ថន ស្រីណៃ ពោលសរសើរប្រុសស្អាតហ្វីលីពីន

2015-05-12 18:38:23
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែង និងដើរម៉ូដ មាស ថនស្រីណៃ បានពោលសរសើរតារាប្រុស ក្រោយបានជួបសម្ដែងជាមួយគ្នាលើកដំបូងតាមរយៈរឿង "សង្គ្រាមបងប្អូន" ត្រៀមនឹងចាក់ផ្សាយនៅខែក្រោយនេះ។

តារាប្រុសរបស់ហ្វីលីពីនដែល មាស ថនស្រីណៃ បានជួបសម្ដែងជាមួយ និងពោលសរសើរនោះ មានឈ្មោះថា Mikael Deaz ដែលប្រិយមិត្តធ្លាប់ស្គាល់ក្នុងរឿងជាច្រើនរួចមកហើយ។

ស្រីណៃ អតីតតួស្រីក្នុងស្ប៉តពាណិជ្ជកម្មផ្សព្វផ្សាយទេសចរណ៍របស់ក្រសួងទេសចរណ៍ឆ្នាំ ២០១១ ថ្លែងប្រាប់ Sabay ថា តារាប្រុសហ្វីលីពីនរូបនេះ ក្រៅជាពីរូបរាងសង្ហារហើយ គេជាមនុស្សល្អ រួសរាយ គួរឲ្យរាប់អាន។ "និយាយពីគាត់...បងឯងមើលទៅដឹងហើយ ជួបគាត់អត់ដែលមុខក្រញ៉ូវទេ សើចរហូត និយាយទៅ Make Fun គ្រប់ពេលហ្មងណាស់ ឲ្យតែជួបគាត់ពេលណាគ្រប់គ្នាដឹងតែសើចរហូត"។ ស្រីថ្លែងទាំងសើច។

តាមរយៈរឿង "សង្គ្រាមបងប្អូន" ផលិតក្រោមសហការគ្នារវាងផលិតកម្មភូមិពេជ្រភាពយន្ត CTN និងទូរទស្សន៍ GMA របស់ហ្វីលីពីន លោក Mikael Deaz មិនមែនជាតារាហ្វីលីពីនតែម្នាក់ទេដែលមានវត្តមាន ក្នុងនោះ តារារួមសញ្ជាតិរបស់លោកម្នាក់ទៀត គឺ កញ្ញាAndrea Torres ក៏បានចូលរួមសម្ដែងដែរ។

Mikael សម្ដែងជាគូជាមួយ មាស ថនស្រីណៃ ឯតារាស្រី Andrea Torres សម្ដែងជាមួយលោក ខាត់ វៃហុំាង។ តាមរយៈសម្ដែងជាគូជាមួយគ្នា ស្រីណៃ ប្រាប់ទៀតថា ត្បិតនាងពោលសរសើរ Mikael ប៉ុន្តែគ្រាន់តែក្នុងន័យជាមិត្តរួមការងារលើកដំបូងជាមួយគ្នា និងរាប់អានគ្នាប៉ុណ្ណោះ។ នាងបន្តថា ចំណុចល្អផ្សេងទៀតតារាហ្វីលីពីន ពួកគេពូកែចាំប៉ារូល ដែលជាការផ្ដល់លក្ខណៈងាយស្រួលមួយដល់នាង និងតារាខ្មែរយើងផ្សេងទៀត។

ទន្ទឹមនឹងការពោលសរសើរពីតារាខ្មែរគ្រានេះ ភាគីខាងតារាហ្វីលីពីន ក៏បានពោលសរសើរពីតារាខ្មែរដូចគ្នាដែរ។ និយាយជារួម ដោយមិនសំដៅនរណាម្នាក់ ក្នុងសន្និសីទកាលពីដើមខែ Mikael និង Andrea ថ្លែងដូចគ្នាថា តារាខ្មែរពិតជារួសរាយ រាក់ទាក់ និងគួរឲ្យរាប់អាន។ ដូច្នេះហើយ ពួកគេរីករាយដែលបានរួមជាមួយសិល្បករ-សិល្បការិនីខ្មែរបង្កើតភាពយន្តខាងលើឲ្យលេចជារូបរាងឡើង។

វិលមកតារាស្រីវ័យ ២៦ឆ្នាំ មាស ថនស្រីណៃ វិញ ថ្លែងបន្តថា តាមរយៈការចូលរួមសម្ដែងជាមួយតារាអន្តរជាតិដែលជាឱកាសដ៏កម្រនេះ នាងរំពឹងថា តិច ឬច្រើន នឹងជួយនាងឲ្យកាន់តែមានប្រជាប្រិយភាពថែមទៀត។

មាស ថនស្រីណៃ បានចូលសិល្បៈក្នុងឆ្នាំ ២០០៨ ក្រោយប្រឡងជាប់ក្នុងកម្មវិធី Spy Super Model ដែលបន្ទាប់មកនាងប្រឡូកច្រើនក្នុងការងារដើរម៉ូដច្រើនជាងទាំងជាតិ និងអន្តរជាតិ។ ជាក់ស្ដែងកញ្ញា ទើបជាប់ជាបវរកញ្ញាទេសចរណ៍តំណាងកម្ពុជាទៅចូលរួមប្រឡងនៅម៉ាឡេស៊ីកាលពីចុងឆ្នាំ ២០១៤ តែមិនជាប់ចំណាត់ថ្នាក់។

ដោយឡែកការងារសម្ដែងភាពយន្ត ស្រីណៃ ប្រាប់ថា នាងទើបតែបានសម្ដែងត្រឹម២រឿងប៉ុណ្ណោះ ទី១គឺរឿង "សង្គ្រាមបងប្អូន" និងរឿង "ខ្មោចទឹកកក" សុទ្ធជាតួឯក ដែលទើបបើកសម្ពោធថ្មីៗ៕

អត្ថបទ៖ CTN បើកសន្និសីទភាពយន្តតារាខ្មែរប៉ះតារាហ្វីលីពីនលើកដំបូង