3D Animation អ្នកចេះតិច ឱកាសការងារខ្ពស់ ចង់រៀនទាល់មានឆន្ទៈខ្ពស់

2017-07-05 07:49:48
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងចំណោមមុខវិជ្ជាជាច្រើន ដែលសិស្សនិស្សិតកំពុងសិក្សា នៅតាមសាកលវិទ្យាល័យនានា 3D Animation ជាជំនាញថ្មីមួយទៀត។ ជាជំនាញមានសក្ដានុពលខ្ពស់សម្រាប់ទីផ្សារការងារ មានសាលាមិនច្រើនទេដែលមានការបណ្ដុះបណ្ដាលមុខវិជ្ជា 3D Animation ដល់សិស្សនិស្សិតកម្ពុជា។

លោក ហៀង ស៊ូហាន សាស្ត្រាចារ្យនិងជាអ្នកគ្រប់គ្រងនៅវិទ្យាស្ថាន ស៊ី ហ្គេក ជាវិទ្យាស្ថានដែលផ្តោតលើការបណ្ដុះបណ្ដាលមុខជំនាញ 3D Animation ចាប់តាំងពីឆ្នាំ ២០០៦ បានបកស្រាយលើការសិក្សាជំនាញ 3D Animation ដល់ប្រិយមិត្ត និងមិត្តអ្នកសិក្សាដើម្បីសិក្សាស្វែងយល់។

Sabay៖ តើជំនាញ 3D Animation គេសិក្សាយ៉ាងដូចម្ដេច ហើយការសិក្សាមានរយៈពេលប៉ុន្មានឆ្នាំ?

សាស្ត្រាចារ្យ៖ ជំនាញ 3D Animation គេសិក្សាផ្តោតសំខាន់ទៅលើការបង្កើតភាពយន្តគំនូរជីវចល 3D, Spot Commercial, 3D Film ជាដើម។ ជំនាញនេះគេសិក្សាអំពីការគូស ដែលមានការគូសជារូបតួអង្គ, គូសជាសាច់រឿង, ដាក់ពណ៌ដាក់ពន្លឺ, បច្ចេកទេសនៃការថត, បច្ចេកទេសនៃការបញ្ចូល 3D ទៅក្នុងវីដេអូ, បច្ចេកទេសនៃការចងឆ្អឹងឲ្យតួអង្គ, តិចនិកនៃការធ្វើចលនាឲ្យតួអង្គ រួមមានមុខវិជ្ជាជាច្រើនទៀតដែលត្រូវសិក្សា។ ជំនាញ 3D Animation ការសិក្សាអាចមានរយៈពេល ១៨ ខែ, ២ឆ្នាំ និង ៤ឆ្នាំ។

Sabay៖ តើអ្វីជាសក្ដានុពលក្នុងការជ្រើសរើសជំនាញនេះសិក្សា បើប្រៀបធៀបមុខជំនាញដទៃទៀត?

សាស្ត្រាចារ្យ៖ ជំនាញ 3D Animation ជាជំនាញមួយដែលមានសក្ដានុពលណាស់នាពេលបច្ចុប្បន្ន បើប្រៀបធៀបមុខជំនាញដទៃទៀត ដែលមានសក្ដានុពលដូចគ្នា ពីព្រោះអ្នកដែលមានជំនាញ 3D Animation អាចធ្វើការបានច្រើនមុខណាស់ដូចជា៖ បង្កើតគំនូរជីវចល, បង្កើតជាភាពយន្ត, បង្កើតស្ពតពាណិជ្ជកម្ម រួមទាំងវិស័យជាច្រើនទៀតដែលទាក់ទងសិល្បៈ ហើយកំពុងតែរីកចម្រើនយ៉ាងខ្លាំងនៅក្នុងប្រទេសខ្មែរយើងសព្វថ្ងៃ។

Sabay៖ តើអាចមានបញ្ហាប្រឈមណាខ្លះសម្រាប់ការសិក្សាជំនាញនេះ ដែលអាចនាំឲ្យនិស្សិតបោះបង់ចោលការសិក្សាកណ្ដាលទី?

សាស្ត្រាចារ្យ៖ ប្រាកដណាស់ ការសិក្សាជំនាញអ្វីក៏ដោយក៏មានឧបសគ្គដែរ។ យ៉ាងណាមិញ ការសិក្សាជំនាញ 3D Animation នេះក៏មិនខុសគ្នាដែរ។ វាត្រូវការភាពអត់ធ្មត់ ព្យាយាមនិង ការអនុវត្តន៍ច្រើន។ ឧទាហរណ៍ ការសិក្សាមុខវិជ្ជាគូររូប, ដំឡើងរូបតួអង្គ, ចងឆ្អឹងនិងបង្កើតចលនាឲ្យតួអង្គ សិក្សាត្រូវការភាពអត់ធ្មត់ និងការអនុវត្តន៍ច្រើនជារៀងរាល់ថ្ងៃ ដើម្បីទទួលបានជោគជ័យ។ បើនិស្សិតគ្មានការព្យាយាម អត់ធ្មត់និងមានពេលអនុវត្តន៍ច្រើនទេ និស្សិតមិនអាចសិក្សាបានល្អ និងអាចបោះចោលការសិក្សាកណ្ដាលទីជាមិនខាន។

Sabay៖ តើការសិក្សាជំនាញនេះត្រូវមានការត្រៀមខ្លួន និងមានចំណេះដឹងមូលដ្ឋានអ្វីខ្លះ?

