ហេតុផលស្រដៀងគ្នាធ្វើឲ្យ CTN និង ហង្សមាស ទិញកម្មវិធីបរទេស!

2014-12-25 13:00:03
ចំនួនមតិ 0 | ចំនួនចែករំលែក 0

ចន្លោះមិនឃើញ

មានការកត់សម្គាល់ឃើញថា ស្ថានីយទូរទស្សន៍ CTN និង ហង្សមាស បានចំណាយលុយយ៉ាងច្រើនសន្ធឹកសន្ធាប់ ដើម្បីទិញការផលិត ហើយចាក់ផ្សាយកម្មវិធីល្បីៗរបស់ពិភពលោក ។ តើស្ថាប័នទាំងពីរនេះគ្មានសមត្ថភាពផលិតកម្មវិធីខ្លួនឯង ឬយ៉ាងណា? ហើយពូកគេអាចទទួលបានប្រជាប្រិយភាព ឬប្រាក់ចំណេញដូចការរំពឹងទុកទេ?

លោក លឹម ឃុនស្រ៊ុន ជាអគ្គនាយករងប៉ុស្តិ៍ CTN បានឲ្យដឹងថា នេះជាយុទ្ធសាស្ត្រមួយរបស់ស្ថានីយ។ មានកម្មវិធីបរទេស ៤ ហើយ ដែលស្ថានីយទិញសិទ្ធផលិត និង កំពុងចាក់ផ្សាយ។ រួមមានកម្មវិធី ល្បែងជ្រែកជញ្ជាំង, តើអ្នកឆ្លាតជាងក្មេងថ្នាក់ទី ៥ ទេ, អ្នកនឹងក្លាយជាសេដ្ឋី និង ១ នាទី ដើម្បីឈ្នះ។

លោកនិយាយថា៖ “យើងគិតពីការកម្សាន្តរបស់ទស្សនិកជន និង ប្រជាប្រិយភាពជាងប្រាក់ចំណេញទៅទៀត"។ អគ្គនាយករងរូបនេះបន្តថា កម្មវិធីជាស្នាដៃផលិតករក្នុងស្រុក ក៏មានសក្ដានុពលមិនអន់ដែរ ហើយមានគាំទ្រយ៉ាងច្រើន រហូតធ្វើឲ្យអង្គភាពខាងលើបានទទួលការគាំទ្រ បង្ហាញពីភាពជោគជ័យក្នុងរយៈកាល១០ឆ្នាំមកនេះ។ លោកយល់ថា នេះជាការបង្កើតឱកាសមួយសម្រាប់ ផលិតករក្នុងស្រុកសិក្សាពីកម្មវិធីរបស់ពិភពលោក។

លោកបន្ថែមថា មុននឹង CTN សម្រេចចិត្តទិញសិទ្ធពីម្ចាស់ដើមនោះ ក៏មានប្រទេសជាច្រើនទៀត ដែលគេទិញសិទ្ធយកទៅផលិតមិនតិចជាង ៤០ ទៅ ៥០ ប្រទេសនោះទេ ហើយសុទ្ធសឹងតែបានទទួលជោគជ័យទាំងអស់។ សម្រាប់ផែនការយុទ្ធសាស្ត្រ២០១៤កន្លងមក CTN បានទិញកម្មវិធីចំនួនពីរទៀត ដើម្បីកៀរគរអ្នកគាំទ្ររបស់ខ្លួន គឺកម្មវិធី "Dancing With the Star" ពីទូរទស្សន៍BBC និងកម្មវិធី "Cambodia Next Top Model”របស់សហរដ្ឋអាមេរិក។

ចំណែកទូរទស្សន៍ហង្សមាសឯណេះវិញ បានដំណើរការកម្មវិធី ដែលបានទិញសិទ្ធពីសហរដ្ឋអាមេរិកចំនួនពីរនៅដើមឆ្នាំ២០១៤កន្លងទៅនេះ រួមមានកម្មវិធី" The Voice Cambodia” និងកម្មវិធី" Million Dollar Money Drop” ដោយជោគជ័យ។ លោក អ៊ិន ទីតូ អ្នកគ្រប់គ្រងសិល្បៈប្រចាំផលិតកម្មហង្សមាស បានប្រាប់ថា នេះជាយុទ្ធសាស្ត្រ ដើម្បីបង្កើនការគាំទ្របន្ថែមទៀត ក្រៅពីកម្មវិធីព័ត៌មានសម្បូរបែបកំពុងមានការពេញនិយមស្ទើរគ្រប់ មជ្ឈដ្ឋាន។

លោកបាននិយាយស្រដៀងគ្នាថា៖ “អ្វីដែលយើងចង់បាន គឺកម្មវិធីសម្បូរបែបសម្រាប់ទស្សនិកជន ទាំងកម្មវិធីមានស្រាប់ និង កម្មវិធីទិញសិទ្ធពីបរទេស"។ លោកមិនបានបញ្ជាក់ច្រើននោះទេពីបញ្ហានេះ។ ប៉ុន្តែលោកបន្តថា មានកម្មវិធីបរទេសដំណើរការកន្លងបានទទួលជោគជ័យលើសពីការរំពឹងទុក ខណៈទស្សនិកជនភាគច្រើនបានតាមដានទស្សនាជាប្រចាំ។

ថ្មីៗនេះស្ថានីយខាងលើបានដំណើរការកម្មវិធី "Cambodia's Got Talent” ផ្ដល់សិទ្ធដោយក្រុមហ៊ុន Free mantle Media International និងមានបេក្ខភាពជាច្រើន បានចូលរួមបង្ហាញទេពកោសល្យអស្ចារ្យរបស់ពូកគេ។ បើតាមការជួនដំណឹងទូរទស្សន៍ហង្សមាស ក៏នឹងដំណើរកម្មវិធី"Cambodia Idol” ឆាប់ៗនេះផងដែរ៕

អានអត្ថបទ៖ រឿង"ភ្លើង" ដាក់បញ្ចាំងក្រោយចំណាយពេលថត១ឆ្នាំ

អានអត្ថបទ៖ ប៉ែន ចំរ៉ុង ចេញពីមួយចូលមួយ ក្នុងឆ្នាំ២០១៤ និងដើម២០១៥

អត្ថបទ៖ សំ ជំនាញ