ប្រើប្រាស់បណ្ដាញសង្គមមិនត្រឹមត្រូវ ប្រឈមផ្លូវច្បាប់?

2017-08-03 06:48:18
ចំនួនមតិ 0 | ចំនួនចែករំលែក 0

ចន្លោះមិនឃើញ

បច្ចុប្បន្ននេះអ្នកដែលសកម្មក្នុងការប្រើប្រាស់បណ្ដាញសង្គមមានចំនួនជិត ៥លាននាក់នៅក្នុងប្រទេសកម្ពុជា។ តើអ្នកប្រើប្រាស់បណ្ដាញសង្គមដឹងទេថា ត្រូវជៀសវាងផ្សព្វផ្សាយព័ត៌មានបែបណាដើម្បីកុំឲ្យប្រឈមមុខនឹងផ្លូវច្បាប់?

នាយកវិទ្យាស្ថានកម្ពុជាសម្រាប់ការសិក្សាផ្នែកព័ត៌មាន លោក មឿន ឈានណារិទ្ធិ ណែនាំថាអ្នកប្រើប្រាស់បណ្ដាញសង្គមជៀសវាងចែករំលែកឬផ្សព្វផ្សាយព័ត៌មានបែបជេរប្រមាថ មួលបង្កាច់ ញុះញង់ ឬព័ត៌មានចចាមអារ៉ាមផ្សេងៗ។ លោកថាការផ្សព្វផ្សាយព័ត៌មានទាំងនេះអាចធ្វើឲ្យអ្នកផ្សព្វផ្សាយ ឬចែករំលែកបន្តប្រឈមមុខនឹងផ្លូវច្បាប់។

តាមក្រមព្រហ្មទណ្ឌត្រង់មាត្រា ៤២៥ ចែងថា ត្រូវផ្ដន្ទាទោសដាក់ពន្ធនាគារពីមួយឆ្នាំ ទៅពីរឆ្នាំ និងពិន័យជាប្រាក់ពី ពីរទៅបួនលានរៀល អំពើផ្ដល់ ឬបើកកកាយព័ត៌មានក្លែងក្លាយដើម្បីធ្វើឲ្យជឿថានឹងកើតមានឡើងនូវការបំផ្លិចបំផ្លាញ ការធ្វើឲ្យទ្រុឌទ្រោម ឬការធ្វើឲ្យខូចខាត ប្រកបដោយគ្រោះថ្នាក់ចំពោះមនុស្ស។

ដោយឡែកចំពោះព័ត៌មានដែលមានលក្ខណៈញុះញង់បង្កឲ្យមានបទឧក្រិដ្ឋជាអាទិវិញ ត្រង់មាត្រា៤៩៥ ចែងថាត្រូវផ្ដន្ទាទោសដាក់ពន្ធនាគារពីប្រាំមួយខែ ទៅពីរឆ្នាំ និងពិន័យជាប្រាក់ពីមួយលានទៅបួនលានរៀល។

ចំពោះការជេរប្រមាថជាសាធារណៈតាមរយៈពាក្យសម្តី លិខិត ឬតាមមធ្យោបាយទូរគមនាគមន៍ សោតទស្សន៍សាធារណៈ វិញត្រង់មាត្រា ៣០៧ ចែងថា ត្រូវពិន័យជាប្រាក់ពី ១សែន ដល់១០លានរៀល។

អ្នកនាំពាក្យក្រសួងយុត្តិធម៌ ឯឧត្តម គឹម សន្តិភាព បានណែនាំនៅលើទំព័រហ្វេសប៊ុករបស់លោកកាលពីដើមសប្តាហ៍នេះថាអ្នកប្រើប្រាស់បណ្ដាញសង្គមមិនត្រូវផ្សព្វផ្សាយនូវព័ត៌មានណាដែលជាពាក្យចចាមអារ៉ាម ឬគ្មានប្រភពច្បាស់លាស់។ លោកថាការផ្សព្វផ្សាយព័ត៌មានទាំងនេះអាចបង្ក ឲ្យមានការភាន់ច្រឡំ ឬបង្កឲ្យមានចលាចលក្នុងសង្គមជាយថាហេតុ។

ឯកឧត្ដមសរសេរថា៖ «អ្នកផ្សព្វផ្សាយព័ត៌មានចង់មិនចង់ត្រូវជាប់ជំពាក់ការទទួលខុសត្រូវតាមផ្លូវច្បាប់លើការផ្សព្វផ្សាយរបស់ខ្លួន...សូមចូលរួមទប់ស្កាត់នូវព័ត៌មាននានាដែលមានចេតនាទុច្ចរិតក្នុងសង្គម»។

កាលពីសប្ដាហ៍មុនយ៉ាងហោចណាស់មានមនុស្សពីរនាក់ត្រូវបានចាប់ខ្លួន និងឃុំខ្លួនបណ្ដោះអាសន្នដោយសារតែពួកគាត់ជាប់សង្ស័យថាបានបង្ហោះព័ត៌មានមិនពិតទាក់ទងនឹងការចាប់ក្មេងនៅតាមបណ្ដាខេត្ត។ បុរសម្នាក់នៅក្នុងខេត្តកំពង់ធំត្រូវចៅក្រមស៊ើបសួរបង្គាប់ឲ្យឃុំខ្លួនបណ្ដោះអាសន្នស្ថិតក្រោមការត្រួតពិនិត្យពីបទ «ក្លែងព័ត៌មានន» តាមក្រមព្រហ្មទណ្ឌមាត្រា ៤២៥។

បើតាមរបាយការណ៍របស់ការិយាល័យប្រជាសាស្ត្ររបស់សហរដ្ឋអាមេរិក ចេញផ្សាយកាលពីខែមករា ឆ្នាំ២០១៧ កម្ពុជាមានអ្នកប្រើប្រើប្រាស់អ៊ីនធឺណិតប្រមាណជា ៧លាននាក់ និងអ្នកដែលសកម្មប្រើប្រាស់បណ្ដាញសង្គមមានចំនួន ៤,៩លាននាក់ ក្នុងចំណោមប្រជាជនកម្ពុជាជិត ១៦លាននាក់៕

អត្ថបទ៖ ទូច សុខា