សាស្ត្រាចារ្យ៖ ជាការពិតណាស់ សិស្សនិស្សិតដែលចង់រៀនជំនាញនេះ ទោះជាគ្មានមូលដ្ឋានក៏អាចសិក្សាបានដែរ ឲ្យតែមានឆន្ទៈស្រលាញ់និងការព្យាយាម។ តែល្អបំផុតសិស្សដែលចង់រៀនជំនាញ 3D Animation គួរមានមូលដ្ឋានខ្លះៗខាងគូររូប ដែលវានឹងធ្វើឲ្យការសិក្សាមានដំណើរការល្អ និងរលូនទៅមុខ។

Sabay៖ ក្រៅពីស៊ីហ្គេក មានគ្រឹះស្ថានសិក្សាណាខ្លះទៀត ដែលកំពុងបណ្ដុះបណ្ដាលជំនាញ 3D Animation?

សាស្ត្រាចារ្យ៖ ក្រៅពីវិទ្យាស្ថាន ស៊ី ហ្គេក នៅក្នុងប្រទេសយើងសព្វថ្ងៃមានគ្រឹះស្ថានមួយចំនួន ដែរដែលកំពុងបណ្ដុះបណ្ដាលជំនាញ 3D Animation ដល់សិស្សនិស្សិតដូចជា Objectif 3D, Limkokwing តែគ្រឹះស្ថានជនជាតិខ្មែរបង្កើត មានតែវិទ្យាស្ថាន ស៊ី ហ្គេកតែមួយគត់ដែលកំពុងបណ្ដុះបណ្ដាលជំនាញ 3D Animation នេះ។

Sabay៖ តើសាស្រ្តាចារ្យអាចជួយបង្ហាញពីដំណើរការសិក្សាជំនាញ 3D Animation នៅស៊ីហ្គេក?

នៅសាលាស៊ីហ្គេក ការសិក្សាឆ្នាំដំបូង គេផ្តោតសំខាន់លើការគូររូប, ដំឡើងរូបតួអង្គ, បំពាក់ពណ៌ Texture ឲ្យតួអង្គ។ ចូលដល់ឆ្នាំទី២ ចាប់ផ្ដើមសិក្សាពីការចងឆ្អឹង, សិក្សាពីមូលដ្ឋានគ្រឹះនៃការធ្វើចលនារូបភាព និងម៉ូហ្សិន។ ឆ្នាំទី៣ និងទី៤ សិក្សាពីតិចនិកនៃការធ្វើចលនាដាយណាមិច, វីហ្សូលអេហ្វិច, ម៉ូហ្សិនខាប់ឆើ និងធ្វើសារណាបញ្ចប់ការសិក្សា។

Sabay៖ តើការរីកដុះដាលនៃវិស័យ Animation បានរួមចំណែកយ៉ាងណាខ្លះសម្រាប់សិក្សាជំនាញ 3D Animation?

សាស្ត្រាចារ្យ៖ ការរីកដុះដាលនៃវិស័យ Animation បានរួមចំណែកយ៉ាងខ្លាំងដល់ការសិក្សាជំនាញ Animation។ និស្សិតដែលសិក្សាជំនាញនេះ មានឱកាសការងារខ្ពស់។

Sabay៖ តើលោកមើលឃើញបច្ចេកវិទ្យា 3D Animation ចាប់ផ្ដើមវិវឌ្ឍនៅក្នុងប្រទេសកម្ពុជាចាប់ពីពេលណា ហើយកំពុងស្ថិតនៅក្នុងដំណាក់កាលអភិវឌ្ឍបែបណាដែរនាពេល បច្ចុប្បន្ន បើប្រៀបធៀបប្រទេសក្នុងតំបន់ និងពិភពលោក?

សាស្ត្រាចារ្យ៖ បើតាមដែលខ្ញុំដឹងក្នុងប្រទេសកម្ពុជាយើង ការអភិវឌ្ឍវិស័យ Animation ចាប់ផ្ដើមក្នុងឆ្នាំ ២០០០។ វាទទួលការចាប់អារម្មណ៍ខ្លាំងនាប៉ុន្មានឆ្នាំចុងក្រោយ ដែលត្រូវបានគេប្រើប្រាស់យ៉ាងទូលំទូលាយស្ទើរគ្រប់វិស័យ ជាពិសេសលើវិស័យសិល្បៈកម្សាន្ត, ស្ពតពាណិជ្ជកម្ម, វិស័យភាពយន្ត, វិស័យគំនូរជីវចល។

ទោះជានៅក្នុងប្រទេសយើង វិស័យ 3D Animation កំពុងរីកដុះដាលប៉ុន្តែវាស្ថិតនៅដំំណាក់កាលសិក្សានៅឡើយ។ វាត្រូវការពេលវេលាយូរទៀត ដើម្បីធនធានប្រទេសយើងមានសមត្ថភាព និងប្រកួតប្រជែងជាមួយប្រទេសជិតខាងក្នុងតំបន់និងនៅលើពិភពលោក។

Sabay៖ ចុងក្រោយ លោកមានពាក្យពេចន៍អ្វីផ្ដាំផ្ញើដល់មិត្តនិស្សិត ដែលកំពុងសិក្សានិងចង់ចាប់ជំនាញ 3D Animation សិក្សា?

សាស្ត្រាចារ្យ៖ ជាចុងក្រោយខ្ញុំមានពាក្យពេចន៍ខ្លះៗសម្រាប់អ្នកដែលមានបំណងចង់សិក្សាជំនាញ 3D Animation សូមសម្រេចចិត្តឲ្យបានច្បាស់។ 3D Animation ជាជំនាញមួយដែលកំពុងមានទីផ្សារការងារខ្ពស់ អាចរកចំណូលបានច្រើននាពេលបច្ចុប្បន្ននិងអនាគត។

បញ្ជាក់៖ អត្ថបទផ្សាយឡើងវិញ

ចុចអាន

អត្ថបទ៖ ប៊ុណ្ណារ៉ា