាន ទំហំប្រាក់ចំណូល ពេលវេលាកំណត់ការហោះហើររបស់អ្នកដំណើរ និងចំនួនគោលដៅនៃការហោះហើរ។ សម្រាប់ Pilot ថ្នាក់កណ្ដាលអាចទទួលបានប្រាក់ឈ្នួលប្រមាណ ជាង៨ម៉ឺនដុល្លារក្នុងមួយឆ្នាំ ចំណែកអ្នកដែលមានបទពិសោធន៍ច្រើនឆ្នាំ អាចទទួលបានប្រហែល ជាង២០ម៉ឺនដុល្លារក្នុងមួយឆ្នាំ ៕

ចុចអាន៖

ប្រភព៖ Kanha ប្រែសម្រួល៖ សរ សុគន្ធី